'അപ്പച്ചി ട്രാക്ക് മാറിയതിൽ സന്തോഷം'; ആ​രാധകരുടെ ആ​ഗ്രഹം മനസിലാക്കിയ സാന്ത്വനം ടീമിനെ അഭിനന്ദിച്ച് കമന്റുകൾ!

തന്റെ സാന്ത്വനം വീട്ടുകാരെ മറന്നുള്ള ഒരു ജീവിതം വേണ്ട എന്നാണ് ഹരി പറയുന്നത്. അതുകൊണ്ടുതന്നെ മകളെ വീട്ടിലേക്ക് കൊണ്ടുവരാനായി ഏറ്റവും മോശമായ പലതും തമ്പി കാണിക്കുന്നുണ്ട്. സാന്ത്വനം വീട്ടിലുള്ളവരെ പൊലീസ് കേസിൽ പെടുത്തുക, മറ്റ് ആളുകളെ ഉപയോഗിച്ച് അപമാനിക്കുക തുടങ്ങിയ മോശം കാര്യങ്ങളെല്ലാം തമ്പി കാണിക്കുന്നുണ്ട്. ഇവയൊന്നും ഫലിക്കാതെ വന്നതോടെ പതിനെട്ടാമത്തെ അടവായി തമ്പി ചെയ്തത് തന്റെ പെങ്ങൾ ലക്ഷ്മിയെ കളത്തിൽ ഇറക്കുക എന്നതായിരുന്നു. അപ്പുവിനെ ശുശ്രൂഷിക്കാൻ എന്ന വ്യാജേനയാണ് ലക്ഷ്മിയെ തമ്പി സാന്ത്വനത്തിൽ‍ കൊണ്ടുവിട്ടത്. സാന്ത്വനത്തിലെ എല്ലാവരിൽ നിന്നും അപ്പുവിനേയും ഹരിയേയും പിരിച്ചെടുക്കുകയായിരുന്നു യഥാർഥ ലക്ഷ്യം. തമ്പി ഏൽപ്പിച്ച കർത്തവ്യം വളരെ മനോഹരമായി ലക്ഷ്മി സാന്ത്വനത്തിൽ നടപ്പിലാക്കുകയും ചെയ്തു.

തുടക്കത്തിൽ ലച്ചു അപ്പച്ചിയുടെ ഉദ്ദേശം അപ്പുവിന് മനസിലായിരുന്നില്ല. എന്നാൽ ഇപ്പോൾ അപ്പു കാര്യങ്ങൾ മനസിലാക്കുകയും അതിന് അനുസരിച്ച് പ്രവർത്തിക്കുകയുമാണ് ചെയ്യുന്നത്. വീട്ടിലേക്ക് പുതിയ ഇലക്ട്രോണിക്ക് സാധനങ്ങളും, നിത്യോപയോഗ സാധനങ്ങളും വാങ്ങി സാന്ത്വനത്തിലുള്ളവരെ കൊച്ചാക്കാനുള്ള ശ്രമം ലച്ചു നടത്തിയപ്പോൾ അപ്പുവും ഒപ്പം നിന്നിരുന്നു. കൂടാതെ ഹരിയുടെ സഹോദരൻ കണ്ണനെ ലച്ചു അപ്പച്ചി പരിഹസിച്ചപ്പോഴും സത്യാവസ്ഥ തിരക്കാൻ അപ്പു വന്നിരുന്നില്ല. ലച്ചു അപ്പച്ചി എന്ന കഥാപാത്രം സാന്ത്വനത്തിന്റെ ഭാ​ഗമായത് യഥാർഥത്തിൽ പ്രേക്ഷകർക്ക് ഇഷ്ടപ്പെട്ടിരുന്നില്ല. ഒരിക്കലും ഒരു കുടുംബത്തിലും നടക്കാത്ത കാര്യങ്ങളാണ് ലച്ചു അപ്പച്ചി സാന്ത്വനത്തിന്റെ ഭാ​ഗമായതോടെ സീരിയലിൽ കാണിച്ചുകൊണ്ടിരുന്നത് എന്നാണ് സാന്ത്വനം ആരാധകർ പരാതിപ്പെട്ടത്. സീരിയലിന്റെ നിലവാരം ഇടിഞ്ഞു എന്ന തരത്തിലടക്കം വിമർശനങ്ങൾ ഉയർന്നതോടെ ലച്ചു അപ്പച്ചി ട്രാക്ക് എടുത്ത് കളഞ്ഞ് പഴയ സാന്ത്വനം വീണ്ടെടുക്കാൻ ശ്രമിക്കുകയാണ് അണിയറപ്രവർത്തകർ ഇപ്പോൾ. അത് സൂചിപ്പിക്കുന്ന പുതിയ പ്രമോയും പുറത്തിറക്കിയിട്ടുണ്ട്.

പഴയ പരസ്പര സ്നേഹവും ശിവാഞ്ജലി സീനുകളുമെല്ലാം ഇനി മുതൽ സാന്ത്വനത്തിൽ കാണാൻ‍ കഴിയുമെന്നാണ് പുതിയ പ്രമോ സൂചിപ്പിക്കുന്നത്. പുതിയ പ്രമോ കണ്ട് ആരാധകരും ആവേശത്തിലാണ്. 'അപ്പച്ചി ട്രാക് കഴിഞ്ഞതിൽ സന്തോഷം. കുറേ നാളായി മിസ് ചെയ്ത സാന്ത്വനം തിരിച്ചുകിട്ടി. സന്തോഷകരമായ എപ്പിസോഡുകൾ തിരിച്ചെത്തി. ഒടുവിൽ അപ്പച്ചി ബൈ ബൈ പറഞ്ഞു. ആരാധകരുടെ ആഗ്രഹപ്രകാരം സാന്ത്വനത്തിൽ നിന്ന് പോയി...' തുടങ്ങിയ കമന്റുകളാണ് പുതിയ പ്രമോയ്ക്ക് ലഭിക്കുന്നത്.