'തോന്നുന്നത് പറയാനുള്ള സ്ഥലമല്ല ബി​ഗ് ബോസ്, റോബിനോട് പൊട്ടിതെറിച്ച് മോഹൻലാൽ'; വൈറലായി പ്രമോ!

മോഹൻലാൽ വരുന്ന വീക്കെൻഡ് എപ്പിസോഡിന്റെ പ്രമോ ആണ് ഇപ്പോൾ സോഷ്യൽമീഡിയയിൽ വൈറലാകുന്നത്. നലിവാരം തകർന്ന രീതിയിൽ വീടിനുള്ളിലും മറ്റ് മത്സരാർഥികളോടും പെരുമാറിയ റോബിനോട് പൊട്ടിത്തെറിക്കുന്ന മോഹൻലാലാണ് വീഡിയോയിലുള്ളത്. വീട്ടിലെ നിയമങ്ങൾ പാലിച്ച് നിൽക്കാൻ നിൽക്കാൻ സാധിക്കില്ലെന്ന് തോന്നുകയാണെങ്കിൽ റോബിന് വീട് വിട്ട് പുറത്തേക്ക് വരാമെന്നും മോഹൻലാൽ പറയുന്നത് പ്രമോയിൽ കാണാം. മറ്റൊരു മത്സരാർഥിയായ ജാസ്മിനുമായി ജയിൽ നോമിനേഷൻ സമയത്ത് റോബിൻ വലിയൊരു തർക്കത്തിൽ ഏർപ്പെട്ടിരുന്നു അപ്പോൾ ഉപയോ​ഗിച്ച വാക്കുകളും പ്രവൃത്തികളുമാണ് മോഹൻലാലിന്റെ ശകാരത്തിന് റോബിനെ പാത്രമാക്കിയത്.

വീക്കിലി ടാസ്കിന് വേണ്ടി ​ഗ്രൂപ്പ് തിരിച്ചപ്പോൾ മുതൽ ജയിൽ നോമിനേഷൻ സമയത്ത് വരെ സംഘർഷഭരിതമായ അന്തരീക്ഷമായിരുന്നു ബി​ഗ് ബോസ് വീട്ടിൽ. വീട്ടിലെ നിയമങ്ങളും നിർദേശങ്ങളും പാലിക്കാതെയാണ് പല മത്സരാർഥികളും പെരുമാറിയത്. കഴിഞ്ഞ ദിവസങ്ങളിൽ അത്തരത്തിൽ നിരവധി സംഭവങ്ങളും നടന്നിരുന്നു. കുടുംബപ്രേക്ഷകരടക്കം കാണുന്ന ഷോയാണെന്നതിനാൽ തന്നെ പലതും മത്സരാർഥികളുടെ കൈവിട്ട് പോവുകയാണെന്ന് പ്രേക്ഷകരും ചൂണ്ടിക്കാട്ടിയിരുന്നു. റോബിൻ-ജാസ്മിൻ പോര് അതിര് വിട്ട് പോയിരുന്നു. അതുപോലെ തന്നെ ഡെയിസിയും റോബിനുമായുള്ള പോരും വലിയ തർക്കമായി മാറിയിരുന്നു. ഇവർക്കെതിരെ നടപടി എടുക്കണമെന്ന് പ്രേക്ഷകർ ദിവസങ്ങളായി ആവശ്യപ്പെടുന്നുണ്ട്.

ജയിൽ നോമിനേഷനിലേക്കുള്ള പേരുകൾ മറ്റുള്ള മത്സരാർഥികൾ പറഞ്ഞ് കഴിഞ്ഞ ശേഷമാണ് റോബിൻ എത്തിയത്. നാടകീയമായി തൻറെ തെറ്റുകുറ്റങ്ങൾ ഏറ്റ് പറഞ്ഞ റോബിൻ തനിക്ക് ആളുകളെ ജയിലിലേക്ക് അയക്കാൻ തക്കതായ കാരണങ്ങൾ ഇല്ലെന്നും അതിനാൽ ആരുടെയും പേര് പറയുന്നില്ലെന്നും പറഞ്ഞു. തുടർന്ന് മറ്റ് മത്സരാർത്ഥികളെല്ലാവരും റോബിനെ മൂന്ന് പേര് പറയാൻ നിർബന്ധിച്ചു. എന്നാൽ റോബിൻ തൻറെ വാക്കുകൾ ആവർത്തിച്ചു. ഇതോടെ ഓരോരുത്തരായി മുന്നോട്ട് വന്ന് റോബിനെതിരെ രംഗത്തെത്തി. റോബിൻറെ വാശി തങ്ങളെ കൂടി ബാധിക്കുമെന്നും അതിനാൽ മൂന്ന് പേരുകൾ പറയാനും മറ്റ് മത്സരാർത്ഥികൾ റോബിനെ നിർബന്ധിച്ചു. ബി​ഗ് ബോസ് കൂടി ഇടപെട്ടശേഷമാണ് റോബിൻ പേരുകൾ പറഞ്ഞത്.

Recommended Video

തന്റെ ആദ്യ പ്രണയം അമ്പലത്തിലെ പൂജാരിയോടായിരുന്നു: ലക്ഷ്മി പ്രിയ | Filmibeat Malayalam

ശേഷം റോബിന്റെ പ്രവൃത്തിയും മുമ്പ് നടന്ന സംഭവങ്ങളും എടുത്തിട്ട് റോബിനും ജാസ്മിനും തമ്മിൽ തർക്കിക്കാൻ തുടങ്ങി. ബിഗ് ബോസിൻറെ നിയമങ്ങളെ പോലും കാറ്റിൽ പറത്തി ഇരുവരും പരസ്പരം ചില അശ്ലീല ആംഗ്യങ്ങളും വാക്കുകളും ഉപയോഗിച്ച് പരസ്പരം വെല്ലുവിളിച്ചിരുന്നു. ഇതോടെയാണ് കുടുംബപ്രേക്ഷകർ ജാസ്മിൻ, റോബിൻ എന്നിവർക്കെതിരെ നടപടി വേണമെന്ന് ആവശ്യപ്പെട്ട് തുടങ്ങിയത്. പുതിയ പ്രമോയിൽ മോഹൻലാലും റോബിനെ നന്നായി ശാസിക്കുന്നതും നിയമങ്ങൾ അനുസരിക്കാൻ കഴിയില്ലെങ്കിൽ പുറത്തുവരാനുള്ള അനുവാദം കൊടുക്കുന്നതും പ്രമോയിൽ കാണാം.