സെറ്റിട്ടതാണെന്ന് അറിയാം, എങ്കിലും ഒരു വിഷമം; ഞങ്ങൾ ഇറങ്ങിയ ശേഷം ബി​ഗ് ബോസ് വീടിന് സംഭവിച്ചത്; അഖിൽ

അഖിൽ എന്ന പേര് പ്രേക്ഷകരുടെ മനസ്സിൽ പതിഞ്ഞത് ബി​ഗ് ബോസിന് ശേഷമാണ്. അതിന് മുമ്പ് ഷോകളിൽ കാണുന്ന ഒരു പയ്യൻ ആയിരുന്നു പ്രേക്ഷകർക്ക് താനെന്ന് അഖിൽ തന്നെ തുറന്ന് പറഞ്ഞിട്ടുണ്ട്.

ബി​ഗ് ബോസിന് പുറത്തിറങ്ങിയതിന് പിന്നാലെ ടെലിവിഷൻ ഷോ അവതാരകൻ ആയും അഖിൽ പ്രേക്ഷകർക്ക് മുന്നിലെത്തി. കാക്കിപ്പട എന്ന സിനിമയി‍ലും അഭിനയിച്ചു. കഴിഞ്ഞ ദിവസം പുറത്തിറങ്ങിയ സിനിമയ്ക്ക് മികച്ച പ്രേക്ഷക പ്രതികരണം ആണ് ലഭിക്കുന്നത്.

സിനിമയുടെ പ്രൊമോഷണൽ പരിപാടികളിൽ പങ്കെടുത്ത് വരികയാണ് അഖിൽ. താരം ഇന്ത്യാ ​ഗ്ലിറ്റ്സിന് നൽകിയ അഭിമുഖമാണ് ഇപ്പോൾ ശ്രദ്ധ നേടുന്നത്. ബി​ഗ് ബോസ് വീടിനെക്കുറിച്ച് അഖിൽ അഭിമുഖത്തിൽ സംസാരിച്ചു.

'ബി​ഗ് ബോസ് കഴിഞ്ഞപ്പോൾ ഭയങ്കരമായി മിസ് ചെയ്തു ആ വീടിനെ. എല്ലാവരും തമാശയ്ക്ക് പറയും അയ്യോ ഞാനവിടെ നിന്ന് ഇറങ്ങി, രക്ഷപ്പെട്ടു എന്ന്. പക്ഷെ ആ വീട് നമുക്ക് സന്തോഷവും സങ്കടവും എല്ലാം തരുന്ന വീട് ആണ്. എന്തൊക്കെ പറഞ്ഞാലും ആ വീട് മിസ് ചെയ്യും'

'കാരണം ഈയിടയ്ക്ക് ഭയങ്കര വിഷമം തോന്നി. ബി​ഗ് ബോസിന്റെ മുംബൈയിലെ സെറ്റിന്റെ ചിത്രം സോഷ്യൽ മീഡിയയിൽ വന്നിരുന്നു. അതിനകത്ത് ഒരു മരം ഉണ്ട്. ഇതിൽ നിന്നും എപ്പോഴും അടിച്ച് വാരിക്കൊണ്ടിരിക്കും. ഷൂട്ടെല്ലാം കഴിഞ്ഞിട്ട് ആ വീടിന്റെ ഫോട്ടോ എവിടെയോ ഇൻസ്റ്റ​ഗ്രാമിൽ കണ്ടു'

'ഇല വീണ് ആ വീട് കാട് പിടിച്ചു. നമ്മൾ ദിവസേന വൃത്തിയാക്കുന്ന വീടല്ലേ. അപ്പോൾ നമുക്ക് ഭയങ്കര വിഷമം തോന്നി. കാരണം നമ്മൾ സ്വന്തം വീടായി നോക്കിയതാണ്. ആ വീട് കാട് പിടിച്ച് ആരും നോക്കാനില്ലെന്ന ഫീൽ ആയിപ്പോയി. സംഭവം സെറ്റ് ആണ്. പക്ഷെ വിഷമം ആയി'

'സിനിമകളിൽ ഇപ്പോൾ സെലക്ടീവ് അല്ല. തുടക്കമായതിനാൽ വിളിക്കുന്ന സിനിമകളിൽ അഭിനയിക്കുന്നു. എനിക്ക് അവതാരകൻ ആവണം എന്ന് ഭയങ്കര ആ​ഗ്രഹം ഉള്ള ആളായിരുന്നു'

'ആദ്യമായി ചെയ്യുന്നത് ഏഷ്യാനെറ്റ് പ്ലസിൽ ഒരു ക്യാംപസ് ഷോ ആണ്. ഇപ്പോഴത്തെ വിശേഷം എന്നത് ഞാൻ അവതാരകൻ ആയി. പണ്ട് മുതലേ കണ്ട് കൊണ്ടിരുന്ന സ്റ്റാർ സിം​ഗർ എന്ന പരിപാടിയിലെ അവതാരകനായി,' അഖിൽ പറഞ്ഞു.

ബി​ഗ് ബോസിന്റെ നാലാം സീസൺ അടുത്തിടെ ആണ് അവസാനിച്ചത്. മികച്ച പ്രേക്ഷക പ്രതികരണം ആണ് ഇത്തവണത്തെ സീസണിന് ലഭിച്ചത്. മുൻ സീസണുകളെ അപേക്ഷിച്ച് സോഷ്യൽ മീഡിയയിൽ വലിയ ചർച്ചകൾക്ക് നാലാം സീസൺ തുടക്കം കുറിച്ചു.