'നീ ആ​​ഗ്രഹിച്ചപ്പോലെ മൂന്ന് പേരും നോമിനേഷനിൽ വന്നില്ലേ?'; ജാസ്മിനോട് ചോദ്യവുമായി സുചിത്ര നായർ!

'അപർണ പുറത്താകേണ്ട ഒരാളാണെന്ന് ഞാൻ കരുതുന്നില്ല. കാരണം അവൾക്ക് അവളുടേതായ നിലപാടും തീരുമാനങ്ങളുമുണ്ടായിരുന്നു. പിന്നെ എന്ത് സംഭവിച്ചുവെന്നത് മനസിലാകുന്നില്ല.'

'സുചിത്ര, അഖിൽ, സൂരജ് നിങ്ങൾ മൂന്ന് പേരും ഒരുമിച്ച് നോമിനേഷനിൽ വരുമെന്ന് കരുതിയില്ല. റിയാസ് ഇപ്രാവശ്യം മാത്രമാണ് രക്ഷപ്പെട്ടത്. ഇനി അങ്ങോട്ടുള്ള ആഴ്ചകളിൽ അവൻ എപ്പോഴും നോമിനേഷനിൽ ഉണ്ടായേക്കും.'

'പ്രേക്ഷകരുടെ കാഴ്ചപ്പാടുകൾ വേറെയായിരിക്കുമെന്ന് എനിക്കറിയാം' ജാസ്മിൻ സുചിത്രയോട് വിശദീകരിച്ചു. നിമിഷ പോയശേഷം വീട്ടിൽ ഒറ്റപ്പെട്ട അവസ്ഥയിലാണ് ജാസ്മിൻ.

റിയാസ് മാത്രമാണ് ജാസ്മിന്റെ ചിന്താ​ഗതികളുമായി ചേർന്ന് പോകുന്ന ഒരു വ്യക്തി. അതേസമയം കളികൾ മാറി മറിഞ്ഞുകൊണ്ടിരിക്കുകയാണ്.

നിമിഷ പുറത്തായപ്പോൾ മുതൽ പുറത്തുള്ള പ്രേക്ഷകരുടെ സ്വീകാര്യത എത്തരത്തിലായിരിക്കുമെന്നത് സംബന്ധിച്ച് വീട്ടിലെ മത്സരാർഥികളെല്ലാം ആശയ കുഴപ്പത്തിലാണ്. കാരണം വീട്ടിലെ ഏറ്റവും നല്ല മത്സരാർഥികളിൽ ഒരാളായിരുന്നു നിമിഷ.

ഇപ്പോഴും നിമിഷ പുറത്താകേണ്ട മത്സരാർഥിയാണ് എന്നത് ജാസ്മിൻ ഉൾകൊണ്ടിട്ടില്ല. ജാസ്മിന് വീട്ടിലുള്ള ഒരേയൊരു ശത്രു റോബിൻ മാത്രമാണ്. അന്നും ഇന്നും കപ്പ് ജയിക്കുക എന്നതിനപ്പുറം റോബിനെ പരാജയപ്പെടുത്തുക എന്നത് മാത്രമാണ് ജാസ്മിന്റെ ലക്ഷ്യം.

ചില സമയങ്ങളിൽ ആ വെറുപ്പ് കാരണം പരിധി വിട്ട് ജാസ്മിൻ പെരുമാറാറുമുണ്ട്. ഇപ്പോൾ വീട്ടിൽ അവശേഷിക്കുന്നത് പന്ത്രണ്ട് മത്സരാർഥികളാണ്.

സുചിത്ര ഈ ആഴ്ച പുറത്താകാനുള്ള സാധ്യതയാണ് പ്രേക്ഷകർ മുന്നോട്ട് വെക്കുന്നത്. സീസൺ ഫോർ തുടങ്ങി ഒമ്പത് ആഴ്ച പിന്നിട്ടപ്പോഴാണ് സുചിത്ര ആദ്യമായി നോമിനേഷനിൽ വന്നിരിക്കുന്നത്.

സെയ്ഫ് ​ഗെയിമും ​ഗ്രൂപ്പിസവുമാണ് അമ്പത്തിയേഴാം എപ്പിസോഡ് വരെ സുചിത്രയെ തുണച്ചത്. ഇനി മുതൽ‌ അത് സുചിത്രയ്ക്ക് സാധ്യമാകില്ല. സുചിത്രയുടെ വീട്ടിലെ ഉറ്റ ചങ്ങാതിമാരാണ് അഖിലും സൂരജും.

സുചിത്രയും അഖിലും തമ്മിലുള്ള സംഭാഷണങ്ങൾ വൈറലാകുമ്പോൾ ഇരുവരും തമ്മിൽ പ്രണയമാണോയെന്ന് വരെ പ്രേക്ഷകർ‌ക്ക് സംശയമുണ്ടായിരുന്നു. ഇപ്പോൾ മൂവരും ഒരുമിച്ചാണ് നോമിനേഷനിൽ വന്നിരിക്കുന്നത്.

അതേസമയം റോബിനെ ഭയന്നിട്ടാണ് നോമിനേഷനിൽ പോകാൻ കൂട്ടാക്കാതിരുന്നതെന്ന് റിയാസ് പറഞ്ഞിരുന്നു. കഴിഞ്ഞ ദിവസം തർക്കിച്ചപ്പോൾ റിയാസ് നോമിനേഷനിൽ വന്നാൽ ആ ആഴ്ച ഉറപ്പായും പുറത്തുപോകുമെന്ന് റോബിൻ പ്രവചിച്ചിരുന്നു.

റോബിന് പുറത്ത് വലിയ രീതിയിൽ ആരാധകരുണ്ടെന്ന് പുറത്ത് നിന്ന് കളികണ്ട് വന്നതിനാൽ റിയാസിന് അറിയാം.