'അത്യാ​ഗ്രഹിയായ റിയാസ് വലിയൊരു സീറോയാണ്, അത് പ്രേക്ഷകർക്കും മനസിലായി'; കുറ്റപ്പെടുത്തി ബ്ലെസ്ലിയും ദിൽഷയും!

കഴിഞ്ഞ ഒമ്പത് വർഷമായി ബി​ഗ് ബോസ് എന്ന റിയാലിറ്റി ഷോയുടെ വലിയ ആരാധകനായ റിയാസ് ജാസ്മിൻ പോയതോടെ ഹൗസിൽ തകർന്നിരിക്കുകയാണ്.

റോബിനും ബ്ലെസ്ലിയും ദിൽഷയുമാണ് ജാസ്മിൻ വാക്ക് ഔട്ട് നടത്താൻ കാരണക്കാർ എന്നാണ് റിയാസ് പറയുന്നത്. റിയാസ് വന്ന ശേഷമാണ് ഹൗസ് വലിയൊരു യുദ്ധക്കളമായി മാറിയത്.

ഇപ്പോൾ റിയാസിന്റെ സ്വഭാവത്തെ വിലയിരുത്തി അദ്ദേഹം വലിയൊരു സീറോയാണെന്നാണ് വീട്ടിലെ ചില മത്സരാർഥികൾ പറയുന്നത്.

മോഹൻലാൽ നൽകിയ ഒരു ടാസ്ക്കിന്റെ ഭാ​ഗമായി സംസാരിക്കവെയാണ് ബ്ലെസ്ലി അടക്കമുള്ളവർ റിയാസ് വലിയൊരു വട്ടപൂജ്യമാണെന്ന് പറഞ്ഞത്.

ഹീറോ സീറോ എന്ന ഒരു ഗെയിമാണ് മോഹൻലാൽ മത്സരാർഥികൾക്കായി നടത്തിയത്. ആരെയാണ് ഹീറോയായും ആരെയാണ് സീറോയായും പ്രേക്ഷകർ കരുതുന്നത് എന്നാണ് തോന്നുന്നത് എന്നായിരുന്നു മത്സരാർഥികൾ പറയേണ്ടിയിരുന്നത്.

ഓരോ മത്സരാർഥിയും ഹീറോ എന്ന് കരുതുന്ന ആളിന് കണ്ണടയുടെ ബാഡ്‍ജും സീറോ എന്ന് കരുതുന്ന ആൾക്ക് സീറോ ബാഡ്‍ജും കുത്തിക്കൊടുക്കുകയും വേണം. ആദ്യം അഭിപ്രായം പറയാനെത്തിയത് ബ്ലെസ്ലിയായിരുന്നു.

റിയാസാണ് സീറോ എന്നാണ് ബ്ലെസ്ലി പറഞ്ഞത്. റിയാസിനെ ഒരു അത്യാഗ്രഹിയായിട്ടാണ് കാണുന്നതെന്നും ബ്ലെസ്ലി കാരണമായി പറഞ്ഞു. ദിൽഷയെ ഹീറോയായി കാണുന്നുവെന്നും ബ്ലെസ്ലി വ്യക്തമാക്കി.

ദിൽഷ മറ്റുളളവരുടെ ഷാഡോയാണ് എന്ന് ചിലർ പറഞ്ഞപ്പോൾ അങ്ങനെയല്ലെന്ന് കഴിഞ്ഞ ഒരാഴ്ച കൊണ്ട് തെളിയിച്ചെന്നും ബ്ലെസ്ലി പറഞ്ഞു. ദിൽഷയും റിയാസിനാണ് സീറോ ബാഡ്ജ് നൽകിയകത്.

ഒരാളെ വേദനിപ്പിക്കുന്ന ഒരു വാക്ക് വായിൽ നിന്ന് വീഴരുത് എന്ന് വിചാരിക്കുന്ന വ്യക്തിയാണ് താനെന്നും മലയാളികളും അങ്ങനെ ആഗ്രഹിക്കുന്നവരാണെന്നും മലയാളികളുടെ കണ്ണിൽ ഒരു സീറോയാണ് റിയാസെന്നും ദിൽഷ പറഞ്ഞു.

ബ്ലെസ്ലി ചെയ്യുന്ന ചില കാര്യങ്ങൾ മറ്റുള്ളവർക്ക് തമാശയായി തോന്നിയേക്കാം. പ്രേക്ഷകർ അത് ആസ്വദിക്കുന്നുണ്ടെന്നും അതിനാൽ പ്രേക്ഷകരുടെ കണ്ണിൽ ബ്ലെസ്ലി ഒരു ഹീറോയാണെന്നും ദിൽഷ വ്യക്തമാക്കി.

ലക്ഷ്മിപ്രിയയും റിയാസിനാണ് സീറോ ബാഡ്ജ് കുത്തികൊടുത്തത്. കർത്താവേ ഇവൻ ചെയ്യുന്നത് എന്താണെന്ന് ഇവൻ അറിയുന്നില്ല... ഇവനോട് പൊറുക്കേണമേ എന്ന് പറഞ്ഞുകൊണ്ടാണ് ലക്ഷ്മി ബാഡ്ജ് കുത്തികൊടുത്തത്.

ധന്യയും സീറോ ബാഡ്ജ് നൽകിയത് റിയാസിനായിരുന്നു. പല കാര്യങ്ങളും മുൻവിധിയോടെയാണ് റിയാസ് സമീപിക്കുന്നതെന്നാണ് കാരണമായി ധന്യ പറഞ്ഞത്. ​ഗെയിമിൽ വീട്ടിൽ ഏറ്റവും കൂടുതൽ സീറോ ബാഡ്ജ് ലഭിച്ചതും റിയാസിനായിരുന്നു.