'എടുത്ത് ചാട്ടം മാറ്റി വരികയായിരുന്നു, അപ്രതീക്ഷിതമായിരുന്നു പുറത്താക്കൽ'; ഡെയ്സി ഡേവിഡ് പറയുന്നു

'ഇത്ര പെട്ടന്ന് പോകുമെന്ന് ഞാൻ പ്രതീക്ഷിച്ചിരുന്നില്ല. എന്തുകൊണ്ട് ഞാൻ പുറത്തായിയെന്നത് എപ്പിസോഡ് കണ്ടാൽ മാത്രമെ എനിക്ക് മനസിലാവുകയുള്ളൂ. അത്യാവശ്യം ജെനുവിനായിട്ടാണ് ഞാൻ നിന്നത് എന്നാണ് എനിക്ക് തോന്നിയത്.'

'എന്തൊക്കെ ചെയ്താലും നമ്മൾ നിൽക്കണോ പോകണോയെന്നത് പ്രേക്ഷകരുടെ തീരുമാനമാണ്. ആ അന്തിമ തീരുമാനത്തോട് ഞാൻ യോജിക്കുന്നു. ഞാൻ എന്നിലുള്ള ചില മോശം ​ഗുണങ്ങൾ‌ വീട്ടിൽ വെച്ച് തിരിച്ചറിഞ്ഞിരുന്നു.'

'ആരെങ്കിലും എന്നെ കുറിച്ച് സംസാരിക്കുമ്പോൾ അവർ പറയുന്നത് മുഴുവൻ കേൾക്കാതെ ഞാൻ പ്രതികരിക്കാറുണ്ട്. എടുത്ത് ചാട്ടം എനിക്കുണ്ടായിരുന്നു. മുന്നോട്ട് പോകാൻ അവസരം ലഭിച്ചിരുന്നെങ്കിൽ ഞാൻ അത് തിരുത്തുമായിരുന്നു.'

'വീട്ടിൽ വന്ന് ആദ്യം സൂരജിനെ കണ്ടപ്പോൾ എന്റെ ഒരു അനിയൻ, സുഹൃത്ത് എന്നൊരു വൈബ് അവനിൽ നിന്ന് എനിക്ക് കിട്ടി. എന്തും തുറന്ന് പറയാൻ സാധിക്കും അവനോട്.'

'പോകെ പോകെ ഞങ്ങൾ തമ്മിൽ സെറ്റായതുകൊണ്ടാണ് അങ്ങനെ ഒരു ബന്ധമുണ്ടായത്. എന്റെ കുറവുകളെല്ലാം മനസിലാക്കി നേർവഴിക്ക് നയിക്കാൻ ശ്രമിച്ചൊരു വ്യക്തി കൂടിയാണ്. ചെയ്ത തെറ്റുകളെല്ലാം അവൻ മുഖത്ത് നോക്കി പറയാറുമുണ്ട്. അങ്ങനൊരു നല്ല സൗഹൃദം കൂടി വീട്ടിൽ നിന്നും ലഭിച്ചു. പുറത്ത് പോയാലും ആ ബന്ധം തുടരും' ഡെയ്സി പറഞ്ഞു.

ലാലേട്ടൻ സൂരജിനെ കുറിച്ച് ചോ​ദിക്കുമ്പേഴെല്ലാം വാചാലയായി സംസാരിച്ചിരുന്ന വ്യക്തി കൂടിയാണ് ഡെയ്സി ഡേവിഡ്. ഇരുവരും തമ്മിലുള്ള കുസൃതികളുടെ വീഡിയോകളെല്ലാം മുമ്പ് വൈറലായിട്ടുണ്ട്.

ആത്മസുഹൃത്ത് പോയത് സൂരജിൽ വലിയ ആഘാതം ഏൽപ്പിച്ചിരുന്നു. മാത്രമല്ല കുട്ടി അഖിലിനെ കെട്ടിപിടിച്ച് പൊട്ടികരയുന്ന സൂരജിനേയും ഞായറാഴ്ച സംപ്രേഷണം ചെയ്ത എപ്പിസോഡിൽ കാണാമായിരുന്നു.

അതേസമയം ഡെയ്സിയുടെ എവിക്ഷൻ കൃത്യ സമയത്താണ് നടന്നതെന്നാണ് ഭൂരിപക്ഷം പ്രേക്ഷകരും അഭിപ്രായപ്പെടുന്നത്. ഡെയ്സി-ബ്ലെസ്ലി വഴക്കിൽ ഡെയ്സി ഉപയോ​ഗിച്ചിരുന്ന പദങ്ങൾ പ്രേക്ഷകർക്കിടയിൽ വലിയ ചർച്ചയായിരുന്നു.

ഇപ്പോൾ വീട്ടിൽ അവശേഷിക്കുന്നത് പന്ത്രണ്ട് മത്സരാർഥികൾ മാത്രമാണ്. അതേസമയം വൈൽഡ് കാർഡ് എൻട്രിയുണ്ടാകുമെന്ന പ്രതീക്ഷയാണ് പ്രേക്ഷകർക്ക്.

Recommended Video

എന്റെ കളി ഇങ്ങനെയാണ്.. അശ്വിന്റെ ആദ്യ പ്രതികരണം | Filmibeat Malayalam

ഡെയ്സിക്കൊപ്പം പുറത്തായ മറ്റൊരാൾ നവീനാണ്. കഴിഞ്ഞ രണ്ടാഴ്ചയായുള്ള നവീന്റെ ഹൗസിനുള്ളിലെ പെരുമാറ്റമാണ് പെട്ടന്ന് ജനപിന്തുണ കുറയാൻ കാരണമായത്.

നവീൻ ശക്തനായ മത്സരാർഥിയാണെന്ന് വീട്ടിലെ അം​ഗങ്ങൾ ഇടയ്ക്കിടെ പറയാറുണ്ടായിരുന്നു. തെറ്റുകൾ തിരുത്തി പഴയ അവസ്ഥയിലേക്ക് നവീൻ തിരിച്ച് വരാൻ ഒരുങ്ങുമ്പോഴാണ് പ്രേക്ഷക തീരുമാനം തിരിച്ചടിയായത്.

നവീന്റെ പുറത്താക്കൽ നടി ലക്ഷ്മിപ്രിയയ്ക്കും വലിയ ഷോക്കായിരുന്നു. ഇരുവരും അടുത്ത സുഹ‍ൃത്തുക്കളായിരുന്നു.