'ഇതിഹാസ താരത്തെ ബി​ഗ് ബോസ് അവതാരകനായതിന്റെ പേരിൽ തെറി പറയുന്നത് ശരിയല്ല'; ഷിയാസ് കരീം

ഈ സീസണിൽ ഏറ്റവും കൂടുതൽ ജനപ്രീതി റോബിനാണ് ലഭിച്ചത്. അതിനാൽ തന്നെ റോബിനെ സീക്രട്ട് റൂമിലേക്ക് മാറ്റിയപ്പോൾ മുതൽ പ്രേക്ഷകർ റോബിനെ തിരികെ ഷോയിലേക്ക് കൊണ്ടുവര‌ണമെന്ന് ആവശ്യപ്പെട്ട് പ്രതിഷേധിക്കുന്നുണ്ടായിരുന്നു.

അനുകൂലമായ തീരുമാനം ഉണ്ടാകുമെന്ന് പ്രതീക്ഷിച്ചിരുന്ന പ്രേക്ഷകരിലേക്ക് റോബിന്റെ എവിക്ഷൻ നടന്നുവെന്ന വാർത്തായാണ് എത്തിയത്.

റോബിനെ പുറത്താക്കിയതിൽ പ്രതിഷേധിച്ച് പ്രേക്ഷകരിൽ പലരും ഷോ കാണുന്നത് തന്നെ അവസാനിപ്പിച്ചിരിക്കുകയാണ്.

ബി​ഗ് ബോസ് ഷോയുടെ അവതാരകനായ മോഹൻലാലിന് നേരെയും റോബിന്റെ ആരാധകരുടെ സൈബർ ബുള്ളി​യിങ് നടക്കുന്നുണ്ട്.

പലരും വളരെ മോശമായ ഭാഷകളാണ് മോഹൻലാലിനെ അവഹേളിക്കാൻ ഉപയോ​ഗിക്കുന്നത്. ഷോയുടെ അവതാരകൻ മാത്രമായ മോഹൻലാലിനെ ബി​ഗ് ബോസ് പ്രേക്ഷകർ കുറ്റപ്പെടുത്തുന്നതിനെതിരെ അമർഷം പ്രകടിപ്പിച്ച് രം​ഗത്തെത്തിയിരിക്കുകയാണ് മുൻ ബി​ഗ് ബോസ് താരവും മോഡലുമെല്ലാമായ ഷിയാസ് കരീം.

ഇന്ത്യൻ സിനിമയിലെ തന്നെ ഇതിഹാസമായ മനുഷ്യനെ ബി​ഗ് ബോസ് അവതാരകനായതിന്റെ പേരിൽ കുറ്റപ്പെടുത്തുന്നത് ശരിയല്ലെന്നാണ് ഷിയാസ് സോഷ്യൽമീഡിയയിൽ കുറിച്ചത്.

'മോഹൻലാൽ എന്ന നടൻ നമുക്ക് ആരാണെന്ന് നിങ്ങൾ മറക്കരുത്. മലയാള സിനിമയുടെ വളർച്ചയിൽ മോഹൻലാൽ എന്ന നടന്റെ പങ്ക് ചെറുതല്ല.'

'മറ്റുള്ള ഇൻഡസ്ട്രി പോലും ഇതിഹാസമെന്ന് വിളിക്കുന്ന മോഹൻലാലിനെ ബിഗ് ബോസ് ഷോയുടെ അവതാരകനാണ് എന്ന ഒറ്റ കാരണം കൊണ്ട് തെറി വിളിക്കുന്നവരും പൊങ്കാല ഇടുന്നവരും ഒന്ന് ഓർക്കുക.'

'ബി​ഗ് ബോസ് സീസൺ ഇനിയും ഉണ്ടാകും. ഇനിയും ഒരുപാട് തരം​ഗങ്ങൾ ഉണ്ടാകും. പുതിയ താരങ്ങളും ആർമിയും ഉണ്ടാകും. പക്ഷെ മോഹൻലാൽ എന്ന നടൻ ഇവിടെ തന്നെ കാണും. അതിനർത്ഥം മോഹൻലാൽ എന്ന നടൻ വിമർശനത്തിന് അതീതമാണ് എന്നല്ല.'

Recommended Video

Dr. Robin Dilsha Romance: റോബിനെ കുറിച്ചുള്ള ഒരു കാര്യം എനിക്കറിയാം | #BiggBoss | FilmiBeat

'പക്ഷെ ബി​ഗ് ബോസിന്റെ അവതാരകനായത് കൊണ്ട് മാത്രം മോഹൻലാലിനെ തെറി വിളിക്കുന്നതിനെ കുറിച്ചാണ് പറഞ്ഞത്.'

'പത്മഭൂഷൺ നൽകി രാജ്യം അംഗീകരിച്ച ഒരാളെയാണ് ബി​ഗ് ബോസിന്റെ അവതാരകനായി എന്ന പേരിൽ ചിലർ പോയി തെറി വിളിക്കുന്നത്.....' ഷിയാസ് കരീം കു‌റിച്ചു.

ഷിയാസിന്റെ പോസ്റ്റ് പ്രത്യക്ഷപ്പെട്ടതോടെ അനുകൂലിച്ചും പ്രതികൂലിച്ചും നിരവധി കമന്റുകൾ വരുന്നുണ്ട്. റോബിനെ പുറത്താക്കിയത് ന്യായമല്ലെന്നും കളിപ്പാവയെപ്പോലെയാണ് മോഹൻലാൽ ഷോയിൽ പെരുമാറുന്നതെന്നുമെല്ലാമാണ് വിമർശിക്കുന്നവർ പറയുന്നത്.