അവരെല്ലാം തിരിച്ചെത്തും! കണ്ണിന് അസുഖം ബാധിച്ചവരെക്കുറിച്ച് ബിഗ് ബോസ് അണിയറപ്രവര്‍ത്തകര്‍!

തിരിച്ചുവരുമോ?

കണ്ണിന് അസുഖം ബാധിച്ചതിനെത്തുടര്‍ന്ന് ബിഗ് ബോസില്‍ നിന്നും മാറി നില്‍ക്കുന്നവര്‍ തിരിച്ചെത്തുമോയെന്ന തരത്തിലുള്ള ചര്‍ച്ചകള്‍ ഇപ്പോഴും സജീവമാണ്. പരീക്കുട്ടിക്കായിരുന്നു ആദ്യം അസുഖം വന്നത്. പകരാന്‍ സാധ്യതയുണ്ടെന്നും വേണ്ടത്ര മുന്‍കരുതലുകള്‍ സ്വീകരിക്കണമെന്നും അണിയറപ്രവര്‍ത്തകര്‍ അറിയിച്ചിരുന്നു. ഡോക്ടര്‍മാര്‍ ബിഗ് ഹൗസിലെത്തി പരിശോധന നടത്തിയിരുന്നു. രഘുവിന് അസുഖം ബാധിച്ചതിന് പിന്നാലെയായാണ് അലക്‌സാന്‍ഡ്ര, സുജോ മാത്യു, രേഷ്മ, പവന്‍ ജിനോ തോമസ് ഇവര്‍ക്കും അസുഖം പകര്‍ന്നത്. ഇവരെയും മാറ്റുകയായിരുന്നു പിന്നീട്. എലീനയും ദയ അശ്വതിയുമായിരുന്നു ഒടുവിലായി പുറത്തേക്ക് പോയവര്‍. പുറത്തുപോയവര്‍ ബിഗ് ഹൗസിലേക്ക് തിരിച്ചെത്തുമോയെന്ന തരത്തിലെ ചര്‍ച്ചകള്‍ ഇപ്പോഴും സജീവമാണ്.

അടുത്തയാഴ്ച എത്തും

കണ്ണിന് അസുഖം ബാധിച്ചതിനെത്തുടര്‍ന്നാണ് അവരെ ബിഗ് ബോസ് ഹൗസില്‍ നിന്നും മാറ്റിയത്. മറ്റുള്ളവര്‍ക്ക് പകരാന്‍ സാധ്യതയുള്ള അസുഖമായതിനാലാണ് മത്സരാര്‍ത്ഥികളെ മാറ്റിത്താമസിപ്പിച്ചത്. അവര്‍ ഇപ്പോഴും ചികിത്സയിലാണ്. വേണ്ടത്ര ചികിത്സ അവര്‍ക്ക് അനുവദിച്ചിട്ടുണ്ട്. അസുഖം കാരണം പുറത്തേക്ക് പോയവര്‍ അടുത്തയാഴ്ച ബിഗ് ബോസ് ഹൗസിലേക്ക് തിരിച്ചെത്തുമെന്നുമാണ് അണിയറപ്രവര്‍ത്തകര്‍ വ്യക്തമാക്കിയിട്ടുള്ളത്.

എലീനയുടെ അമ്മ പറഞ്ഞത്

അടുത്തിടെ എലീനയും ദയയുമായിരുന്നു പരിപാടിയില്‍ നിന്നും പുറത്തേക്ക് പോയത്. എലീനയെ മിസ്സ് ചെയ്യുന്നുവെന്ന് മഞ്ജുവും ഫുക്രുവും ആര്യയും വീണയുമൊക്കെ പറഞ്ഞിരുന്നു. അവള്‍ ഇപ്പോഴും ചെന്നൈയില്‍ ചികിത്സയിലാണുള്ളത്. കോഓര്‍ഡിനേറ്റര്‍മാരെ വിളിച്ചാണ് അവളുടെ ആരോഗ്യത്തെക്കുറിച്ച് അറിയുന്നത്. അടുത്തയാഴ്ച അവള്‍ പരിപാടിയിലേക്ക് തിരിച്ചെത്തുമെന്നാണ് കരുതുന്നതെന്നുമായിരുന്നു എലീനയുടെ അമ്മ പ്രതികരിച്ചത്.

വൈല്‍ഡ് കാര്‍ഡ് എന്‍ട്രി

പുറത്തുള്ളവര്‍ അകത്തേക്ക് എത്തുന്നതിനെക്കുറിച്ച് വ്യത്യസ്തമായ അഭിപ്രായങ്ങളാണ് ഉയര്‍ന്നുവന്നിട്ടുള്ളത്. നിയമവിരുദ്ധമായിരിക്കും അവരുടെ എന്‍ട്രിയെന്നാണ് താന്‍ വിശ്വസിക്കുന്നതെന്ന് ഷിയാസ് പറയുന്നു. പുറത്ത് എന്താണ് നടക്കുന്നതെന്ന കാര്യത്തെക്കുറിച്ച് അവര്‍ മനസ്സിലാക്കിക്കഴിഞ്ഞു. ഇനി അവര്‍ വരുമ്പോള്‍ അതേക്കുറിച്ച് അവര്‍ അകത്തുള്ളവരെ അറിയിക്കും. അതോടെ ഗെയിം പ്ലാന്‍ മാറ്റുകയും ചെയ്യും. യോഗ്യരായവരെ വൈല്‍ഡ് കാര്‍ഡ് എന്‍ട്രിയിലൂടെ കൊണ്ടുവരുന്നതെന്നാണ് നല്ലതെന്നും ഷിയാസ് പറയുന്നു.