'ഹിന്ദി ബി​ഗ് ബോസ് കണ്ട് തുള്ളിച്ചാടി വന്നതല്ലേ? എന്നിട്ടിപ്പോ എന്തായി? പണിയെടുത്ത് ജീവിക്കെടാ'; ജാസ്മിൻ

ഇരുവരും തമ്മിലുള്ള വഴക്കുകൾ വീക്കിലി ടാസ്ക്കിനെ പോലും ബാധിച്ചിരുന്നു. റിയാസ് വീക്കിലി ടാസ്ക്കിൽ ജഡ്ജായി നിന്നപ്പോൾ ഫേവറിസം കാണിച്ചുവെന്ന് ആരോപിച്ചാണ് റോബിൻ റിയാസുമായി തർക്കിച്ചത്.

അത് വലിയ അസഭ്യ വാക്കുകൾ പോലും ഇരുവരും പറയുന്ന തരത്തിലേക്ക് എത്തിയിരുന്നു. ടാസ്ക്കിലെ മോശം പ്രകടനത്തെ തുടർന്ന് കഴിഞ്ഞ ആഴ്ച ജയിലിലാക്കപ്പെട്ടതും റോബിനും റിയാസുമായിരുന്നു.

ജയിലിലെത്തിയ ശേഷവും ഇരുവരും തമ്മിൽ വഴക്കുകൾ നടക്കുകയും അസഭ്യമായ വാക്കുകൾ വീണ്ടും പ്രയോ​ഗിക്കുകയും ചെയ്തിരുന്നു.

ബിഗ് ബോസ് വീട്ടിലെ പ്രധാന ശത്രുക്കൾ ഒരുമിച്ച് ജയിലിലേക്ക് പോയതിൻറെ കൗതുകം പ്രേക്ഷകർക്കൊപ്പം മത്സരാർഥികൾക്കും ഉണ്ടായിരുന്നു.

ആദ്യം പ്രശ്നങ്ങളില്ലാതെ ഇരുവരും സംസാരിച്ച് ഇരുന്നെങ്കിലും ബിഗ് ബോസ് ഒരു ജോലി ഏൽപ്പിച്ചതോടെ രണ്ടുപേർക്കുമിടയിൽ പ്രശ്നങ്ങളും ആരംഭിച്ചു. ബി​ഗ് ബോസ് ഏൽപ്പിച്ച മുത്തുകോർക്കൽ ജോലി അലങ്കോലപ്പെടുത്തിയതിനാൽ പതിവിൽ നിന്നും വിപരീതമായി ജയിലിൽ ഇരുവർക്കും ഒരുപാട് നേരം കഴിയേണ്ടി വന്നു.

ബി​ഗ് ബോസ് ഏൽപ്പിച്ച ജോലി പൂർത്തിയാക്കാതെ ബഹളം വെച്ച് സ്ഥിതി കൂടുതൽ വഷളാക്കുകയും ടാസ്ക്കിന് നൽകിയ മാലകൾ പൊട്ടിച്ച് കളയുകയും ചെയ്തതിനാൽ റോബിനും റിയാസിനും വീണ്ടും ജയിലിൽ കിടക്കുക എന്ന ശിക്ഷയാണ് വീക്കെൻ‌ഡ് എപ്പിസോഡിൽ മോഹൻലാൽ വന്നപ്പോൾ നൽകിയത്.

രണ്ടാമതും ജയിലിൽ കിടക്കാൻ പോകുന്ന റിയാസിനോട് ജാസ്മിൻ പറഞ്ഞ വാക്കുകളാണ് ഇപ്പോൾ വൈറലാകുന്നത്.

ജയിലിലേക്ക് പോകാനുള്ള തയ്യാറെടുപ്പുകൾ നടത്തുന്നതിനിടെയായിരുന്നു റിയാസിന്റെ പ്രവ‍ൃത്തികളെ കുറിച്ച് ജാസ്മിന്റെ കമന്റ്.

'നിന്നെയൊക്കെ ഒരാഴ്ചയെങ്കിലും ജയിലിലിടണം. അപ്പോൾ മാത്രമെ നീയൊക്കെ പഠിക്കൂ. എന്തൊക്കെയായിരുന്നു..... ഹിന്ദി ബി​ഗ് ബോസ് കണ്ട് തുള്ളിച്ചാടി വന്നതല്ലേ നീ? മലപ്പുറം കത്തി... അമ്പും വില്ലും... എന്തൊക്കെയായിരുന്നു... മര്യാദയ്ക്ക് പണിയെടുത്ത് ജീവിക്കടാ...' എന്നാണ് ജാസ്മിൻ റിയാസിനെ തമാശ രൂപേണ ഉപദേശിച്ചുകൊണ്ട് പറഞ്ഞത്.

വന്ന ആദ്യ ആഴ്ച തന്നെ കൈയ്യിലെ പ്രവൃത്തികൊണ്ട് ജയിലിൽ പോയതിനാണ് നർമം കലർത്തി ജാസ്മിൻ റിയാസിനെ വിമർശിച്ചത്.

ആദ്യം ജയിലിൽ കിടന്നപ്പോൾ റൂൾസ് തെറ്റിച്ച് ജയിലിന് പുറത്ത് റിയാസ് കറങ്ങി നടന്നതും ജയിലിൽ അനുവദനീയമല്ലാത്ത ഭക്ഷണം കഴിച്ചതുമെല്ലാം മോഹ​ൻലാൽ വീക്കെൻഡ് എപ്പിസോഡിൽ ശക്തമായി വിമർശിച്ചിരുന്നു.

ക്യാപ്റ്റനാണെന്ന ബോധം ഇല്ലാതെ റിയാസിനൊപ്പം കളിച്ച് നടന്നതിന് ജാസ്മിനേയും മോഹൻലാൽ വിമർശിച്ചിരുന്നു.