ബിഗ് ബോസ് സീസൺ 3യ്ക്ക് ഫിനാലെ ഉണ്ടാകുമോ, ഷോയെ കുറിച്ചുള്ള പുതിയ വിവരവുമായി രേവതി

ഇപ്പോൾ സോഷ്യൽ മീഡിയയിൽ വൈറലാകുന്നത് ബിഗ് ബോസ് ഫിനാലെയെ കുറിച്ചാണ്. വ്ലോഗർ രേവതിയാണ് ഇതുസംബന്ധമായ വാർത്ത പുറത്ത് വിട്ടിരിക്കുന്നത്. ജൂൺ മാസത്തിൽ തന്നെ ഫിനാലെ ഉണ്ടാകുമെന്നാണ് തന്റെ യൂട്യൂബ് ചാനലിലൂടെ പറയുന്നത്. ജൂൺ 14 ന് ഫിനാലെ ഉണ്ടാകുമെന്നാണ് തനിക്ക് ലഭിച്ച വിവരത്തിന്റെ അടിസ്ഥാനത്തിൽ പറയുന്നത്. അതേസമയം ലോക്ക് ഡൗൺ പ്രഖ്യാപിച്ചിരിക്കുന്നതുകൊണ്ട് കൃത്യമായി പറയാൻ സാധിക്കില്ലെന്നും പറയുണ്ട്.

കേരളത്തിൽ മാത്രമല്ല ചെന്നൈയിലും ലോക്ക് ഡൗൺ നീട്ടിയിരിക്കുകയാണ്. അവതാരകനായ മോഹൻലാൽ ഇപ്പോൾ ചെന്നൈയിലാണുള്ളത്. അദ്ദേഹത്തിന് കേരളത്തിൽ എത്താനുള്ള ബുദ്ധുമുട്ടു ഷോ നീണ്ടു പോകുന്നതിന് പിന്നിലുണ്ട്. കേരളത്തിൽ വെച്ച് തന്നെയാകും ബിഗ് ബോസ് സീസൺ 3യുടെ ഫിനാലെ നടക്കുക. എന്നാൽ വേദിയുടെ കാര്യത്തിൽ ഇപ്പോഴും തീരുമാനമായിട്ടില്ല. അൽ സാജിൽ വെച്ച് ഫിനാലെ നടത്തുമെന്നുള്ള റിപ്പോർട്ടുകൾ പുറത്തു വന്നിരുന്നു. എന്നാൽ ലോക്ക് ഡൗണിനെ തുടർന്ന് ഷൂട്ടിങ്ങുകൾ നിർത്തിവെച്ചിരിക്കുകയാണ്. സർക്കാർ നിർദ്ദേശം ലഭിച്ചാൽ മാത്രമേ ചിത്രീകരണം സാധ്യമാകുകയുള്ളൂ. അൽ സാജ് ഇന്റർനാഷണൽ കൺവെൻഷൻ സെന്റർ കൂടാതെ ഏഷ്യനെറ്റ് സ്റ്റുഡിയോയിൽ വെച്ച് ഫിനാലെ ചിത്രീകരിക്കുമെന്നുളള റിപ്പോർട്ടുകളും പ്രചരിക്കുന്നുണ്ട്.

ഫിനാലെ നീണ്ടു പോകുന്നത് കൊണ്ട് തന്നെ മത്സരാർഥികൾക്ക് മറ്റു വർക്കുകളിൽ കമിറ്റ് ചെയ്യാൻ സാധിക്കുന്നില്ല. ഫൈനൽ 8 ലുള്ള ഭൂരിഭാഗം മത്സരാർഥികളും അഭിനേതാക്കാളാണ്. ഷോ അവസാനിച്ചതിന് ശേഷം മാത്രമേ ഇവർക്ക് മറ്റ് ചാനൽ പരിപാടികളിലും മറ്റും പങ്കെടുക്കാൻ സാധിക്കുകയുള്ളൂ. ഇതും ഫിനാലെ നീണ്ടു പോകുന്നതിലൂടെ ഉണ്ടാകുന്ന മറ്റൊരു പ്രശ്നമാണ്. എന്നിരുന്നാലും സോഷ്യൽ മീഡിയയിൽ സജീവമാണ് താരങ്ങൾ. തങ്ങളുടെ ലോക്ക് ഡൗൺ വിശേഷങ്ങളും മറ്റും പങ്കുവെച്ച് രംഗത്ത് എത്താറുണ്ട്.

ഫൈനൽ വോട്ടിങ്ങ് അവസാനിച്ചതിന് പിന്നാലെ തന്നെ അനൗദ്യോഗികമായ വോട്ടിങ്ങ് റിപ്പോർട്ടുകൾ സോഷ്യൽ മീഡിയയിൽ വൈറലാകുന്നുണ്ട്. മണിക്കുട്ടൻ വിജയിയാകുമെന്നാണ് അധികം പേരും പറയുന്നത്. രണ്ടാം സ്ഥാനത്ത് സായിയുടെ പേരാണ് ഉയർന്ന് കേൾക്കുന്നത്. ബാക്കിയുള്ള സ്ഥാനങ്ങളെ കുറിച്ച് വ്യത്യസ്തമായ റിപ്പോർട്ടുകളാണ് പ്രചരിക്കുന്നത്. ഫിനാലെ നടന്നാൽ മാത്രമേ കൃത്യമായ വിവരം അറിയാൻ സാധിക്കുകയുള്ളൂ.