വിഷ്ണു പുറത്തേക്ക്.... അടിപതറി അഖിൽ മാരാരും ഷിജുവും, വിഷ്ണുവിനോട് സോറി പറഞ്ഞ് സൗഹൃദം പുതുക്കി ജുനൈസ്!

ബി​ഗ് ബോസ് മലയാളം സീസൺ ഫൈവ് എൺപത്തിനാല് ദിവസം പിന്നിടുമ്പോൾ ഒരു മത്സരാർത്ഥി കൂടി ഹൗസിനോട് വിട പറഞ്ഞു. ശനിയാഴ്ച നടന്ന എവിക്ഷൻ പ്രക്രിയയിൽ വിഷ്ണു ജോഷി പുറത്തായി. ഹൗസിൽ അവശേഷിച്ചിരുന്ന പത്ത് പേരിൽ ഏറ്റവും ശക്തരായ മത്സരാർത്ഥികളിൽ ഒരാൾ ആയിരുന്നു വിഷ്ണു ജോഷി.

വീക്ക്ലി ടാസ്ക്കിൽ അടക്കം പലപ്പോഴും ​സ്വയം ബലിയാടായി ​ഗെയിം ചെയ്ഞ്ചിങ് മൊമന്റുകൾ സമ്മാനിക്കാനും വിഷ്ണുവിന് സാധിച്ചിരുന്നു. പലരുടേയും ടോപ്പ് ഫൈവ് പ്രെഡിക്ഷൻ ലിസ്റ്റിൽ വിഷ്ണു ഉണ്ടായിരുന്നു. അതുകൊണ്ട് തന്നെ വിഷ്ണു പുറത്തായത് ന്യായമല്ലെന്നാണ് പ്രേക്ഷകരിൽ ഭൂരിഭാ​ഗവും അഭിപ്രായപ്പെടുന്നത്.

ഒരു ബോക്സിൽ എവിക്ടാകാൻ പോകുന്ന മത്സരാർത്ഥിയുടെ പേര് രേഖപ്പെടുത്തി ബി​ഗ് ബോസ് ഹൗസിലേക്ക് കൊടുത്ത് അയച്ചു. ശേഷം മോഹൻലാലിന്റെ നിർദേശപ്രകാരം സെറീന പെട്ടി തുറന്ന് കാർഡിലുള്ള പേര് വായിച്ചു.

വിഷ്ണുവാണ് എവിക്ടായതെന്ന് സെറീന പറഞ്ഞതും മത്സരാർത്ഥികളും പ്രേക്ഷകരും ഒന്നടങ്കം ഞെട്ടി. സോഷ്യൽമീഡിയയിൽ നടന്ന പോളുകളിലെല്ലാം ഏറ്റവും കുറവ് വോട്ട് ലഭിച്ചത് സെറീനയ്ക്കും നാദിറയ്ക്കുമായിരുന്നു.

അതുകൊണ്ട് തന്നെ വിഷ്ണു ജോഷിയാണ് പുറത്തായതെന്ന് ഉൾക്കൊള്ളാൻ പ്രേക്ഷകർക്കും കഴിഞ്ഞില്ല. വിഷ്ണുവും താൻ പുറത്താകുമെന്ന് പ്രതീക്ഷിച്ചിരുന്നില്ലെന്നും ഷോക്കിങായിരുന്നുവെന്നും പറയുന്നുണ്ടായിരുന്നു. വിഷ്ണുവിന്റെ എവിക്ഷൻ ഏറ്റവും കൂടുതൽ ബാധിച്ചത് അടുത്ത സുഹൃത്തുക്കളായ അഖിൽ മാരാരെയും ഷിജുവിനെയുമാണ്.

വിഷ്ണുവിനെ ആദ്യം കെട്ടിപിടിച്ച് ആശ്വസിപ്പിച്ചതും അഖിലായിരുന്നു. ഞാനുണ്ട് പുറത്ത് എന്നാണ് അഖിൽ വിഷ്ണുവിനെ കെട്ടിപിടിച്ച് പറഞ്ഞത്. 'ഷോക്കിങാണ്... ഇത് ഗെയിമാണെന്ന് എല്ലാവരെക്കാളും നന്നായി എനിക്ക് അറിയാം. പോയിട്ട് തിരിച്ചുവരാം. എല്ലാവർക്കും ആശംസകൾ....' എന്നാണ് വിടവാങ്ങൽ പ്രസം​ഗത്തിൽ വിഷ്ണു പറഞ്ഞത്.

നല്ലൊരു സുഹൃത്തായി എപ്പോഴും താനുണ്ടാകുമെന്നാണ് അനിയൻ മിഥുൻ വിഷ്ണുവിനോട് പറഞ്ഞത്. ഹൗസിൽ പരസ്പരം ഏറ്റവും കൂടുതൽ ഏറ്റുമുട്ടിയിട്ടുള്ളത് ജുനൈസും വിഷ്ണുവുമാണ്. വേദനിപ്പിച്ചിട്ടുണ്ടെങ്കിൽ ക്ഷമിക്കണമെന്ന് പറഞ്ഞാണ് വിഷ്ണുവിനെ ജുനൈസ് യാത്രയാക്കിയത്.

പുറത്താകില്ലെന്ന അഹങ്കാരം കാരണം താൻ പെട്ടിപോലും മര്യാദയ്ക്ക് പാക്ക് ചെയ്തിരുന്നില്ലെന്നും വിഷ്ണു ഇടയ്ക്ക് പറയുന്നുണ്ട്. പുറത്തായ മത്സരാർത്ഥി ശ്രുതി ലക്ഷ്മിയെ കുറിച്ച് നടത്തിയ പരാമർശങ്ങൾ വിഷ്ണുവിന് തിരിച്ചടിയായതാകാമെന്നാണ് സഹമത്സരാർത്ഥി നാദിറ എവിക്ഷനെ കുറിച്ച് വിലയിരുത്തി ശോഭയോട് പറഞ്ഞത്.

അനിയൻ മിഥുൻ, റിനോഷ്, ഷിജു തുടങ്ങി ടോപ്പ് ഫൈവിൽ എത്താൻ യോ​ഗ്യതയില്ലാത്ത നിരവധി പേർ ഹൗസിലുണ്ടായിരിക്കെ എന്തുകൊണ്ട് വിഷ്ണുവിനെ ബി​ഗ് ബോസ് പുറത്താക്കിയെന്ന ചോദ്യങ്ങളും പ്രേക്ഷകരിൽ നിന്നും ഉയരുന്നുണ്ട്. 'നായക് നഹീ.... ഖൽനായക് ഹൂം മേം...' ​ഗാനം ആലപിച്ച് റോക്ക് സ്റ്റാർ സ്റ്റൈലിലാണ് വിഷ്ണു ബി​ഗ് ബോസ് ഹൗസിനോടും വീട്ടുകാരോടും വിട പറഞ്ഞ് ഇറങ്ങിയത്.

എന്തുകൊണ്ട് പുറത്തായി എന്നാണ് തോന്നുന്നതെന്ന് മോഹൻലാൽ ചോദിച്ചപ്പോൾ വിഷ്ണുവിന്റെ മറുപടി ഇതായിരുന്നു... 'എന്നെ പ്രേക്ഷകർക്ക് ഇഷ്‍ടപ്പെട്ടാൽ മാത്രം അവിടെ നിന്നാൽ മതിയെന്നാണ് ഞാൻ ഇന്നുവരെ പറഞ്ഞിട്ടുള്ളത്. ഒരുപക്ഷെ 84 ദിവസങ്ങൾക്ക് ശേഷമാകും എന്നോട് പ്രേക്ഷകർക്ക് ഇഷ്‍ടക്കേടുണ്ടായിട്ടുണ്ടാകുക.'

'എന്നെക്കാൾ അർഹതപ്പെട്ട ഒരുപാട് പേരുണ്ടായിരിക്കാം. വളരെ ചുരുക്കം ആൾക്കാർ മാത്രമാണ് എന്നെ ഇതുവരെ ഇഷ്‍ടപ്പെട്ടിട്ടുണ്ടാകുക. സിനിമയിൽ എത്തിപ്പെടാൻ പറ്റുന്ന മികച്ച പ്ലാറ്റ്‍ഫോമായിട്ടാണ് ബി​ഗ് ബോസിനെ കണ്ടിരുന്നതെന്നും സിനിമയാണ് ചെറുപ്പം മുതലുള്ള ലക്ഷ്യമെന്നും', വിഷ്ണു പറഞ്ഞു.

സ്വപ്നങ്ങളെ കുറിച്ചും ആ​ഗ്രഹങ്ങളെ കുറിച്ചും വിഷ്ണു സംസാരിച്ചപ്പോൾ എല്ലാം സാധ്യമാകട്ടെയെന്ന് മോഹൻലാൽ ആശംസിക്കുകയും ചെയ്തു. ഫിറ്റ്നസ് രം​ഗത്ത് കാലങ്ങളായി പ്രതിഭ തെളിയിക്കുന്നയാളാണ് വിഷ്ണു ജോഷി. 2019ൽ മിസ്റ്റർ ഇന്ത്യ മത്സരത്തിൽ ടോപ്പ് സിക്സിൽ വിഷ്ണു എത്തിയിരുന്നു. 2017ൽ മിസ്റ്റർ കേരള, 2019ൽ മിസ്റ്റർ എറണാകുളം പട്ടവും വിഷ്ണു സ്വന്തമാക്കി.