'നിലാ ശ്രീനിഷ്', മകളുടെ പേര് പറഞ്ഞ് പേളിയും ശ്രീനിഷും, നൂല് കെട്ട് ചിത്രം പങ്കുവെച്ച് താരം

വളരെ കുറച്ച് ചിത്രങ്ങള്‍ മാത്രമാണ് കുഞ്ഞിന്‌റെതായി പേളി ഇതുവരെ പങ്കുവെച്ചത്. ഇതെല്ലാം നിമിഷനേരംകൊണ്ട് സോഷ്യല്‍ മീഡിയയില്‍ വൈറലാവുകയും ചെയ്തിരുന്നു. അതേസമയം കുഞ്ഞിന്‌റെ നൂലുകെട്ട് വിശേഷം പങ്കുവെച്ചുളള പേളിയുടെയും ശ്രീനിഷിന്‌റെയും പുതിയ ഇന്‍സ്റ്റഗ്രാം പോസ്റ്റും ഏറ്റെടുത്തിരിക്കുകയാണ് ആരാധകര്‍. കുഞ്ഞിനൊപ്പമുളള ചിത്രം പങ്കുവെച്ച താരദമ്പതികള്‍ മകളുടെ പേര് ആദ്യമായി പുറത്തുവിട്ടു.

നിലാ ശ്രീനിഷ് എന്നാണ് മകള്‍ക്ക് പേളിയും ശ്രീനിഷും പേരിട്ടത്. അവള്‍ എത്തി 28 ദിവസമായി, അവള്‍ ഞങ്ങളുടെ ജീവിതത്തെ സന്തോഷകരവും മനോഹരവുമാക്കി. മമ്മിയും ഡാഡിയും അവളെ വളരെയധികം സ്‌നേഹിക്കുന്നു, ഒരുമിച്ച് ഒരു സാഹസിക ജീവിതത്തിനായി കാത്തിരിക്കുന്നു എന്നാണ് പേളി മകളുടെ പുതിയ ചിത്രത്തിനൊപ്പം ഇന്‍സ്റ്റഗ്രാമില്‍ കുറിച്ചത്.

അതേസമയം പേളിയുടെ പുതിയ പോസ്റ്റിന് പിന്നാലെ അടുത്ത സുഹൃത്തായ ഷിയാസ് കരീം ഉള്‍പ്പെടെയുളളവര്‍ കമന്റുകളുമായി എത്തിയിരുന്നു. മുന്‍പ് മകളെ തൊട്ടിലില്‍ കിടത്തിയുളള ഒരു ചിത്രവും പേളി സോഷ്യല്‍ മീഡിയയില്‍ പങ്കുവെച്ചിരുന്നു. പേളിയുടെ മകളുടെ വിശേഷങ്ങള്‍ അറിയാന്‍ ആരാധകരും കാത്തിരിക്കാറുണ്ട്. ഇന്‍സ്റ്റഗ്രാം പേജിന് പുറമെ യൂടൂബ് ചാനലിലൂടെയും തന്‌റെ പുതിയ വിശേഷങ്ങള്‍ അറിയിച്ച് പേളിയും ശ്രീനിഷും എത്താറുണ്ട്.

വിവാഹ ശേഷവും മിനിസ്‌ക്രീന്‍ രംഗത്ത് തിരിച്ചെത്തിയിരുന്നു പേളി. ഒരു തമിഴ് ഡാന്‍സ് റിയാലിറ്റി ഷോയില്‍ അവതാരകയായ താരം പിന്നീട് മലയാളത്തിലും എത്തുകയായിരുന്നു. സീ കേരളത്തില്‍ ഫണ്ണി നൈറ്റ്‌സ് വിത്ത് പേളി മാണി എന്ന പ്രോഗ്രാമാണ് നടി ചെയ്തത്. പിന്നീട് ഗര്‍ഭിണിയായ ശേഷം ഒരിടവേളയെടുക്കുകയായിരുന്നു താരം. ശ്രീനിഷും മിനിസ്‌ക്രീന്‍ രംഗത്ത് സജീവമാണ്. മലയാളം, തെലുങ്ക് ഭാഷകളിലെ സീരിയലുകളിലൂടെയാണ് താരം എത്താറുളളത്. കഴിഞ്ഞ വര്‍ഷമാണ് പേളിമാണിയുടെ ആദ്യ ബോളിവുഡ് ചിത്രം പുറത്തിറങ്ങിയത്. ലൂഡോ എന്ന ചിത്രത്തില്‍ ഒരു മലയാളി നേഴ്‌സായാണ് താരം എത്തിയത്.