അമ്പിളി ദേവിയുടെ വീട്ടിലെ പുതിയ സന്തോഷം; മക്കളെ ചേര്‍ത്ത് പിടിച്ച് വീഡിയോയുമായി നടി

നര്‍ത്തകിയായി കലോത്സവ വേദിയില്‍ നിന്നുമാണ് അമ്പിളി ദേവി അഭിനയത്തിലേക്ക് എത്തുന്നത്. സിനിമയിലും സീരിയലിലുമൊക്കെ സജീവ സാന്നിധ്യമാവുകയും ചെയ്തിരുന്നു. എന്നാല്‍ 2009 ല്‍ വിവാഹം കഴിഞ്ഞതോട് കൂടിയാണ് അമ്പിളി ഇന്‍ഡസ്ട്രിയില്‍ നിന്നും മാറി നിന്നത്. സീരിയലിലും മറ്റുമായി ക്യാമറമാനായി ജോലി ചെയ്യുന്ന ലോയല്‍ എന്നയാളുമായിട്ടാണ് അമ്പിളി വിവാഹിതയാവുന്നത്. വര്‍ഷങ്ങളോളം ഒരുമിച്ച് ജീവിച്ചതിന് ശേഷം 2018 ല്‍ വേര്‍പിരിയുകയും ചെയ്തു.

ആദ്യ ബന്ധത്തില്‍ ജനിച്ച മകന്‍ അമര്‍നാഥ് അമ്പിളിയുടെ കൂടെയായിരുന്നു. ഏറ്റവും പുതിയതായി മകന്‍ അപ്പുവിന്റെ ജന്മദിനാഘോഷത്തെ കുറിച്ചാണ് നടി പറയുന്നത്. പത്താം ജന്മദിനം ആഘോഷിക്കുന്ന മകന് ആശംസകള്‍ അറിയിച്ച് കൊണ്ട് എത്തിയ നടി അവന്റെ പിറന്നാളാഘോഷത്തിന്റെ വീഡിയോ യൂട്യൂബ് ചാനലിലൂടെ പുറത്ത് വിടുകയും ചെയ്തു. ഇതോടെ ആശംസകള്‍ അറിയിച്ച് കൊണ്ട് നിരവധി പേരാണ് എത്തുന്നത്.

2013 ജനുവരി ഇരുപത്തിയേഴിനാണ് അമ്പിളിയ്ക്ക് ആദ്യ കുഞ്ഞ് ജനിക്കുന്നത്. മകന്റെ ജന്മദിനം കുടുംബാംഗങ്ങളുടെ സാന്നിധ്യത്തിലാണ് ആഘോഷിച്ചത്. സീരിയലിന്റെ ഷൂട്ട് ഉണ്ടാവുമെന്ന് കരുതി വലിയ പ്ലാനിങ് ഒന്നും നടത്തിയില്ലെന്നും പെട്ടെന്നാണ് എല്ലാം തയ്യാറാക്കിയതെന്നും പറഞ്ഞാണ് അമ്പിളി വീഡിയോ തുടങ്ങുന്നത്. അമ്പിളിയുടെ മക്കളും മാതാപിതാക്കളും സഹോദരിയും അവരുടെ മക്കളുമൊക്കെ ചേര്‍ന്നാണ് പിറന്നാളാഘോഷം വിപുലമാക്കിയത്.

രണ്ട് കുഞ്ഞ് മക്കളുടെ കൂടെയുള്ള അമ്പിളിയുടെ ജീവിതം മനോഹരമാണെന്നാണ് ആരാധകരും കമന്റിട്ടിരിക്കുന്നത്. എന്നും ഇതുപോലെ സന്തോഷത്തോടെ ജീവിക്കാന്‍ സാധിക്കട്ടേ എന്നാണ് എല്ലാവരും ആശംസിക്കുന്നത്. അതേ സമയം ജീവിതത്തിലെടുത്ത തെറ്റായ തീരുമാനങ്ങള്‍ നല്ലൊരു പാഠമാണെന്നും മുന്നോട്ടുള്ള യാത്ര ധൈര്യത്തോടെ നേരിടാന്‍ സാധിക്കുമെന്നും അമ്പിളിയോട് പ്രിയപ്പെട്ടവര്‍ പറയുന്നു.

രണ്ടാം വിവാഹത്തിന് പിന്നാലെ അമ്പിളിയ്ക്ക് ചില വിമര്‍ശനങ്ങള്‍ നേരിടേണ്ടി വന്നിരുന്നു. എന്നാല്‍ ബന്ധം അവസാനിപ്പിച്ചതിന് ശേഷമുണ്ടായ പ്രശ്‌നങ്ങളില്‍ എല്ലാവരും നടിയുടെ കൂടെ നില്‍ക്കുകയാണ് ചെയ്തത്. മാത്രമല്ല വര്‍ഷങ്ങളുടെ ഇടവേളയ്ക്ക് ശേഷം അഭിനയത്തില്‍ സജീവമാവുകയും ചെയ്തു. നിലവില്‍ മഴവില്‍ മനോരമയില്‍ സംപ്രേക്ഷണം ചെയ്യുന്ന തുമ്പപ്പൂ, സൂര്യ ടിവിയിലെ മനസിനക്കരെ, കനല്‍പ്പൂവ് എന്നിങ്ങനെയുള്ള സീരിയലുകളിലാണ് അമ്പിളി അഭിനയിക്കുന്നത്.