'ഞാൻ ഫൈനൽ ഫൈവിൽ വരികയാണെങ്കിൽ മിക്കവാറും ഞങ്ങൾ തമ്മിൽ നല്ല കലിപ്പാവും'; നവീനെ കുറിച്ച് റോൺസൺ

നവീൻ വീക്ക്ലി ടാസ്ക്കിൽ മോശം പ്രകടനം ‌കാഴ്ചവെച്ചുവെന്ന് കാണിച്ചാണ് നവീന്റെ സുഹൃത്തുക്കളടക്കം അദ്ദേഹത്തെ ബ്ലസ്ലിക്കൊപ്പം ജയിലിലേക്ക് അയച്ചത്. അത് നവീനെ വല്ലാതെ വേദനിപ്പിക്കുകയും വിഷാദത്തിലേക്ക് നയിക്കുകയും ചെയ്തിരുന്നു. ജയിലിൽ പോയതിന്റെ വിഷമം സഹമത്സരാർഥികളോട് രോഷംകൊണ്ട് തീർക്കുകയും ചെയ്തിരുന്നു നവീൻ. ശേഷം എവിക്ഷനിൽ ‌വന്നപ്പോൾ ആഴ്ച ക്യാപ്റ്റനായിരുന്ന റോൺസൺ തന്റെ പ്രത്യേക അധികാരം ഉപയോ​ഗിച്ച് നവീനെ രക്ഷിക്കുകയായിരുന്നു. വീക്കെൻഡ് എപ്പിസോഡിൽ മോഹൻലാൽ വന്നപ്പോൾ റോൺസൺ നവീനെ തന്നെ നോമിനേഷനിൽ നിന്നും രക്ഷിക്കാനുള്ള കാരണവും തിരക്കിയിരുന്നു.

അതിന് നവീൻ നൽകിയ മറുപടി റോൺസണിന് വീട്ടിൽ നല്ലൊരു എതിരാളി വേണമെന്ന ആ​ഗ്രഹമുള്ളകൊണ്ടാണ് തന്നെ രക്ഷിച്ചത് എന്നാണ്. എന്നാൽ വീട്ടിലെ മറ്റുള്ളവർ നവീന്റെ ആ ഉത്തരത്തോട് യോജിച്ചില്ല. ഫ്രണ്ട്ഷിപ്പിന്റെ പേരിലാണ് റോൺസൺ നവീനെ രക്ഷിച്ചത് എന്നാണ് വീട്ടിലെ മറ്റ് അം​ഗങ്ങൾ ഒന്നടങ്കം പറഞ്ഞത്. അതേസമയം ഇപ്പോൾ നവീന്റെ സ്വഭാവത്തെ കുറിച്ച് റോൺസൺ ബ്ലസ്ലിയോട് പറഞ്ഞ വാക്കു‌കളാണ് വൈറലാകുന്നത്. നവീന് കൊച്ചുപിള്ളേരുടെ മനസും വാശിയുമാണെന്നാണ് റോൺസൺ പറയുന്നത്. ഉറ്റ സുഹൃത്തുക്കളായി വന്ന രണ്ടുപേർ വേർപിരിയാനുള്ള സാധ്യത ബ്ലസ്‍ലി ചൂണ്ടിക്കാട്ടിയപ്പോഴായിരുന്നു റോൺസണിന്റെ പ്രതികരണം.

'നവീന് കുട്ടികളുടെ മനസാണ്. ചെറിയ കാര്യങ്ങളെപ്പോലും പർവ്വതീകരിച്ചു കാണുന്ന സ്വഭാവമാണ് ഉള്ളത്. ഒരു കാരണവുമില്ലാതെയാണ് നവീനേട്ടൻ ജയിലിൽ കിടന്നപ്പോൾ ആരോടും മിണ്ടാതെയിരുന്നത്. ചെറിയ പിള്ളേരെ പോലെയാ. പെട്ടെന്ന് വിഷമം വരും. ആ വിഷമം വലിയ അളവിലാണ് വരുന്നത്. ചെറിയ കാര്യങ്ങളെ അങ്ങനെ എടുക്കാൻ അറിയില്ല. ഭയങ്കര നിഷ്കളങ്കനാണ് നവീൻ... അവിടെയാണ് പ്രശ്നം. ഞാനിപ്പോൾ ഫൈനൽ ഫൈവിൽ വരുകയാണെന്നുണ്ടെങ്കിൽ മിക്കവാറും ഞങ്ങൾ തമ്മിൽ നല്ല കലിപ്പാവും. കാരണം അത് അങ്ങനെയാണ്. ഈ ​ഗെയിം അങ്ങനെയാണ്. നവീനോട് ഇക്കാര്യം തുറന്നുപറയാൻ എനിക്ക് മടിയില്ല' റോൺസൺ പറഞ്ഞു.

Recommended Video

പ്രശസ്ത സംവിധായകൻ്റെ സിനിമ ഒഴിവാക്കേണ്ടി വന്നു, ശാലിനി പറയുന്നു #Shalini #Biggbossmalayalam

ജയിലിലേക്ക് അയച്ചയാളെത്തന്നെ ക്യാപ്റ്റൻസി ടാസ്കിലേക്കും തെരഞ്ഞെടുത്തത് ബിഗ് ബോസ് വീട്ടിൽ ചെറിയ തോതിൽ കഴിഞ്ഞ ആഴ്ച ആശയ സംഘർഷത്തിന് ഇടയാക്കിയിരുന്നു. ഡോ.റോബിൻ, ദിൽഷ, ജാസ്‍മിൻ എന്നിവർ ഇതിനെ ചോദ്യം ചെയ്‍തപ്പോൾ ലക്ഷ്‍മിപ്രിയ, സുചിത്ര നായർ, ഡെയ്‍സി, അശ്വിൻ എന്നിവരൊക്കെ ആ ക്യാപ്റ്റൻസി നോമിനേഷനെ ന്യായീകരിക്കുകയും ചെയ്തിരുന്നു. ചെറിയ കാര്യങ്ങൾ പോലും ഉൾക്കൊള്ളാൻ കഴിയാത്ത നവീൻ എങ്ങനെയാണ് വീട്ടിൽ വരും ദിവസങ്ങളിൽ പിടിച്ച് നിൽക്കുക എന്നാണ് പ്രേക്ഷകരും ചോദിക്കുന്നത്.