മണികണ്ഠന്‍ ബിഗ് ബോസില്‍ നിന്ന് പുറത്ത് പോകാനുള്ള കാരണം; ആരോടും ഒന്നും പറയാതെ നിറ കണ്ണുകളോടെ യാത്രയായി

ഹൗസിലെ ജോലികളില്‍ സജീവമായി നില്‍ക്കുമ്പോഴാണ് മണികണ്ഠനെ കണ്‍ഷെഷന്‍ റൂമിലേയ്ക്ക് വിളിപ്പിക്കുന്നത്. ശേഷം തന്റെ ആരോഗ്യ കാര്യത്തെ കുറിച്ച് പറയുകയായിരുന്നു. നാട്ടില്‍ നിന്നുള്ള ഡോക്ടറിന്റെ നിര്‍ദ്ദേശമായിരുന്നു അറിയിച്ചത്. 'നിങ്ങളുടെ വീട്ടില്‍ നിന്ന് നിങ്ങളുടെ ഡോക്ടറായ ആര്‍കെ പ്രഭുവില്‍ നിന്ന് ഒരു പ്രിസ്‌ക്രിപ്ഷന്‍ അയച്ചു തന്നിരുന്നു. പ്രത്യേക നിര്‍ദ്ദേശ പ്രകാരം നിങ്ങളുടെ ആരോഗ്യകാര്യത്തില്‍ ശ്രദ്ധയും ഡയറ്റും മരുന്നും വിശ്രമവും അത്യാവശ്യമാണെന്ന്' ബിഗ് ബോസ് അറയിച്ചു,

'ദിവസവും നാല് നേരവുമുള്ള പ്രമേഹ പരിശോധനയും അതിനുശേഷമുള്ള ഇന്‍സുലിന്‍ കുത്തിവയ്പ്പുമാണ് ഡോക്ടര്‍ നിര്‍ദ്ദേശിച്ചിരിക്കുന്നത്. ഈ വീട്ടിലെ മുന്നോട്ടുള്ള യാത്രയില്‍ കഠിനമായ മത്സരങ്ങളും കൃത്യമായ ഭക്ഷണ ക്രമവും പിന്തുടരാന്‍ പറ്റാത്ത സാഹചര്യങ്ങളും ഇവിടെ ഉണ്ടായേക്കാം. ഈ അവസ്ഥയില്‍ ഈ ഷോയില്‍ തുടരുന്നതിനേക്കാള്‍ നിങ്ങളുടെ ആരോഗ്യത്തിന് അഭികാമ്യം കൃത്യമായി ഇതെല്ലാം ചെയ്യാന്‍ സാഹചര്യം ലഭിക്കുന്ന സ്വന്തം വീട്ടില്‍ നില്‍ക്കുന്നതായിരിക്കും. കാരണം നിങ്ങളുടെ ആരോഗ്യം ഞങ്ങള്‍ക്ക് വളരെ പ്രധാനമാണ്. അതുകൊണ്ട് പ്രത്യേക ശ്രദ്ധ ആവശ്യമായ താങ്കളുടെ ആരോഗ്യപ്രശ്‌നങ്ങള്‍ കണക്കിലെടുത്ത് അത് പരിപാലിക്കുന്നതും വിശ്രമിക്കുന്നതുമാണ് ഉചിതമെന്ന് ഞങ്ങള്‍ മനസിലാക്കുന്നു. നിങ്ങള്‍ എന്തുപറയുന്നുവെന്ന്' ബിഗ് ബോസ് ചോദിച്ചു.

ബിഗ് ബോസ് എന്ത് പറഞ്ഞാലും അനുസരിക്കാമെന്ന നിലപാടിരുന്നു മണികണ്ഠന്‍ സ്വീകരിച്ചത്. പുറത്ത് പോകാന്‍ തയ്യാറാണെന്ന് ഏറെ വേദനയോടെ പറഞ്ഞു. 'ഇങ്ങനെ ഒരു ഷോയില്‍ പങ്കെടുക്കാന്‍ പറ്റിയത് തന്നെ വലിയ സന്തോഷമുള്ള കാര്യമാണ്. മോഹന്‍ലാലിന്റെ അടുത്തുനില്‍ക്കാന്‍ തനിക്ക് കഴിഞ്ഞു. ലോകം മുഴുവന്‍ ആഗ്രഹിക്കുന്ന, എല്ലാ മലയാളികളും സ്വപ്‌നം കാണുന്ന ഒരു ഷോയില്‍ കുറച്ച് ദിവസമെങ്കിലും പങ്കെടുക്കാന്‍ പറ്റി. പക്ഷേ ആരോഗ്യം ഒരു പ്രശ്‌നമാണ്. തീര്‍ച്ചയായും തനിക്ക് സന്തോഷമേയുള്ളൂവെന്നും' മണികണ്ഠന്‍ വ്യക്തമാക്കി. നല്ലൊരി ഭാവി ആശംസിച്ച് കൊണ്ടാണ് ബിഗ് ബോസ് മണികണ്ഠനെ യാത്രയാക്കിയത്.

മണികണ്ഠന്‍ പോയതിന് ശേഷമാണ് ബിഗ് ബോസ് മത്സരാര്‍ത്ഥികളോട് ഇക്കാര്യം പറഞ്ഞത്. തുടക്കത്തില്‍ രഹസ്യ ടാസ്‌ക്കായിരിക്കുമെന്നാണ് എല്ലാവരും കരുതിയത്. എന്നാല്‍ പിന്നീട് മണികണ്ഠന്‍ ഇനി ഹൗസില്‍ ഉണ്ടാകില്ലെന്ന് അറിയിച്ചു. ഏറെ സങ്കടത്തോടേയും ഞെട്ടലോടേയുമാണ് എല്ലാവരും ഇത് കേട്ടത്. യാത്ര പറയാന്‍ പറ്റിയില്ല എന്നായിരുന്നു പലരുടേയും സങ്കടം. പിന്നീട് ബിഗ് ബോസിന്റെ നിര്‍ദ്ദേശാനുസരണം നവീന്‍ മണികണ്ഠന്റെ വസ്ത്രങ്ങള്‍ സ്റ്റോര്‍ റൂമില്‍ കൊണ്ടുവച്ചു .