സ്റ്റൈലിഷ് മേക്കോവറില്‍ ഞെട്ടിച്ച് രാജിനി ചാണ്ടി, കമന്റുകളുമായി ബിഗ് ബോസ് താരങ്ങള്‍

ബിഗ് ബോസ് 2വിലെ ആദ്യ ആഴ്ചയിലെ ക്യാപ്റ്റന്‍ കൂടിയായിരുന്നു രാജിനി ചാണ്ടി. ബിഗ് ബോസിന് ശേഷമുളള മല്‍സരാര്‍ത്ഥികളുടെ ഒത്തുകൂടലിലെല്ലാം നടിയും പങ്കെടുത്തു. മുന്‍പ് രാജിനി ചാണ്ടിയുടെ വീട്ടില്‍ നിന്നും ബിഗ് ബോസ് താരങ്ങള്‍ എടുത്ത ചിത്രങ്ങളെല്ലാം സോഷ്യല്‍ മീഡിയയില്‍ വൈറലായി മാറിയിരുന്നു.

തിരക്കുകള്‍ക്കിടെയിലും സോഷ്യല്‍ മീഡിയയിലും തന്‌റെ പുതിയ വിശേഷങ്ങള്‍ പങ്കുവെച്ച് എത്താറുളള താരമാണ് നടി. മുന്‍പ് ബിഗ് ബോസ് താരങ്ങളെല്ലാം ഒന്നിച്ച വെബ് സീരീസിന്റെ ചിത്രീകരണം രാജിനി ചാണ്ടിയുടെ വീട്ടില്‍ വെച്ചായിരുന്നു നടന്നത്. അന്ന് ആര്യ, വീണാ നായര്‍, ഫുക്രു, സുരേഷ് കൃഷ്ണന്‍, പ്രദീപ് ചന്ദ്രന്‍, അലക്‌സാന്‍ഡ്ര, ആര്‍ജെ രഘു തുടങ്ങിയവരെല്ലാം നടിയുടെ വീട്ടില്‍ എത്തിയിരുന്നു.

അന്നും താരങ്ങളെല്ലാം രാജിനി ചാണ്ടിക്കൊപ്പമുളള ചിത്രങ്ങളും വീഡിയോസുമെല്ലാം പങ്കുവെച്ചു. അതേസമയം രാജിനി ചാണ്ടിയുടെതായി വന്ന പുതിയ ഫോട്ടോഷൂട്ട് ചിത്രങ്ങള്‍ സോഷ്യല്‍ മീഡിയയില്‍ ഒന്നടങ്കം തരംഗമായി മാറിയിരുന്നു. നാടന്‍ ലുക്കില്‍ നിന്നും കുറച്ച് മോഡേണായിട്ടുളള മേക്കോവറില്‍ എത്തിയ നടിയുടെ ചിത്രങ്ങളാണ് സമൂഹ മാധ്യമങ്ങളില്‍ ട്രെന്‍ഡിംഗായിരിക്കുന്നത്.

ആതിരാ ജോയ് എന്ന ഫോട്ടോഗ്രാഫറുടെ സ്ത്രീ ശാക്തീകരണം മുന്‍നിര്‍ത്തിയുളള ഫോട്ടോഷൂട്ടിലാണ് രാജിനി ചാണ്ടി കിടിലന്‍ ലുക്കില്‍ എത്തിയത്. രാജിനി ചാണ്ടിയുടെതായി വന്ന നാല് സ്‌റ്റൈലന്‍ ചിത്രങ്ങളും ഏറ്റെടുത്തിരിക്കുകയാണ് ആരാധകര്‍. ചിത്രങ്ങള്‍ക്ക് പിന്നാലെ കമന്റുകളുമായി ബിഗ് ബോസ് സഹതാരങ്ങളും എത്തിയിരുന്നു.

ആര്യ, എലീന പടിക്കല്‍, ആര്‍ജെ രഘു തുടങ്ങിയവരാണ് കമന്റുകളുമായി എത്തിയത്. ഓ മൈ ഗോഡ്, ഞങ്ങള്‍ക്ക് ഇപ്പോള്‍ കടുത്ത മത്സരമുണ്ട് എന്നാണ് ആര്യ കുറിച്ചത്. റോക്കിംഗ് എന്ന് ആര്‍ജെ രഘുവും രാജിനി ചാണ്ടിയുടെ ചിത്രങ്ങള്‍ക്ക് താഴെയായി കുറിച്ചിരിക്കുന്നു. ബിഗ് ബോസ് താരങ്ങള്‍ക്ക് പുറമെ ആരാധകരും കമന്റുകളുമായി എത്തിയിരുന്നു. എല്ലാവരും നന്നായിട്ടുണ്ട്, പൊളിച്ചു എന്നൊക്കെയാണ് രാജിനി ചാണ്ടിയുടെ പോസ്റ്റിന് താഴെ കമന്റ് ചെയ്തിരിക്കുന്നത്.