ക്ഷമ പറഞ്ഞ് മോഹന്‍ലാല്‍! അങ്ങനെയല്ല ഉദ്ദേശിച്ചത്! ഗാനവിവാദത്തില്‍ വിശദീകരണവുമായി താരം!

ധര്‍മ്മജന്‍റെ പാട്ട്

ഇടയ്ക്ക് ബിഗ് ഹൗസിലേക്ക് ധര്‍മ്മജന്‍ എത്തിയിരുന്നു. മത്സരിക്കാനായാണ് താരമെത്തിയതെന്നാണ് അകത്തുള്ളവരുടെ വിചാരം. എല്ലാവരുടേയും ക്ഷേമം അന്വേഷിക്കാനും അവര്‍ക്കൊപ്പം കുറച്ച് സമയം ചെലവഴിക്കാനുമായാണ് ധര്‍മ്മജനെ അങ്ങോട്ടേക്ക് വിട്ടതെന്നായിരുന്നു മോഹന്‍ലാല്‍ പറഞ്ഞത്. ബിഗ് ഹൗസില്‍ നിന്നും തിരികെ തനിക്കരികിലേക്കെത്തിയപ്പോള്‍ താരത്തോട് ഒരു പാട്ട് പാടാനായി മോഹന്‍ലാല്‍ പറഞ്ഞിരുന്നു. മാതളേത്തനുണ്ണാന്‍ എന്ന ഗാനമായിരുന്നു ധര്‍മ്മജന്‍ ആലപിച്ചത്.

ഞാന്‍ പാടിയ പാട്ട്

പാട്ട് കഴിഞ്ഞതിന് പിന്നാലെയായാണ് മോഹന്‍ലാല്‍ ഇത് ഞാന്‍ പാടിയ പാട്ടാണെന്നും ഉയരും ഞാന്‍ നാടാകെ എന്ന ചിത്രത്തിലെ ഗാനമാണെന്നും പറഞ്ഞത്. വിടി മുരളിയുടെ പ്രശസ്തമായ ഗാനങ്ങളിലൊന്നാണ് ഇത്. മോഹന്‍ലാല്‍ താനാണ് ഈ ഗാനം പാടിയതെന്ന് പറഞ്ഞതിനെതിരെ പരസ്യമായി അദ്ദേഹവും രംഗത്തെത്തിയിരുന്നു. എന്തിനാണ് ഈ ക്രഡിറ്റും താരത്തിന് എന്ന തരത്തിലായിരുന്നു സോഷ്യല്‍ മീഡിയയിലെ ചര്‍ച്ചകള്‍. നിരവധി പേരായിരുന്നു ഇക്കാര്യത്തില്‍ അഭിപ്രായം രേഖപ്പെടുത്തി എത്തിയത്.

വന്‍വിവാദമായി മാറി

സംഭവം വന്‍വിവാദമായി മാറിയിരുന്നു. പാവപ്പെട്ട ഗായകന്‍റെ ചട്ടിയിലും കൈയ്യിട്ട് വാരുന്ന കംപ്ലീറ്റ് ആക്ടറെന്നായിരുന്നു പ്രധാന വിമര്‍ശനം. താന്‍ പാടി എന്ന് പറഞ്ഞത് താന്‍ അഭിനയിച്ച എന്നര്‍ത്ഥത്തിലാണെന്നായിരുന്നു ഒരു വിഭാഗം പറഞ്ഞത്. സംഭവം വന്‍വിവാദമായി മാറിയതോടെയാണ് മോഹന്‍ലാല്‍ തന്നെ ഇതേക്കുറിച്ച് വിശദീകരിച്ചത്. കഴിഞ്ഞ ദിവസത്തെ എപ്പിസോഡിനിടയിലായിരുന്നു അദ്ദേഹം ഇതേക്കുറിച്ച് വിശദീകരിച്ചത്. ക്ഷമ ചോദിച്ച താരത്തിന് കൈയ്യടിയുമായി ആരാധകരും എത്തിയിട്ടുണ്ട്.

പാടി അഭിനയിച്ചു

കഴിഞ്ഞയാഴ്ച ഞാന്‍ ഒരാളോട് ഒരു പാട്ട് പാടാന്‍ പറഞ്ഞു. അപ്പോള്‍ അദ്ദേഹം ഒരു പാട്ട് പാടി. പക്ഷേ ആ പാട്ട് ഏത് സിനിമയിലെ ആണെന്നോ ആരാണ് പാടിയതെന്നോ (അദ്ദേഹത്തിന്) അറിയില്ലായിരുന്നു. അപ്പോള്‍ ഞാന്‍ പറഞ്ഞു, ഇത് എന്റെ സിനിമയിലേത് ആണ്. ഞാന്‍ പാടിയ പാട്ടാണെന്ന്. അങ്ങനെ പറഞ്ഞാല്‍ ഞാന്‍ പാടി അഭിനയിച്ചു എന്നാണല്ലോ ഞാന്‍ അര്‍ഥമാക്കുന്നത്. അത് 38 വര്‍ഷം മുന്‍പുള്ള ഒരു സിനിമയാണ്. പക്ഷേ ഒരുപാട് പേര്‍ അത് തെറ്റിദ്ധരിച്ചു, ഞാന്‍ പാടിയ പാട്ടാണെന്ന്.

തെറ്റിദ്ധാരണയ്ക്ക് ക്ഷമ

അങ്ങനെ തെറ്റിദ്ധരിച്ചവരോട് പറയാം, ഞാന്‍ അങ്ങനെയല്ല അര്‍ഥമാക്കിയത്. ഞാന്‍ പാടി അഭിനയിച്ചു എന്നാണ് ഉദ്ദേശിച്ചത്. കാരണം ഞാന്‍ ഒരു പാട്ടുകാരനല്ല. അങ്ങനെ ആ തെറ്റിദ്ധാരണ ഉണ്ടായതില്‍, അങ്ങനെ ആര്‍ക്കെങ്കിലും ഉണ്ടെങ്കില്‍ ഞാന്‍ അതിന് സോറി പറയുന്നുവെന്നായിരുന്നു മോഹന്‍ലാല്‍ പറഞ്ഞത്.