ബിഗ് ബോസിലേക്ക് എന്നെ തിരഞ്ഞെടുത്തത് അതറിഞ്ഞ് തന്നെയാണ്; ഗെയിം കളിച്ചതിനെ കുറിച്ച് ധന്യ മേരി വര്‍ഗീസ്

'ബിഗ് ബോസ് ഷോ യില്‍ പോയപ്പോള്‍ ഞാന്‍ പ്രത്യേകം ശ്രദ്ധിച്ചത് അഭിനയിക്കാതെ ഇരിക്കാനാണ്. ഞാന്‍ ഞാനായി തന്നെയാണ് അതില്‍ പങ്കെടുത്തത്. പൊതുവേ ഞാനൊരു വഴക്കാളിയല്ല. അധികമായി പ്രതികരണശേഷിയൊന്നുമില്ലാത്ത ഒരു സാധാരണ ആര്‍ട്ടിസ്റ്റാണെന്ന് അറിഞ്ഞ് കൊണ്ട് തന്നെയാണ് എന്നെ ആ പരിപാടിയിലേക്ക് ക്ഷണിക്കുന്നത്. ധന്യ എന്ന വ്യക്തിത്വം നിലനിര്‍ത്തി കൊണ്ട് തന്നെ നൂറ് ദിനങ്ങള്‍ അവിടെ പൂര്‍ത്തിയാക്കാന്‍ സാധിച്ചതിന്റെ സംതൃപ്തിയുണ്ടെന്നും' നടി പറയുന്നു.

ബിഗ് ബോസിന് ശേഷം കുറച്ചൂടി ആളുകളിലേക്ക് എത്തിപ്പെടാന്‍ സാധിച്ചു എന്നതാണ് ഇതിലൂടെ ഉണ്ടായ ഗുണങ്ങളിലൊന്ന്. സീരിയലുകളിലെ കഥാപാത്രമല്ലാതെ എന്നെ പ്രേക്ഷകര്‍ക്ക് തിരിച്ചറിയാന്‍ ഇതൊരു വേദിയായി എന്നാണ് തോന്നിയിട്ടുള്ളതെന്ന് മഹിളരത്‌നം മാഗസിന് നല്‍കിയ അഭിമുഖത്തിലൂടെ നടി വ്യക്തമാക്കുന്നു.

എല്ലാത്തിനും ഭര്‍ത്താവ് ജോണിന്റെയും മകന്റെയും സപ്പോര്‍ട്ട് തന്റെ കൂടെയുണ്ടെന്നും ധന്യ വ്യക്തമാക്കുന്നു. ഷോ യില്‍ പങ്കെടുക്കുമ്പോള്‍ കരുതിക്കൂട്ടി നമുക്കൊന്നും ചെയ്യാന്‍ സാധിക്കില്ല. അവിടെ നടക്കുന്ന കാര്യങ്ങള്‍ പുറംലോകം മനസിലാക്കുന്നതിലും വ്യത്യാസം ഉണ്ടാവാറുണ്ട്.

ബിഗ് ബോസിനെ കുറിച്ച് കൂട്ടുകാര്‍ പറഞ്ഞ നല്ല അഭിപ്രായങ്ങളും പലപ്പോഴായി ഷോ കണ്ടിട്ടുള്ള അനുഭവവും മാത്രമാണ് എന്റെ മനസിലുണ്ടായിരുന്നത്. പിആര്‍ വര്‍ക്കുകളൊന്നും ചെയ്യാതെ പോയതിനാല്‍ ഗെയിം നന്നായി പെര്‍ഫോം ചെയ്യാന്‍ കഴിഞ്ഞു എന്നാണ് എനിക്ക് പറയാനുള്ളതെന്നും ധന്യ കൂട്ടിച്ചേര്‍ത്തു.

ബിഗ് ബോസിലെ എന്റെ പ്രകടനം കണ്ടതിന് ശേഷം തികച്ചും വ്യത്യസ്തയായിരുന്നു എന്നുള്ള കമന്റാണ് പ്രേക്ഷകരില്‍ നിന്നും കേട്ടത്. പ്രശ്‌നങ്ങളെ മനോഹരമായി കൈകാര്യം ചെയ്തുവെന്നും ഗെയിം ബ്രില്യന്റായി കളിച്ചു എന്നുമൊക്കെ പലരും പറഞ്ഞു. ഈ ഷോ ഇഷ്ടപ്പെടുന്ന ധാരാളം പേരുണ്ട്. പല സാഹചര്യങ്ങളിലും ഞാന്‍ പ്രതികരിച്ച വിധത്തിലാണ് ആളുകള്‍ക്ക് ഇഷ്ടപ്പെട്ടതെന്ന് ധന്യ പറഞ്ഞു.