ബി​ഗ് ബോസിലൂടെ പരിചിത മുഖമാകാൻ ഇനി മുതൽ ഈ പുതുമുഖങ്ങളും!

ബി​ഗ് ബോസ് നാലാം സീസൺ ആരംഭിച്ചപ്പോൾ വീട്ടിലേക്ക് എത്തിയ രണ്ടാമത്തെ മത്സരാർഥിയായിരുന്നു ജാനകി സുധീർ. മോഡലിങിന് പുറമെ സിനിമകളിലും സീരിയലുകളിലും ജാനകി സുധീർ അഭിനയിച്ചിട്ടുണ്ട്. ചങ്ക്‌സ്, ചാണക്യതന്ത്രം, തീരം, ഒരു യമണ്ടൻ പ്രേമകഥ തുടങ്ങിയ സിനിമകളിലാണ് ജാനകി അഭിനയിച്ചിട്ടുള്ളത്. ഈറൻനിലാവ്, തേനും വയമ്പും എന്നിവയാണ് ജാനകി അഭിനയിച്ച സീരിയലുകൾ. ഹോളിവൂഡ് ആണ് ഇനി റിലീസിനെത്താനുള്ള ജാനകിയുടെ സിനിമ. സിനിമയിലും അഭിനയത്തിലും ശോഭിക്കുക എന്നതാണ് ജാനകിയുടെ ലക്ഷ്യം. ബിഗ് ബോസ് തന്റേതാക്കി മാറ്റുമെന്ന് പ്രേക്ഷകർക്ക് ഉറപ്പ് നൽകിയാണ് ജാനകി ബി​ഗ് ബോസ് വീടിനുള്ളിലേക്ക് കയറിയിരിക്കുന്നത്.

മലയാളി പ്രേക്ഷകർക്ക് അധികം സുപരിചിതമല്ലാത്ത മറ്റൊരു മുഖമാണ് മത്സരാർഥിയായ ഡെയ്‌സി ഡേവിഡിന്റേത്. ഫോട്ടോ​ഗ്രഫിയിലാണ് ഡെയ്സി തിളങ്ങുന്നത്. വിവാഹ ഫോട്ടോഗ്രഫിയിലും ഫാഷൻ ഫോട്ടോഗ്രഫിയിലുമാണ് ഡെയ്‍സി പ്രതിഭ തെളിയിച്ചിരിക്കുന്നത്. സെലിബ്രിറ്റി ഫോട്ടോഗ്രഫിയിൽ വളരെ കുറച്ച് സ്ത്രീകൾ മാത്രമാണ് കേരളത്തിലുള്ളത്. അക്കൂട്ടത്തിൽ ഒരാളാണ് ഡെയ്സി. വെഡ്ഡിംഗ് ഫോട്ടോഗ്രഫിയിൽ എപ്പോഴും തൻറേതായ പരീക്ഷണങ്ങൾ നടത്താറുള്ള ഡെയ്‍സി നാരീസ് വെഡ്ഡിംഗ്സ് എന്ന പേരിൽ ഒരു സ്ഥാപനവും നടത്തുന്നുണ്ട്. ബിഗ് ബോസ് മലയാളം സീസണുകളിൽ ആദ്യമായാണ് ഒരു ഫോട്ടോഗ്രാഫർ മത്സരാർഥിയായി എത്തുന്നത്.

ബോഡി ബിൽഡിങ്, ജിം ട്രെയിനിങ്, യാത്രകൾ എന്നിവയാണ് ജാസ്മിൻ മൂസയ്ക്ക് ഇഷ്ടപ്പെട്ട മേഖലകൾ. ജീവിതത്തോട് പൊരുതി തന്റേതായ വഴിവെട്ടി തെളിച്ചാണ് ജാസ്മിൻ മൂസയുടെ യാത്ര. യാഥാസ്ഥിതിക കുടുംബത്തിൽ ജനിച്ച ജാസ്‍മിൻ രണ്ട് തവണ വിവാഹിതയാവുകയും ആ രണ്ട് ബന്ധങ്ങളും സാഹചര്യങ്ങൾ കൊണ്ട് വേർപിരിയേണ്ടി വന്ന ആളുമാണ്. ജാസ്മിന്റെ ആദ്യ വിവാഹം പതിനെട്ടാം വയസിലായിരുന്നു. പിന്നീട് ആ ബന്ധം വേർപിരിഞ്ഞ് വീണ്ടും വിവാഹിതയായി. രണ്ടാം വിവാഹബന്ധത്തിൽ കടുത്ത പീഡനങ്ങൾ നേരിട്ടപ്പോൾ ജാസ്മിൻ ആ ബന്ധവും ഉപേക്ഷിച്ചു. ബോഡി ബിൽഡിംഗിലേക്ക് ഇറങ്ങിയ ജാസ്‍മിൻ നിലവിൽ ബംഗളൂരുവിൽ ഒരു ഫിറ്റ്നസ് ട്രെയ്‍നർ ആയി പ്രവർത്തിക്കുകയാണ്. മോണിക്ക ഷമി എന്ന തൻറെ സ്ത്രീസുഹൃത്തുമൊത്ത് ലിവ് ഇൻ റിലേഷൻഷിപ്പിലാണ് ജാസ്‍മിൻ.

ശാലിനി നായരാണ് അവതാരക എന്നുള്ള ടൈറ്റിലിൽ ബിഗ് ബോസ് ഹൗസിലേക്ക് എത്തിയിരിക്കുന്നത്. നിരവധി ഷോകളിൽ അവതാരകയായിട്ടെത്തിയ ശാലിനി അഭിനയ രംഗത്തും സജീവമാണ്. മകനാണ് ശാലിനിയുടെ ലോകം. കൂടുതൽ അറിയപ്പെടുക, സിനിമകൾ ചെയ്യുക എന്നിങ്ങനെയുള്ള ലക്ഷ്യത്തോടെയാണ് ശാലിനിയും ബി​ഗ് ബോസിൽ എത്തിയിരിക്കുന്നത്.

നടിയും നർത്തകിയുമാണ് ദിൽഷ പ്രസന്നൻ. ഏഷ്യാനെറ്റിലെ ഹിറ്റ് സീരിയലായ കാണാകണ്മിയിൽ ദിൽഷ അഭിനയിച്ചിരുന്നു. മറ്റ് ചില ടെലിവിഷൻ പരിപാടികളിലും ഡാൻസ് റിയാലിറ്റി ഷോകളിലും ദിൽഷ സജീവ സാന്നിധ്യമായിരുന്നു.

ഗായകനും സംഗീതഞ്ജനുമാണ് ബ്ലെസ്ലി. ചില സിനിമകൾക്ക് അദ്ദേഹം പാടുകയും ചെയ്തിട്ടുണ്ട്.

ഡോ. മച്ചാൻ എന്ന പേരിൽ അറിയപ്പെടുന്ന താരമാണ് റോബിൻ. ഡോ. റോബിൻ രാധകൃഷണന് ജിജി ഹോസ്പിറ്റലിൽ ജോലി ചെയ്യുകയാണ്. ഇൻഫ്‌ളൂവൻസർ കൂടിയായ റോബിനും ബിഗ് ബോസിലുണ്ട്.