'അംഗീകാരങ്ങൾ കിട്ടാതിരുന്നപ്പോൾ മനസ് മടുത്തിട്ടില്ല, കിട്ടിയപ്പോൾ മതിമറന്ന് പോയിട്ടുമില്ല'; മണിക്കുട്ടൻ

ബി​ഗ് ബോസ് സീസൺ മൂന്നിൽ വിജയിയായി ആ ട്രോഫി കൈയ്യിലേക്ക് വാങ്ങിയിട്ട് ഒരു വർഷം പൂർത്തിയായ സന്തോഷത്തിലാണ് ഇപ്പോൾ മണിക്കുട്ടൻ.

തന്റെ വിജയത്തിന്റെ ഒന്നാം വാർഷികത്തിൽ മനോഹരമായ ഒരു കുറിപ്പ് മണിക്കുട്ടൻ സോഷ്യൽമീഡിയയിൽ പങ്കുവെച്ചിട്ടുണ്ട്.

ആ കുറിപ്പാണ് ഇപ്പോൾ ശ്രദ്ധ നേടുന്നത്. 'പ്രേക്ഷകരുടെ മുന്നിൽ ബിഗ്‌ ബോസ് സീസൺ 3 വിന്നറായിട്ട് ഇന്ന് ഒരു വർഷം തികയുകയാണ്. പ്രിയപ്പെട്ട പ്രേക്ഷകരുടെ മനസിന്റെ നന്മയുടെ വിജയമായി അന്നും ഇന്നും ഞാൻ അതിനെ കാണുന്നു.'

'പതിനാറ് വർഷത്തെ സിനിമാ ജീവിതത്തിൽ അംഗീകാരങ്ങൾ കിട്ടാതിരുന്ന അവസരങ്ങളിൽ മനസ് മടുത്തിട്ടില്ല അതുകൊണ്ട് തന്നെ ഒരു അംഗീകാരം കിട്ടിയപ്പോൾ അതിലൊരിക്കലും മതിമറന്ന് പോയിട്ടുമില്ല.'

'അഭിനയ വിദ്യാർഥിയായ എനിക്ക് ഇനിയും മുമ്പത്തെക്കാൾ ഒരുപാട് അധ്വാനത്തിലൂടെ മുന്നോട്ട് യാത്ര ചെയ്യാനുണ്ട്. നിങ്ങളുടെ ജീവിതത്തിന്റെ തിരക്കുകൾക്ക് ഇടയിൽ തുടർന്നും സ്നേഹവും പ്രാർത്ഥനയും അനുഗ്രഹവും ഉണ്ടാകണം.'

എന്നാണ് മണിക്കുട്ടൻ സോഷ്യൽമീഡിയയിൽ കുറിച്ചത്. ഏറെ നാളായി സിനിമയിലും ടെലിവിഷൻ പരമ്പരകളിലും നിറഞ്ഞ് നിന്ന മണിക്കുട്ടന് കരിയർ ബ്രേക്കായിരുന്നു ബിഗ് ബോസ് സീസൺ മൂന്നിലേക്കുള്ള വരവ്.

പതിനാറ് വർഷത്തോളം കലാരംഗത്ത് നിന്ന് കണ്ടെത്താൻ കഴിയാതെ പോയ വലിയ സ്വപ്നങ്ങളിൽ പലതും മണിക്കുട്ടൻ ബി​ഗ് ബോസിലെത്തി സ്വന്തമാക്കി. പലപ്പോഴും മണിക്കുട്ടൻ പറഞ്ഞിട്ടുള്ള ആഗ്രഹങ്ങളിൽ ഒന്നായിരുന്നു സ്വന്തമായൊരു വീട് എന്നത്.

ആ സ്വപ്നവും മണിക്കുട്ടന് ബി​ഗ് ബോസിലൂടെ സാധിച്ചെടുക്കാൻ കഴിഞ്ഞു. 92001384 വോട്ടുകളാണ് ബി​ഗ് ബോസ് സീസൺ മൂന്നിന്റെ വിജയ കിരീടം നേടിയ മണിക്കുട്ടൻ സ്വന്തമാക്കിയത്.

വോട്ടിങ്ങിന്റെ തുടക്കം മുതലേയുള്ള മുന്നേറ്റം അവസാനം വരെ നിലനിര്‍ത്താൻ മണിക്കുട്ടന് സാധിച്ചിരുന്നു. സീസണിൽ ഏറെ ജനശ്രദ്ധ ലഭിച്ച താരം എന്ന ഖ്യാതി ഊട്ടിയുറപ്പിക്കുന്നത് കൂടിയായിരുന്നു താരത്തിന് ലഭിച്ച വോട്ടുകളുടെ എണ്ണം.

Recommended Video

Dilsha Interview: ഇനി രണ്ടുംകൽപ്പിച്ച് മുന്നോട്ട്, എന്റെ അച്ഛനെയും അമ്മയെയും വരെ വലിച്ചിഴച്ചു

60104926 വോട്ടുകളാണ് രണ്ടാം സ്ഥാനത്തിന് അർഹനായ സായ് വിഷ്ണു സ്വന്തമാക്കിയത്. മൂന്ന് കോടി വോട്ടുകളുടെ വ്യത്യാസമാണ് മണിക്കുട്ടനുമായി സായ് വിഷ്ണുവിന് ഉണ്ടായിരുന്നത്.

ബി​ഗ് ബോസിൽ നിന്നും ഇറങ്ങിയ ശേഷം മോഡലിങും അഭിനയവുമെല്ലാമായി തിരക്കിലാണ് മണിക്കുട്ടൻ. മുപ്പത്തിയറുകാരനായ മണിക്കുട്ടന്റെ ഏറ്റവും അവസാനം പുറത്തിറങ്ങിയ സിനിമ നവരസയായിരുന്നു.

കായകുളം കൊച്ചുണ്ണി എന്ന സീരിയലിലൂടെയാണ് ഇന്നും മണിക്കുട്ടനെ പ്രേക്ഷകർ ഓർമിക്കുന്നത്. കരിയറിൽ മണിക്കുട്ടന് വളർച്ച നൽകിയതും കായംകുളം കൊച്ചുണ്ണി സീരിയലായിരുന്നു.