ഉപ്പും മുളകും അവസാനിപ്പിച്ച് ചപ്പുംചവറുമായി എത്തിയേക്കാം, അത്തരമൊരു സാധ്യത തള്ളിക്കളയാനാവില്ല!

ശക്തമായ പ്രതിഷേധം

ഉപ്പും മുളകുമെന്ന പരമ്പരയുടെ സംവിധായകനില്‍ നിന്നുമുണ്ടായ മോശം അനുഭവത്തെക്കുറിച്ച് തുറന്നുപറഞ്ഞ നിഷാ സാരംഗിനെ അപമാനിക്കുന്നതിനും പരമ്പരയില്‍ നിന്നും പുറത്താക്കാനും നടത്തിയ ഹീനശ്രമങ്ങളെ ആത്മ അപലപിക്കുന്നു. കടുത്ത പ്രതിഷേധം രേഖപ്പെടുത്തുകയും ചെയ്യുന്നു. ടെലിവിഷന്‍ മേഖലയുമായി ബന്ധപ്പെട്ട് പ്രവര്‍ത്തിക്കുന്നവരുടെ ക്ഷേമത്തിനും മറ്റ് ജീവകാരുണ്യ സേവന പ്രവര്‍ത്തനങ്ങള്‍ക്കുമായി പ്രവര്‍ക്കിക്കുന്ന സംഘടനയായ ആത്മയ്ക്ക് മുന്നില്‍ ആദ്യമായാണ് ഇങ്ങനെയൊരു കാര്യമെത്തുന്നത്.

സാധ്യതകള്‍ തള്ളിക്കളയാനാവില്ല

ഉപ്പും മുളകും എന്ന പരമ്പരയിലേക്ക് താന്‍ തിരിച്ചുവരണമെങ്കില്‍ സംവിധായകനെ മാറ്റണമെന്ന് നിഷാ സാരംഗ് ആവശ്യപ്പെട്ടിരുന്നു. താരവുമായി നടത്തിയ അനുരഞ്ജന ചര്‍ച്ചയില്‍ ചാനല്‍ അധികൃതര്‍ ഇക്കാര്യത്തില്‍ താരത്തിന് ഉറപ്പുനല്‍കിയിരുന്നു. പരമ്പരയില്‍ താരം തുടരുമെന്നറിയിച്ചപ്പോഴും ഇക്കാര്യത്തെക്കുറിച്ച് വ്യക്തമാക്കിയിരുന്നില്ല. ഈ നീക്കത്തെ സംശയകരമായിട്ടായിരുന്നു എല്ലാവരും വീക്ഷിച്ചത്. താരത്തെ പരമ്പരയില്‍ നിലനിര്‍ത്തി കുറച്ച് എപ്പിസോഡുകള്‍ കഴിഞ്ഞതിന് ശേഷം പരമ്പര അവസാനിപ്പിച്ച് പിന്നീട് ചപ്പും ചവറും എന്നോ മറ്റോ വേറൊരു പേരില്‍ അതേ സംവിധായകനെ വെച്ച് സീരിയല്‍ പുനരാരംഭിക്കപ്പെടുന്നതിനും നടി ഒഴിവാക്കപ്പെടുന്നതിനുമുള്ള സാധ്യത ഈ അനുഭവങ്ങളില്‍ നിന്നും സംശയിക്കപ്പെടേണ്ടിയിരിക്കുന്നു. എന്നാല്‍ അങ്ങനെയുള്ള ഒരു നീക്കത്തെയും സംഘടന പോത്സാഹിപ്പിക്കില്ലെന്നും പത്രക്കുറിപ്പില്‍ വ്യക്തമാക്കിയിട്ടുണ്ട്.

സോഷ്യല്‍ മീഡിയ ഏറ്റെടുത്തു

നിഷാ സാരംഗിന്റെ വെളിപ്പെടുത്തല്‍ പുറത്തുവന്നതിന് പിന്നാലെ തന്നെ ശക്തമായ പിന്തുണയുമായി നവമാധ്യമങ്ങളും എത്തിയിരുന്നു. സംവിധായകനെതിരെ നടപടി സ്വീകരിച്ച് താരത്തെ പരമ്പരയിലേക്ക് തിരികെ പ്രവേശിപ്പിക്കണമെന്നുമായിരുന്നു ആരാധകര്‍ ആവശ്യപ്പെട്ടത്. റേറ്റിങ്ങില്‍ ഏറെ മുന്നിലുള്ള പരമ്പരകളിലൊന്നുകൂടിയാണിത്. അതിനാല്‍ത്തന്നെ അണിയറപ്രവര്‍ത്തകരെ സംബന്ധിച്ച് സുപ്രധാനമായ കാര്യം കൂടിയായിരുന്നു ഇത്.

സംവിധായകനെ മാറ്റി

വിവാദവും വിമര്‍ശനവും അരങ്ങു തകര്‍ക്കുന്നതിനിടയിലാണ് സംവിധായകന്‍ ഉണ്ണിക്കൃഷ്ണനെ മാറ്റിയെന്ന റിപ്പോര്‍ട്ട് പുറത്തുവന്നത്. സോഷ്യല്‍ മീഡിയയുടെ കൂടി ശക്തമായ പിന്തുണ കൂടിയാണ് ഈ വിഷയത്തില്‍ പ്രതിഫലിച്ചത്. സംവിധായകനെ മാറ്റിയതോട് കൂടി താരം തിരികെ പരമ്പരയില്‍ പ്രവേശിക്കുമെന്നും ഉറപ്പായിട്ടുണ്ട്. വ്യാഴാഴ്ച താന്‍ സീരിയലില്‍ ജോയിന്‍ ചെയ്യുമെന്നും താരം വ്യക്തമാക്കിയിട്ടുണ്ട്.