'ഇനി എല്ലാവരും ഒന്ന് ഒതുങ്ങും'; രണ്ടാം ആഴ്ചയിലെ ക്യാപ്റ്റനായി നവീൻ അറയ്ക്കൽ!

പിന്നീടുള്ള സമയങ്ങളിൽ നവീനായിരുന്നു വീട് നിയന്ത്രിച്ചിരുന്നത്. തനിക്ക് കിട്ടിയ ചുരുങ്ങിയ സമയം കൊണ്ട് മനോഹരമായി വീടിനേയും വീട്ടുകാരേയും നിയന്ത്രിച്ച് ഇഷ്ടം നേടാൻ സാധിച്ചതിനാലാണ് രണ്ടാം ആഴ്ചയിലെ ക്യാപ്റ്റൻസി ടാസ്കിൽ മത്സരിക്കാൻ‌ നവീൻ അറയ്ക്കലിന്റെ പേര് മറ്റുള്ള മത്സരാർഥികൾ നിർദേശിച്ചത്. നവീന് പുറമെ ക്യാപ്റ്റൻസി ടാസ്കിൽ മത്സരിക്കാൻ യോ​ഗ്യത നേടിയത് സുചിത്രയും റോൻസണുമായിരുന്നു. കായികക്ഷമതയും ബുദ്ധിയും ഉപയോ​ഗിച്ച് കളിക്കേണ്ട ടാസ്ക് ആദ്യം പൂർത്തീകരിച്ചത് റോൻസൺ വിൻസെന്റ് ആയിരുന്നു. രണ്ടാമതായാണ് നവീൻ‌ ​ഗെയിമിൽ വിജയിച്ചത്. പക്ഷെ മത്സരം കൃത്യമായി വിലയിരുത്തിയപ്പോൾ റോൻസൺ ചെയ്തതിൽ പാകപിഴവുകൾ വന്നതിനാൽ നവീനെ വിജയിയായി പ്രഖ്യാപിക്കുകയായിരുന്നു.

കാര്യങ്ങൾ നിയന്ത്രിക്കാനും പ്രാവർത്തികമാക്കാനും ശേഷിയുണ്ട് തനിക്ക് എന്ന് നേരത്തെ തന്നെ നവീൻ കുറഞ്ഞ സമയം കൊണ്ട് തെളിയിച്ചതിനാൽ തന്നെ വീട്ടിലെ മറ്റുള്ളവർക്കും നവീൻ‌ അറയ്ക്കൽ പുതിയ ക്യാപ്റ്റനായതിൽ സംതൃപ്തിയാണ്. നവീൻ പറയുന്ന കാര്യങ്ങൾ കൃത്യമായി മടി കൂടാതെ ചെയ്യാനും മറ്റുള്ളവർ ശ്രമിക്കുന്നുണ്ട്. നവീൻ അറയ്ക്കൽ ക്യാപ്റ്റനായി തെരഞ്ഞെടുക്കപ്പെട്ടതിൽ ബി​ഗ് ബോസ് പ്രേക്ഷകർക്കും യോജിപ്പാണുള്ളത്. ആദ്യത്തെ ആഴ്ചയിൽ അശ്വിൻ ക്യാപ്റ്റനായപ്പോൾ നിർദേശങ്ങൾ കേൾക്കാനോ നടപ്പിലാക്കാനോ ആരും ശ്രമിച്ചിരുന്നില്ല. അതിനാൽ തന്നെ ​ഗെയിം കളിക്കുന്നതിനേക്കാൾ കൂടുതൽ സമയം മത്സരാർഥികൾ തമ്മിൽ വാക്കുതർക്കമാണ് ഉണ്ടായത്. നവീൻ കളി തുടങ്ങിയെന്നും എല്ലാവരേയും മനസിലാക്കിയും സാഹചര്യം മനസിലാക്കിയുമാണ് നവീൻ ജോലികൾ പോലും വീതിച്ച് നൽകിയതെന്നും അതിനാൽ തന്നെ ഈ ആഴ്ച പ്രതീക്ഷയുള്ളതാണെന്നും പ്രേക്ഷകർ കമന്റായി കുറിക്കുന്നു. ബി​ഗ് ബോസ് നാലാം സീസൺ ആരംഭിച്ചപ്പോൾ ആ​​ദ്യം വീട്ടിലേക്ക് എത്തിയ മത്സരാർഥി നവീൻ ആയിരുന്നു.

ടെലിവിഷൻ സ്‍ക്രീൻ പ്രേക്ഷകർക്ക് ഏറെ പരിചയമുള്ള മുഖമാണ് നവീൻ അറയ്ക്കലിൻറെത്. സീരിയലുകളിലൂടെയും ടെലിവിഷൻ ഗെയിം ഷോകളിലൂടെയും ആണ് നവീൻ നിറഞ്ഞ് നിൽക്കുന്നത്. ഏഷ്യാനെറ്റിലെ അടക്കം സീരിയലുകളിൽ സ്ഥിരം സാന്നിധ്യമായ നവീൻ ചില സിനിമകളിലും മുഖം കാണിച്ചിട്ടുണ്ട്. ഫിറ്റ്നസ് ഫ്രീക്കായ താരം എന്നാണ് പൊതുവിൽ നവീൻ അറിയപ്പെടുന്നത് തന്നെ. ഇത് തെളിയിക്കുന്നതാണ് നവീൻറെ സോഷ്യൽ മീഡിയ പോസ്റ്റുകൾ. പാടാത്ത പൈങ്കിളി എന്ന ഏഷ്യനെറ്റ് സീരിയലിലാണ് നവീൻ അവസാനമായി പ്രധാന വേഷം ചെയ്‍തത്. 2010ൽ കാണ്ഡഹാർ എന്ന ചിത്രത്തിൽ സൈനികനായി അഭിനയിച്ച് സിനിമയിലും അരങ്ങേറി.