ബെസ്റ്റ് ഫ്രണ്ട് ഇനി ജീവിത പങ്കാളി; ആര്യയും സിബിൻ ബെഞ്ചമിനും വിവാഹിതരാകുന്നു, എൻ​ഗേജ്മെന്റ് ഫോട്ടോയുമായി താരം!

കഴിഞ്ഞ വർഷം അവസാനത്തോടെയാണ് 2025ൽ താൻ വിവാഹിതയാകുമെന്ന വിവരം ആര്യ ബഡായി സോഷ്യൽമീഡിയ വഴി അറിയിച്ചത്. എന്നാൽ ആരാണ് തന്റെ പങ്കാളിയാകാൻ പോകുന്ന വ്യക്തിയെന്ന് ആര്യ വെളിപ്പെടുത്തിയിരുന്നില്ല. ഇത്രയും കാലം ഒളിപ്പിച്ച് വെച്ചിരുന്ന സർപ്രൈസ് പുറത്ത് വിട്ടിരിക്കുകയാണ് താരം ഇപ്പോൾ. ആർജെയും ബി​ഗ് ബോസ് താരവുമായ സിബിൻ ബെഞ്ചമിനാണ് ഇനിയങ്ങോട്ട് ആര്യയുടെ ജീവിത പങ്കാളി.

വർഷങ്ങളായി അടുത്ത സുഹൃത്തുക്കളാണ് ആര്യയും സിബിനും. വിവാഹനിശ്ചയത്തിന്റെ ചിത്രങ്ങൾ ആര്യ സമൂ​ഹമാധ്യമങ്ങളിലൂടെ പങ്കുവെച്ചു. രണ്ടുപേരുടേയും രണ്ടാം വിവാഹമാണ്. ഉറ്റ സുഹൃത്തുക്കൾ എന്നതിൽ നിന്ന് ഇനിയങ്ങോട്ട് എന്നേക്കുമുള്ള ജീവിതപങ്കാളിയിലേക്ക്.

ഒരു ലളിതമായ ചോദ്യത്തിലൂടെയും എന്റെ ജീവിതത്തിൽ ഇതുവരെ എടുത്ത ഏറ്റവും വേഗതയേറിയ തീരുമാനത്തിലൂടെയും ജീവിതം ഏറ്റവും അവിശ്വസനീയവും മനോഹരവുമായ വഴിത്തിരിവിലേക്ക് എത്തി. എനിക്ക് സംഭവിച്ചതിൽ വെച്ച് ഏറ്റവും മികച്ച ആസൂത്രണമില്ലാത്ത കാര്യമാണിത്. ഇത്രയും കാലം ഞങ്ങൾ രണ്ടുപേരും എല്ലാത്തിലും പരസ്പരം ഒരുമിച്ചുണ്ടായിരുന്നു. കഷ്ടപ്പാടുകളിലും ദുഃഖങ്ങളിലും നല്ലതിലും ചീത്തയിലുമെല്ലാം.

പക്ഷെ ജീവിതകാലം മുഴുവൻ ഞങ്ങൾ ഒരുമിച്ചായിരിക്കുമെന്ന് ഒരിക്കലും കരുതിയിരുന്നില്ല. എന്റെ ഏറ്റവും വലിയ പിന്തുണയായതിന് എന്റെ എല്ലാ കുഴപ്പങ്ങളിലും ശാന്തത പാലിച്ചതിന് ഞാൻ സമാധാനപരമായി ആശ്രയിക്കുന്ന തോളായതിന് നമ്മുടെ മകൾക്ക് ഏറ്റവും നല്ല അച്ഛനായതിന് എനിക്കും ഖുഷിക്കും ഏറ്റവും നല്ല സുഹൃത്തുക്കളിൽ ഏറ്റവും നല്ലവനായതിന് ഞങ്ങളുടെ മുഴുവൻ കുടുംബത്തിനും പാറയായതിന്...

ഒടുവിൽ എനിക്ക് പൂർണ്ണത അനുഭവപ്പെടുന്നു. എന്റെ ഹൃദയവും മനസും ഒടുവിൽ സമാധാനത്തിൽ ആയിരിക്കുന്നതിന്റെ സന്തോഷം കണ്ടെത്തി. നിന്റെ കൈക്കുള്ളിൽ എന്റെ വീട് ഞാൻ കണ്ടെത്തി. ശരിയായ വ്യക്തി ശരിയായ സമയത്ത്. ഖുശി ഡാഡിയെന്ന് വിളിക്കുന്ന അവളുടെ ഏറ്റവും പ്രിയപ്പെട്ട വ്യക്തിയെ പരിചയപ്പെടൂ... ഞാൻ നിങ്ങളെ എന്നേക്കും സ്നേഹിക്കുന്നു. എന്റെ എല്ലാ കുറവുകളും പൂർണ്ണതകളും മനസിലാക്കി എന്നെ നിങ്ങളുടേതാക്കിയതിന് നന്ദി.

എന്തായാലും എന്റെ അവസാന ശ്വാസം വരെ ഞാൻ നിങ്ങളെ മുറുകെ പിടിക്കും. അത് ഒരു വാഗ്ദാനമാണ്. ഞങ്ങളുടെ ഏറ്റവും വലിയ ശക്തിയായതിന് ഞങ്ങളുടെ ആളുകൾക്ക് നന്ദി പറയാനും ഞാൻ ആഗ്രഹിക്കുന്നു... നിങ്ങൾ ഒരു പാറപോലെ ഒരു പരിചയായി ഞങ്ങളുടെ ഏറ്റവും വലിയ ചിയർ ലീഡർമാരായി ഞങ്ങളുടെ അഭ്യുദയകാംക്ഷികളായി ഞങ്ങളുടെ കുടുംബമായി ഞങ്ങളോടൊപ്പം നിന്നു.

ഞങ്ങൾ നിങ്ങളോട് കടപ്പെട്ടിരിക്കുന്നു. ഞങ്ങൾ നിങ്ങളെ നിരുപാധികം സ്നേഹിക്കുന്നു. ജീവിതം ഞങ്ങൾക്ക് മറ്റൊരു അവസരം നൽകുന്നു. ഇത് ഞങ്ങൾ ഉപേക്ഷിക്കാൻ പോകുന്നില്ല. കല്യാണം അടുത്തുതന്നെയുണ്ട്... അതിനായുള്ള തയ്യാറെടുപ്പുകൾ തുടങ്ങാം എന്നാണ് ആര്യ കുറിച്ചത്. കേരള സാരിയിൽ സുന്ദരിയായി മുല്ലപ്പൂ ചൂടി സിബിനെ കെട്ടിപിടിച്ച് കടൽ നോക്കി നിൽക്കുന്ന ആര്യയാണ് കുറിപ്പിനൊപ്പം പ്രത്യക്ഷപ്പെട്ട ഫോട്ടോയിലുള്ളത്. ഇരുവരുടേയും മുഖം വ്യക്തമല്ല.

ഇങ്ങനൊരു ഒത്തുചേരൽ ഒട്ടും പ്രതീക്ഷിച്ചില്ലെന്നാണ് കമന്റുകൾ. ദീപ്തി സതി, നടി മുക്ത, അഞ്ജു ജോസഫ്, സൂരജ് തേലക്കാട്, അനുമോൾ, പ്രിയമണി, വരദ, ഷംന കാസിം തുടങ്ങി സിനിമ-സീരിയൽ മേഖലയിലുള്ള നിരവധി പേർ ഇരുവർക്കും ആശംസകൾ നേർന്ന് എത്തി. ആര്യയുടെ ബൊട്ടീക്ക് ബിസിനസ് മനോഹരമായി മുന്നോട്ട് പോകുന്നതിന് എല്ലാ സഹായവും ചെയ്യുന്നത് സിബിനാണ്.

ആര്യയുടെ ആദ്യ വിവാഹം നടി അർച്ചന സുശീലന്റെ സഹോദരൻ രോഹിത്തുമായിട്ടായിരുന്നു. ആ ബന്ധത്തിൽ പിറന്ന മകളാണ് ഖുശിയെന്ന് വിളിപ്പേരുള്ള റോയ. ചിഞ്ചുവായിരുന്നു സിബിന്റെ മുൻ പങ്കാളി. ഇരുർക്കും ഒരു മകനുണ്ട്. കുഞ്ഞ് ചിഞ്ചുവിന്റെ സംരക്ഷണയിലാണ്.