മോഹന്‍ലാലിനൊപ്പം ബിഗ് ബോസിലെത്തുന്നവരെ കാത്ത് മുംബൈ, അണിയറ വിശേഷങ്ങള്‍ ഇങ്ങനെ!

ആദ്യ സീസണ്‍ മുംബൈയില്‍

ബിഗ് ബോസിന്റെ ആദ്യ സീസണ്‍ മുംബൈയില്‍ വെച്ച് തുടങ്ങുമെന്ന് അണിയറപ്രവര്‍ത്തകര്‍ വ്യക്തമാക്കിയിട്ടുണ്ട്. കൊച്ചി, തിരുവനന്തപുരം എന്നിവിടങ്ങളില്‍ എവിടെയെങ്കിലും വെച്ചായിരിക്കും ഒന്നാം ഭാഗമെന്ന തരത്തിലായിരുന്നു നേരത്തെ അറിയിച്ചിരുന്നത്. എന്നാല്‍ കേരളത്തിന് പുറത്ത് വെച്ച് ആദ്യ സീസണ്‍ തുടങ്ങാനുള്ള നീക്കങ്ങള്‍ അണിയറയില്‍ സജീവമായി നടക്കുകയാണെന്ന് അടുത്ത വൃത്തങ്ങള്‍ ഇപ്പോള്‍ വ്യക്തമാക്കിയിട്ടുണ്ട്.

ജൂണ്‍ അവസാന വാരത്തോടെ

ജൂണ്‍ അവസാന വാരത്തോട് കൂടി പരിപാടി സംപ്രേഷണം ചെയ്യാവുന്ന തരത്തിലുള്ള പ്രവര്‍ത്തനങ്ങളാണ് ഇപ്പോള്‍ നടക്കുന്നത്. മുംബൈയിലെ ലൊക്കേഷനില്‍ ഇതിനുള്ള ജോലികള്‍ ആരംഭിച്ച് തുടങ്ങിയെന്നും റിപ്പോര്‍ട്ടുകളില്‍ പറയുന്നു. പരിപാടിയുടെ പ്രമോ ഉടന്‍ തന്നെ കാണിച്ച് തുടങ്ങുമെന്നും റിപ്പോര്‍ട്ടുകളുണ്ട്.

മത്സരാര്‍ത്ഥികളെ തിരഞ്ഞെടുക്കുന്നു

മോഹന്‍ലാല്‍ അവതാരകനായി എത്തുന്ന ഷോയില്‍ പങ്കെടുക്കുന്നതിനായി നിരവധി പേരാണ് ശ്രമം നടത്തുന്നതെന്ന് നേരത്തെ റിപ്പോര്‍ട്ടുകളുണ്ടായിരുന്നു. അദ്ദേഹത്തിനോടൊപ്പം ചെലവഴിക്കാന്‍ കഴിയുന്ന നമിമിഷങ്ങളും അതിലൂടെ ലഭിച്ചേക്കാവുന്ന പ്രശസ്തിയുമാണ് പലരും ലക്ഷ്യം വെക്കുന്നത്. പരിപാടിയിലേക്കുള്ള 16 മത്സരാര്‍ത്ഥികളെ തിരഞ്ഞെടുക്കുന്നതിന്റെ തിരക്കിലാണ് അണിയറപ്രവര്‍ത്തകര്‍.

സിനിമാ സീരിയല്‍ താരങ്ങള്‍

ബിഗ് സ്‌ക്രീനിലെയും മിനി സ്‌ക്രീനിലെയും പ്രതിഭകള്‍ ഒരുമിച്ചെത്തുകയാണ് ബിഗ് ബോസിലൂടെ. പുറത്തുനിന്നുള്ള കമ്യൂണിക്കേഷനെല്ലാം വിച്ഛേദിച്ച് എല്ലാവരും ഒരു സ്ഥലത്ത് താമസിക്കുകയും അതിനുള്ളില്‍ വെച്ച് നല്‍കുന്ന ടാസ്‌ക്കുകള്‍ കൃത്യമായി നിറവേറ്റുന്നവരെ അടുത്ത ഘട്ടത്തിലേക്ക് പ്രവേശിപ്പിക്കും. ഈ തരത്തിലാണ് പരിപാടിയുടെ ഫോര്‍മാറ്റ്.

മോഹന്‍ലാലിന് പറയാനുള്ളത്

ലോകത്തിലെ ഏറ്റവും വലിയ റിയാലിറ്റി ഷോയായ ബിഗ് ബോസുമായി ഏഷ്യാനെറ്റ് എത്തുമ്പോള്‍ താനും ഒപ്പമുണ്ടെന്ന് മോഹന്‍ലാല്‍ പറയുന്നു. അടച്ചിട്ടൊരു വീട് 60 ക്യാമറ, 16 മത്സരാര്‍ത്ഥികള്‍, ഇവരില്‍ പലര്‍ക്കും പല ഭാവമായിരിക്കും. ആകാംക്ഷഭരിതമായിരിക്കും ഇനിയുള്ള നാളുകളെന്നും മോഹന്‍ലാല്‍ പറയുന്നു.

വീഡിയോ കാണൂ

ബിഗ് ബോസിനെക്കുറിച്ച് മോഹന്‍ലാല്‍ പറയുന്നത്, വീഡിയോ കാണൂ.