സെലിബ്രിറ്റികളും സാധാരണക്കാരുമടക്കം 15ൽ കൂടുതൽ മത്സരാർഥികൾ, വീടിനും പ്രത്യേകതകളുണ്ട് വിശേഷങ്ങൾ ഇങ്ങനെ!

'ഇത്തവണത്തെ വീട് ബിഗ് ബോസ് ഹിന്ദിയിലും മറാത്തിയിലും നിങ്ങൾ കണ്ട വീടിന് സമാനമായിരിക്കും. പക്ഷേ ഞങ്ങൾ അതിന് ചില പ്രത്യേക ഘടകങ്ങൾ നൽകിയിട്ടുണ്ട്. ആദ്യമായി ഞങ്ങൾ വീടിന് ബാൽകെണി നൽകിയിട്ടുണ്ട്. കൂടാതെ വീടിനുള്ളിൽ ഒരു മരം സ്ഥാപിച്ചിട്ടുണ്ട്. അത് ആകർഷണത്തിന്റെ കേന്ദ്രമായിരിക്കും. കിടപ്പുമുറികളിൽ ആരാധകരെ അതിശയിപ്പിക്കുന്ന ചില ഘടകങ്ങളും ഉണ്ടാകും. സാധാരണയായി കാഴ്ചക്കാർക്ക് ഞങ്ങൾ പിടിച്ചെടുക്കുന്ന ഒരു ദിവസത്തെ കുറച്ച് കാഴ്‌ച മാത്രമേ കാണാനാകൂ. പക്ഷേ പതിവ് എപ്പിസോഡുകൾ കൂടാതെ 24 മണിക്കൂർ സ്ട്രീമിങും ഉള്ളതിനാൽ നിരവധി കാണാക്കാഴ്ചകളും കഥകളും ഇത്തവണ കാഴ്ചക്കാർക്ക് കാണാൻ സാധിക്കും.'

'ഷോയിൽ നിങ്ങൾക്ക് പതിനഞ്ചോ അതിലധികമോ മത്സരാർത്ഥികളെ പ്രതീക്ഷിക്കാം. ജനപ്രിയരായവരും അത്ര അറിയപ്പെടാത്ത മുഖങ്ങളും കൂടി കലർന്നതായിരിക്കും. കൊവിഡിന് ശേഷം നമ്മൾ സാധാരണ ഘട്ടത്തിലേക്ക് മടങ്ങുകയാണ് അതിനാൽ രസകരമായ ചില ടാസ്ക്കുകളും തിരികെ വരും' അഭിഷേക് മുഖർ‌ജി കൂട്ടിച്ചേർത്തു. അതേസമയം സോഷ്യൽമീഡിയയിൽ സജീവമായി മത്സരാർഥികൾ ആരായിരിക്കുമെന്നത് സംബന്ധിച്ച് പ്രവചനങ്ങൾ തകൃതിയായി നടക്കുന്നുണ്ട്. പുറത്ത് വരുന്ന ഓരോ പ്രമോകൾക്കും വളരെ രസകരമായ കമന്റുകളും അഭിപ്രായങ്ങളുമാണ് ആരാധകർ പങ്കിടുന്നത്. 'പ്രേക്ഷകരെ കമന്റ്സ് കൂടെ പരിഗണിക്കണം ഓരോ ആഴ്ചയിലും.. ബോറിങ് ആണെങ്കിൽ മാത്രം വൈൽഡ് കാർഡ് മതി.. അമ്പത് ദിവസം ഒക്കെ കഴിഞ്ഞാൽ വൈൽകാർഡ് വേണ്ട. സമ്മാനങ്ങൾ വാരി കോരി കൊടുക്കരുത് സീസൺ 1പോലെ ഫുഡ്‌ ക്രമീകരിക്കണം. ദുഃഖ കഥപറച്ചിൽ വേണ്ട.. ടാസ്കുകൾ അടിപൊളി ആകണം..ഒരേ ടൈപ്പ് ടാസ്കുകൾ ഒഴിവാക്കണം.... ഇമേജ് നോക്കി കളിക്കുന്നവർക്ക് നല്ല പണി കൊടുക്കണം' തുടങ്ങി വ്യത്യസ്തമായ കമന്റുകളാണ് ബി​ഗ് ബോസ് പ്രമോകൾക്ക് ലഭിക്കുന്നത്.

ഏറ്റവുമൊടുവിൽ നടന്ന ബിഗ് ബോസ് മലയാളം സീസൺ 3ൽ ടൈറ്റിൽ വിജയിയായത് സിനിമാ നടൻ മണിക്കുട്ടൻ ആയിരുന്നു. രണ്ടാംസ്ഥാനം സായ് വിഷ്‍ണുവിനും മൂന്നാം സ്ഥാനം ഡിംപൽ ഭാലിനുമായിരുന്നു. കൊവിഡ് പശ്ചാത്തലത്തിൽ 100 ദിവസം പൂർത്തിയാക്കാൻ കഴിയാതിരുന്ന മൂന്നാം സീസണിൽ പക്ഷേ പ്രേക്ഷകർക്ക് വോട്ട് ചെയ്യാൻ അവസരം നൽകിയതിന് ശേഷം വിജയിയെ കണ്ടെത്തുകയായിരുന്നു. 2021 ഓഗസ്റ്റ് 1ന് ചെന്നൈയിൽ വെച്ചാണ് മൂന്നാം സീസണിൻറെ ഗ്രാൻഡ് ഫിനാലെ നടന്നത്.