'പതിനേഴാം വയസിൽ കുഴിച്ച് മൂടിയ സ്വപ്നങ്ങളുടെ പുനർജന്മം'; ഓർമകൾ പൊടി തട്ടിയെടുത്ത് ബി​ഗ് ബോസ് താരം ശാലിനി!

ബി​ഗ് ബോസ് വീട്ടിൽ അധിക നാൾ‌ നിൽക്കാൻ കഴിഞ്ഞില്ലെങ്കിലും കുറഞ്ഞ സമയത്തിനുള്ളിൽ തനിക്ക് വേണ്ട ആരാധകരെ ശാലിനി സമ്പാദിച്ചിരുന്നു. ബി​ഗ് ബോസ് സീസൺ ഫോർ പോലെ ഓളം സൃഷ്ടിച്ച മറ്റൊരു സീസണുമില്ല. സീസൺ ഫോർ അവസാനിച്ചിട്ടും ഇപ്പോഴും ഷോയിലെ മത്സരാർഥികളും അവരുമായി ബന്ധപ്പെട്ട വിശേഷങ്ങളും ലൈവായി തുടരുകയാണ് പ്രേക്ഷകർക്ക് ഇടയിൽ.

പതിനേഴ് പേർ ആദ്യ ദിവസവും മറ്റ് മൂന്ന് പേർ പല ഇടവേളകളിൽ വൈൽഡ് കാർഡ് എൻട്രിയായി വീട്ടിലേക്ക് പോയിയുമാണ് നാലാം സീസണിൽ മത്സരിച്ചത്. സീസൺ ഫോർ അവസാനിച്ച് മാസങ്ങൾ പിന്നിടുമ്പോൾ പഴയ ഓർമകൾ പൊടി തട്ടിയെടുത്ത് ശാലിനി നായർ പങ്കുവെച്ച കുറിപ്പാണ് ഇപ്പോൾ വൈറലാകുന്നത്.

'ചില ഓർമ്മകൾ ഇടക്കൊന്ന് പൊടി തട്ടി എടുക്കുന്നത് നല്ലതല്ലേ.. ഒരു കുഞ്ഞു ഫ്ലാഷ് ബാക്ക്.. ചിങ്ങ മാസത്തിലെ അശ്വതി നക്ഷത്രത്തിൽ ജനിച്ച കുട്ടി... ഗവണ്മെന്റ് ഉദ്യോഗം ണ്ട് ജാതകത്തില്.... അന്നത്തെ എംബ്രാന്തിരി ഗണിച്ച് നോക്കി പറഞ്ഞതാത്രേ... പലകേല് കണ്ട യോഗൊന്നും ഇണ്ടായില്ല്യ ജാതകക്ക്.'

'പക്ഷെ എവിടെയോ ഒരു തിരി നാളം അണയാതെ ഉണ്ടെന്ന പ്രതീക്ഷയിൽ അവൾ തുഴഞ്ഞുകൊണ്ടേയിരുന്നു. അര മണിക്കൂർ നേരമുള്ള ഒരു ചെറിയ പ്രോഗ്രാമിന് അവസരം ചോദിച്ച് വിളിച്ചവൾക്ക് കിട്ടിയത് സ്വപ്നം പോലും കാണാൻ കഴിയാത്ത അത്ര വലിയ അവസരമായിരുന്നു. ഒരിക്കലെങ്കിലും തലയുയർത്തി പിടിച്ച് നിൽക്കാനുള്ള അവസരം.'

'പതിനേഴ് വയസിൽ കുഴിച്ച് മൂടേണ്ടി വന്ന സ്വപ്നങ്ങളുടെ പുനർജന്മം.... തന്നിലൂടെ കുഞ്ഞും കുടുംബവും കൂടപ്പിറപ്പും രക്ഷപ്പെടാൻ പോവുന്നതിന്റെ സന്തോഷം. എല്ലാം മുറുകെ ചേർത്ത് പിടിച്ച് പെട്ടി എടുത്ത് യാത്ര തിരിച്ചു.'

'നമ്മൾ നമ്മളായി നിൽക്കേണ്ടത് വളരെ ചുരുക്കം സന്ദർഭങ്ങളിൽ മാത്രമാണെന്ന് തിരിച്ചറിഞ്ഞ നാളുകൾ. സ്വപ്‌നങ്ങളുടെ ഭാരം താങ്ങിയുള്ള യാത്രക്കിടയിൽ വന്ന് ചേർന്ന ഭാഗ്യം കൈ വഴുതി വീണുപോയി. പക്ഷെ അതും ഒരു പാഠമായിരുന്നു.'

'ഇനി ഒരു ശാലിനി നിങ്ങളിൽ നിന്നുണ്ടാവുമെങ്കിൽ തരാൻ ഒരേ ഒരു ഉപദേശം മാത്രം നിങ്ങൾ നിങ്ങളായിരിക്കേണ്ടത് നിങ്ങളിൽ മാത്രമാവണം. മുഖം മൂടി നല്ലതാണ് പല കാഴ്ചകളേയും കണ്ണുകളേയും മറക്കാൻ... അതേസമയം ഞാനിപ്പോൾ ഹാപ്പിയാണ്.'

'കരുതലും കരുത്തും തന്ന് കൂടെ നിൽക്കുന്ന എല്ലാവർക്കും നന്ദി' ശാലിനി കുറിച്ചു. ബി​ഗ് ബോസിന് ശേഷം സ്റ്റേജ് ഷോകളും ടെലിവിഷൻ പ്രോ​ഗ്രാമുകളുമെല്ലാമായി ശാലിനി തിരക്കിലാണ്. സീസൺ ഫോറിൽ വിജയിയായത് ദിൽഷ പ്രസന്നനായിരുന്നു.