ബി​ഗ് ബോസ് വീട്ടിലെ രണ്ടാമത്തെ എലിമിനേഷൻ, ശാലിനി പുറത്തേക്ക്, ഒട്ടും പ്രതീക്ഷിച്ചിരുന്നില്ലെന്ന് പ്രതികരണം!

നിറം നൽകിയ മുട്ടകൾ ഉപയോഗിച്ചുള്ള ഒരു ആക്റ്റിവിറ്റി മോഹൻലാലിൻറെ നിർദേശപ്രകാരം മത്സരാർഥികൾ കളിച്ചിരുന്നു. എന്നാൽ നോമിനേഷൻ ലഭിച്ചിരുന്നവരെ ഈ ആക്റ്റിവിറ്റിയിൽ നിന്ന് ഒഴിവാക്കിയിരുന്നു. പിന്നാലെ എലിമിനേഷൻ നടപടികൾക്കും ഇതേ മുട്ടകൾ ഉപയോഗിച്ചു. നോമിനേഷൻ ലഭിച്ച ഓരോരുത്തരായി മോഹൻലാൽ പേര് വിളിക്കുന്നതനുസരിച്ച് വന്ന് ആ പെട്ടികളിൽ ഒന്നെടുത്ത് തുറന്ന് നോക്കണമായിരുന്നു. അതിൽ ഒരു മുട്ടയും ആ മുട്ടയിൽ ഒരു അറിയിപ്പും ഉണ്ടാവും. പെട്ടി തുറന്നാൽ മാത്രമേ ഇത് കാണാൻ സാധിക്കുമായിരുന്നുള്ളൂ. ഇത് പ്രകാരം ലക്ഷ്മിപ്രിയയെയാണ് മോഹൻലാൽ പെട്ടി തുറക്കാൻ ആദ്യമായി വിളിച്ചത്.

ലക്ഷ്മി തുറന്ന പെട്ടിയിൽ ഒരു മുട്ട അടങ്ങിയിരുന്നു. അഖിൽ സേഫ് ആണ് എന്ന സന്ദേശമാണ് അതിൽ ഉണ്ടായിരുന്നത്. ഇതുപ്രകാരം പിന്നീട് ശാലിനി, നവീൻ, അഖിൽ, ജാസ്‍മിൻ, ഡെയ്‍സി എന്നിവരും എത്തി പെട്ടികൾ തുറന്നു. ശാലിനി തുറന്ന പെട്ടിയിൽ ജാസ്മിൻ സേഫ് ആയി. നവീൻ തുറന്ന പെട്ടിയിൽ ഡെയ്സിയും അഖിൽ തുറന്ന പെട്ടിയിൽ നവീനും സേഫ് ആയി. എന്നാൽ പിന്നീട് വന്ന ജാസ്മിൻ എടുത്ത പെട്ടിയിൽ മുട്ടയൊന്നും ഉണ്ടായിരുന്നില്ല. പിന്നീടെത്തിയ ഡെയ്സി തുറന്ന പെട്ടിയിൽ ലക്ഷ്മിപ്രിയയുടെ പേരാണ് ഉണ്ടായിരുന്നത്. ശേഷം നോമിനേഷൻ ലിസ്റ്റിൽ ഇടംപിടിച്ചിരുന്ന രണ്ടുപേർ മാത്രമാണ് അവശേഷിച്ചിരുന്നത്. അശ്വിൻ, ശാലിനി എന്നിവരായിരുന്നു അവർ.

പിന്നീട് ബാക്കിയായ ഒരു പെട്ടി തുറക്കാൻ അശ്വിനാണ് എത്തിയത്. താൻ തന്നെ സേഫ് ആണെന്ന അറിയിപ്പ് ആണ് അശ്വിന് അതിൽ നിന്ന് കിട്ടിയത്. പിന്നാലെ തന്റെ കൈയ്യിലുള്ള മുട്ടയിലെ സന്ദേശം മോഹൻലാൽ വായിച്ചു. ശാലിനി എലിമിനേറ്റഡ് എന്നാണ് മുട്ടയിൽ എഴുതിയിരുന്നത്. 21 ദിവസം വീട്ടിൽ ചില വഴിച്ച ശേഷമാണ് ശാലിനി വിട പറഞ്ഞത്. ലക്ഷ്മിപ്രിയ, സുചിത്ര, നിമിഷ അടക്കം എല്ലാവരും കണ്ണീരോടെയാണ് ശാലിനിയെ യാത്രയാക്കിയത്. അടുത്ത സുഹ‍ൃത്തായ അഖിലിനാണ് വിജയിക്കാനുള്ള ആശംസ ശാലിനി നൽകിയത്.

Recommended Video

തന്റെ ആദ്യ പ്രണയം അമ്പലത്തിലെ പൂജാരിയോടായിരുന്നു: ലക്ഷ്മി പ്രിയ | Filmibeat Malayalam

ജയിച്ച് വരണം അഖി എന്നാണ് ശാലിനി പറഞ്ഞത്. കഠിനാധ്വാനത്തിന് പകരം വെക്കാൻ ജീവിതത്തിൽ മറ്റൊന്നുമില്ലെന്ന് വിശ്വസിക്കുന്ന ശാലിനി പ്രമുഖ ടെലിവിഷൻ ചാനൽ പ്രോഗ്രാമുകളുടെയും ചാനൽ അവാർഡ് നിശകളുടെയുമൊക്കെ അവതാരകയായി ശോഭിച്ചിട്ടുണ്ട്. ബിഗ് ബോസ് പോലെ ഒരു വലിയ പ്ലാറ്റ്‍ഫോമിലേക്ക് ലഭിച്ച അവസരത്തെ ഏറെ പ്രതീക്ഷയോടും ആഹ്ലാദത്തോടെയുമാണ് ശാലിനി നോക്കി കണ്ടിരുന്നത്. ഒരുപാട് സ്വപ്നങ്ങൾ തനിക്കുണ്ടെന്ന് ശാലിനി പലപ്പോഴായി പറയുകയും ചെയ്തിരുന്നു.