പേളിയുടെ പ്രസവമടക്കം വീഡിയോയാക്കി താരദമ്പതിമാര്‍; നില ബേബിയുടെ ജനനം എങ്ങനെയെന്ന് കാണിച്ച് പേളിയുടെ വീഡിയോ

പേളിയുടെ പേരിലുള്ള യൂട്യൂബ് ചാനലിലൂടെയാണ് പലപ്പോഴും വീഡിയോ പോസ്റ്റ് ചെയ്യാറുള്ളത്. ഇപ്പോള്‍ മകളുടെ ജനനത്തിന് മണിക്കൂറുകള്‍ മുന്‍പുള്ള ദൃശ്യങ്ങളാണ് പുറത്ത് വിട്ടിരിക്കുന്നത്. മാര്‍ച്ച് പതിനെട്ടിന് ആശുപത്രിയില്‍ പോകാന്‍ നില്‍ക്കുന്ന ആകാംഷയിലാണ് വീഡിയോ തുടങ്ങുന്നത്. കുളിച്ചൊരുങ്ങി, പ്രഭാതഭക്ഷണമൊക്കെ കഴിച്ച് റെഡിയായി ഇരിക്കുകയാണ്. താന്‍ ഷോപ്പിങ്ങിന് പോവുകയാണെന്നും വാവയെ വാങ്ങിക്കണമെന്നും പറഞ്ഞാണ് പേളി വീട്ടില്‍ നിന്നും ഇറങ്ങിയത്. ആശുപത്രിയില്‍ എത്തിയതിന് ശേഷം ശ്രീനിഷാണ് വീഡിയോ പിടിച്ച് ഒപ്പമുണ്ടായിരുന്നത്.

ജിം ബോളില്‍ എക്‌സര്‍സൈസ് ചെയ്ത് താന്‍ നോര്‍മല്‍ ഡെലിവറിയ്ക്ക് വേണ്ടി ശ്രമിക്കുകയാണെന്നാണ് പേളി പറയുന്നത്. ആശുപത്രിയുടെ അകത്തളങ്ങളിലൂടെ നടന്നും മറ്റുമായി പ്രസവത്തിന് വേണ്ടിയുള്ള മുന്നൊരുക്കങ്ങള്‍ നടത്തി. ഇടയ്ക്ക് സദ്യയടക്കം ഇഷ്ടമുള്ള ആഹാരങ്ങളൊക്കെ പേളി കഴിച്ചിരുന്നു. വയറിനുള്ളില്‍ കിടന്ന് കുഞ്ഞും പാക്കിങ് നടത്തുകയാണ്. വെറുതേ ഇരിക്കുന്ന സമയങ്ങളില്‍ പാട്ട് കേട്ടും ഡോറ ബുജി കണ്ടുമൊക്കെ ഓരോ നിമിഷവും ആഘോഷമാക്കുകയായിരുന്നു പേളി.

പ്രസവ സമയത്തും ഭര്‍ത്താവായ ശ്രീനിഷും ഒപ്പമുണ്ടായിരുന്നു. ഇത്രയും കെയിറങ്ങ് ഉള്ള ഭര്‍ത്താവിനെ കിട്ടിയത് ഭാഗ്യമാണെന്ന് ഇടയില്‍ നഴ്‌സുമാരും പറഞ്ഞിരുന്നു. അങ്ങനെ മാര്‍ച്ച് ഇരുപതിന് രാത്രി 9.40 നാണ് പേളി കുഞ്ഞിന് ജന്മം കൊടുക്കുന്നത്. ജനിച്ചപ്പോള്‍ മകള്‍ ആരോഗ്യവതിയായിരുന്നു എന്നും 3.8 കിലോ ഭാരം ഉണ്ടായിരുന്നുവെന്നും താരം പറയുന്നു. ആശുപത്രിയിലെ എല്ലാവര്‍ക്കും നന്ദി പറഞ്ഞ് കൊണ്ടാണ് പേളിയും ശ്രീനിഷും മാലാഖ കുഞ്ഞുമായി വീട്ടിലേക്ക് യാത്രയാവുന്നത്.

പേളിയുടെ വീഡിയോ കണ്ടതോടെ സ്വന്തം പ്രസവം ഇത്രയധികം ആഘോഷിച്ച ആരും ഉണ്ടാവില്ലെന്ന് പറയുകയാണ് ആരാധകര്‍. ശ്രീനിയെ പോലൊരു ഭര്‍ത്താവിനെ കിട്ടിയതാണ് പേളിയുടെ ഭാഗ്യമെന്നും ഇനി മുതല്‍ നില ബേബിയുടെ ഫാന്‍സായിരിക്കും ഇവിടെ ഉണ്ടാവുക. പ്രസന സമയത്ത് എപ്പോഴും ഭര്‍ത്താവ് കൂടെ ഉണ്ടാവുന്നത് കൂടുതല്‍ സന്തോഷം നല്‍കുന്നതാണെന്ന് ഇതില്‍ നിന്നും മനസിലായി എന്നുമൊക്കെ കമന്റിലൂടെ പലരും അഭിപ്രായപ്പെടുന്നു.