ബിഗ് ബോസിലേക്ക് വരുന്നോ? ആറാം സീസണില്‍ പങ്കെടുക്കാന്‍ ആഗ്രഹിക്കുന്നവരോട് മുൻ മത്സരാര്‍ഥി ശാലിനി ചോദിക്കുന്നു

കേരളത്തിലും ബിഗ് ബോസ് ഷോ വലിയ തരംഗമായി കഴിഞ്ഞിരിക്കുകയാണ്. ഷോ യിലൂടെ വരുന്നവരെല്ലാം പ്രശസ്തിയിലേക്ക് എത്തുന്നു എന്നതാണ് പലരെയും ആകര്‍ഷിക്കുന്നത്. ഇതിനൊപ്പം സാമ്പത്തികമായിട്ടും മെച്ചപ്പെടാന്‍ സാധിക്കുമെന്ന് വന്നതോടെ ബിഗ് ബോസില്‍ പങ്കെടുക്കാനുള്ള ആഗ്രഹം പലര്‍ക്കും ഉണ്ടാവും.

അങ്ങനെ ആഗ്രഹിക്കുന്നവര്‍ക്ക് അതിനുള്ള അവസരമുണ്ടെന്ന് പറയുകയാണ് വിജെ ശാലിനി. മുന്‍ബിഗ് ബോസ് താരവും നടിയും അവതാരകയുമായ ശാലിനി സോഷ്യല്‍ മീഡിയ പേജിലൂടെ ബിഗ് ബോസിനെ പറ്റിയുള്ള വിശേഷങ്ങള്‍ പങ്കുവെക്കാറുണ്ട്. അത്തരത്തില്‍ പുതിയൊരു വിവരവുമായിട്ടാണ് നടി എത്തിയിരിക്കുന്നത്.

സാധാരണക്കാര്‍ക്കും അല്ലാത്തവര്‍ക്കും ബിഗ് ബോസിലേക്ക് പോകാന്‍ ആഗ്രഹമുണ്ടെങ്കില്‍ ചെയ്യേണ്ടത് എന്താണെന്നാണ് ശാലിനി ഇന്‍സ്റ്റാഗ്രാമിലൂടെ പങ്കുവെച്ച കുറിപ്പിലൂടെ പറയുന്നത്. മാത്രമല്ല ഇതിന്റെ കൂടുതല്‍ വിശേഷങ്ങള്‍ തന്റെ യൂട്യൂബ് ചാനലില്‍ ഉണ്ടാവുമെന്നും താരം സൂചിപ്പിച്ചിരുന്നു. നടിയുടെ പോസ്റ്റിന്റെ പൂര്‍ണരൂപം വായിക്കാം...

'വരുന്നോ.. ബിഗ് ബോസിലേക്ക്. ഏഷ്യാനെറ്റ് സ്റ്റാര്‍ കമ്മ്യൂണിക്കേഷന്‍സും എന്റമോള്‍ഷൈന്‍ മീഡിയയും അവതരിപ്പിക്കുന്ന ഇന്ത്യയിലെ ഏറ്റവും വലിയ റിയാലിറ്റി ഷോ ബിഗ് ബോസ് മലയാളം സീസണ്‍ 6 നുള്ള ആദ്യ ഘട്ട അഭിമുഖങ്ങള്‍ക്ക് ഇന്ന് തുടക്കം കുറിച്ചിരുന്നു. ഇത്തവണയും ഹോട്ട്സ്റ്റാറിലൂടെ 24 മണിക്കൂറും ഷോ സംപ്രേഷണം ചെയ്യുന്നു.

സൂം മീറ്റ് വഴി നടത്തുന്ന ഓഡിഷനിലേക്ക് പങ്കെടുക്കുവാന്‍ ഇതിനോടകം തന്നെ നിരവധി അപേക്ഷകളാണ് ചാനലിലെത്തിയതെന്ന് അറിയാന്‍ കഴിയുന്നു. കഴിഞ്ഞ അഞ്ചു സീസണുകളില്‍ പങ്കെടുക്കുവാന്‍ ശ്രമിച്ചവര്‍, സമൂഹത്തിലെ തുല്യതക്ക് തങ്ങളും അര്‍ഹരാണെന്ന് തെളിയിച്ചവര്‍, 100 ദിവസത്തേക്കുള്ള വസ്ത്രങ്ങളും പെട്ടിയും പാക്ക് ചെയ്ത് ഷോ തുടങ്ങുന്നതിന് ഒരു ദിവസം മുന്‍പ് വരെ കാത്തിരുന്ന് നിരാശയോടെ ആറാം സീസണിന്റെ വരവ് കാത്തിരുന്നവര്‍,

സാധാരണക്കാരനും പങ്കെടുക്കുവാന്‍ അവസരം നല്‍കുന്ന കോമണര്‍ എന്‍ട്രി കോളിന് വെയ്റ്റ് ചെയ്യുന്നവര്‍ എന്നിങ്ങനെയുള്ള ആയിരക്കണക്കിന് പേരില്‍ നിന്നും ആരൊക്കെയാവും ആറാം സീസണിലെ പുതിയ താരങ്ങള്‍ കാത്തിരുന്ന് കാണാം. ബിഗ് ബോസ് സീസണ്‍ 6 ഒരുക്കങ്ങള്‍ 'തത്സമയം ശാലിനി'യിലൂടെ പങ്കുവെക്കുന്നു'... എന്നുമാണ് ശാലിനി പങ്കുവെച്ച കുറിപ്പില്‍ പറയുന്നത്.

ഈ വര്‍ഷവും കോമണേഴ്‌സ് ഉണ്ടാവുമോ എന്ന ചോദ്യങ്ങളാണ് കൂടുതല്‍ പേരും ചോദിച്ചിരിക്കുന്നത്. ഉണ്ടാവാന്‍ സാധ്യതയുണ്ടെന്ന് ശാലിനി പറയുന്നു. പോകാന്‍ താല്‍പര്യം ഉണ്ടെന്നും അതിനെന്താണ് ചെയ്യേണ്ടതെന്ന് ചോദിക്കുന്നവര്‍ക്കുള്ള മറുപടിയും ശാലിനി നല്‍കിയിരുന്നു.

'എല്ലാവര്‍ക്കും വേണ്ടി ഒരു റിപ്ലേ തരുകയാണ്. ഈ സീസണില്‍ കയറണം എന്ന് തീവ്രമായി ആഗ്രഹിക്കുന്നുണ്ടെങ്കില്‍ അതിനുള്ള ശ്രമങ്ങള്‍ കഴിഞ്ഞ സീസണ്‍ അവസാനിക്കുന്നതോടെ തന്നെ തുടങ്ങേണ്ടതാണ്. നിരവധി പേരില്‍ നിന്നും തിരഞ്ഞെടുത്ത ചിലര്‍ക്ക് ഓഡിഷന്‍ നടന്നു കൊണ്ടിരിക്കുന്നു. ഓരോ വര്‍ഷവും ഷോയിലേക്ക് പങ്കെടുക്കുവാന്‍ നമ്മളും അര്‍ഹരാണെന്ന് ചാനലിന് ബോധ്യമാവും വിധം സോഷ്യല്‍ മീഡിയ പ്രൊഫൈളുകളും മെയിന്റൈന്‍ ചെയ്യണമല്ലോ.

മെസേജ് ആരുടെയെങ്കിലും കാണാതെ പോയിട്ടുണ്ടെങ്കില്‍ ഒരു സ്റ്റോറി മെന്‍ഷന്‍ ചെയ്ത് ഇട്ടാല്‍ മതി, തീര്‍ച്ചയായും റിപ്ലൈ ചെയ്യാം. നല്ല പ്രൊഫൈലുകള്‍ ഉറപ്പായും ചാനലിന് ഫോര്‍വേഡ് ചെയ്യാറുണ്ട്. ശ്രമം കുറച്ചു കൂടി നേരത്തെ ആവേണ്ടതാണ് എന്ന് ഓര്‍മിപ്പിക്കുന്നു. കഴിഞ്ഞ സീസണ്‍ തുടങ്ങുന്നതിനു മുന്‍പേ മുതല്‍ ഒരവസരത്തിനു വേണ്ടി കാത്തിരുന്നവര്‍ക്ക് ആ പരിശ്രമത്തിന്റെ ഫലത്തിന് ഈ സീസണിലേക്കുള്ള ഓഡിഷന്‍ കോള്‍ വരുന്നത് വരെ കാത്തിരിക്കേണ്ടി വന്നു.

ശ്രമിക്കൂ.. കഠിന പ്രയത്‌നവും പരിശ്രമവും പ്രതീക്ഷയോടെയുള്ള കാത്തിരിപ്പും ഒരിക്കലും വിഫലമാവില്ല സ്വപ്നസാക്ഷാല്‍ക്കാരത്തിലേക്ക് ഇനിയും കുറച്ച് ദൂരം കൂടിയേ ബാക്കിയുള്ളൂ. പിന്‍തിരിയരുത്. മുന്നോട്ട്.. നിങ്ങള്‍ക്കൊരു സ്വപ്‌നം ഉണ്ടെങ്കില്‍ ധൈര്യത്തോട് കൂടി പോയി അത് സ്വന്തമാക്കുക.. എന്നും ശാലിനി പറയുന്നു.