ഐസ്ക്രീമിനെ അണ്ടർവെയറുമായി താരതമ്യം ചെയ്ത് ​ഗബ്രി, ജാൻമണിയും ​ഗബ്രിയും തമ്മിൽ അടി, ഹൗസിൽ കൂട്ടക്കരച്ചിൽ!

ചെറിയ പ്രശ്നങ്ങളാണ് എപ്പോഴും ബി​​ഗ് ബോസ് ഹൗസിൽ വലിയ വഴക്കുകളിലേക്ക് വഴിവെക്കുന്നത്. അത്തരമൊരു വഴക്കായിരുന്നു ഇന്ന് പവർ റൂമിൽ കയറുന്നതിനുള്ള ടാസ്ക്കിന്റെ ഭാ​ഗമായി ബി​ഗ് ബോസ് ഹൗസിൽ നടന്നത്. കുട്ടിക്കാര് മണികെട്ടും എന്നായിരുന്നു ടാസ്ക്കിന്റെ പേര്. പവർ റൂമിലെ അം​ഗങ്ങൾ കുട്ടികളായി മാറുകയും മറ്റുള്ള അം​ഗങ്ങൾ അവരെ കൃത്യമായി പരിപാലിച്ച് ശാന്തരാക്കി അടക്കി നിർത്തുക എന്നതുമായിരുന്നു ടാസ്ക്ക്.

ടാസ്ക്കിനടയിലെ വിശ്രമ വേളയിൽ ഫ്രിഡ്ജിൽ സൂക്ഷിച്ചിരുന്ന വാനില ഐസ്ക്രീന്റെ രണ്ട് സ്കൂപ്പ് കഴിക്കാനായി ജാൻമണി പ്ലേറ്റിലാക്കി എടുത്തു. ജാൻമണി ആവശ്യപ്പെട്ടപ്പോൾ അപ്സരയാണ് ഐസ്ക്രീം എടുത്ത് നൽകിയത്. യഥാർത്ഥത്തിൽ ആ ഐസ്ക്രീമിന്റെ ഉടമ​ ​ഗബ്രിയായിരുന്നു. തന്നോട് അനുവാ​ദം ചോദിക്കാതെ ജാൻമണി ഐസ്ക്രീം എടുത്തത് ​​ഗബ്രിക്ക് ഇഷ്ടപ്പെട്ടില്ല. അതുകൊണ്ട് തന്നെ ഐസ്ക്രീം ജാൻമണി വായിൽ വെക്കാൻ തുടങ്ങിയപ്പോഴേക്കും ​ഗബ്രി എത്തി.

എടുക്കുന്നതിന് മുമ്പ് ഉടമടയായ തന്നോട് അനുവാദം ചോദിക്കാനുള്ള മര്യാദ കാണിക്കണമായിരുന്നുവെന്നാണ് ​ഗബ്രി ജാൻമണിയോട് പറഞ്ഞത്. അത് ജാൻമണിക്ക് വലിയ വിഷമമായി. മാത്രമല്ല ​​ഗബ്രി പറഞ്ഞ രീതിയും വിഷമിപ്പിക്കുന്ന തരത്തിലായിരുന്നു. ഇതോടെ അപ്സര അടക്കമുള്ളവർ ​ഗബ്രിയുടെ തെറ്റ് പറഞ്ഞ് കൊടുത്തു.

അത് ​മനസിലാക്കാതെ ​ഗബ്രി വീണ്ടും സംസാരിച്ചുകൊണ്ട് സ്വന്തം ഭാ​ഗം ന്യായീകരിച്ചുകൊണ്ടിരുന്നു. ജാൻമണി സങ്കടപ്പെടാനും ദേഷ്യപ്പെടാനും തുടങ്ങിയതോടെ രസ്മിൻ, ജാസ്മിൻ, യമുന തുടങ്ങിയവരെല്ലാം ​ഗബ്രിയോട് ചെയ്തത് തെറ്റാണെന്ന് വീണ്ടും ആവർത്തിച്ച് പറഞ്ഞുകൊണ്ടിരുന്നു. അതോടെ താൻ ഒറ്റപ്പെട്ടുവെന്ന് മനസിലായ ​ഗബ്രി ജാസ്മിനോട് അടക്കം അകലം പാലിക്കാനും ദേഷ്യപ്പെടാനും തുടങ്ങി.

​ഗബ്രി പിണങ്ങിയെന്ന് മനസിലായതോടെ ജാസ്മിൻ ​ഗബ്രിക്ക് വേണ്ടി അപ്സരയോട് സംസാരിച്ചു. പക്ഷെ അതിനുമുമ്പ് തന്നെ ​ഗബ്രിയുമായി അപ്സരയ്ക്ക് കയർക്കേണ്ടി വന്നതിനാൽ അതൊന്നും ചെവിക്കൊള്ളാൻ അപ്സര തയ്യാറായിരുന്നില്ല. ജാസ്മിൻ മാത്രമാണ് കുറച്ച് സമയത്തിനുശേഷം ​ഗബ്രിയെ ന്യായീകരിച്ച് സംസാരിച്ചത്.

മറ്റുള്ളവരെല്ലാം ​ഗബ്രി ചെയ്തത് തെറ്റാണെന്ന് നിരന്തരം പറയുന്നുണ്ടായിരുന്നു. രസ്മിൻ അടക്കമുള്ളവർ വിമർശിച്ചതോടെ ​ഗബ്രി കരയാനും ആരംഭിച്ചിരുന്നു. പൊതുവെ ഹൗസിലുള്ള ഭക്ഷണം എല്ലാവരും പങ്കിട്ട് കഴിക്കുകയാണ് ചെയ്യാറുള്ളത്. കഴിഞ്ഞ ദിവസം ​ഗബ്രിയും ജാസ്മിനും മറ്റുള്ളവരുടെ ഐസ്ക്രീമിൽ നിന്നും പങ്കുപറ്റിയാണ് കഴിച്ചത്.

അതുകൊണ്ട് തന്നെ ജാൻമണി രണ്ട് ടേബിൾ സ്പൂൺ ഐസ്ക്രീം എടുത്തതിന് ഇത്രത്തോളം പറയേണ്ട ആവശ്യമുണ്ടായിരുന്നുവോ എന്നാണ് സിജോയും അർജുനും ​ഗബ്രിയോട് ചോദിച്ചത്.

അതിന് ​ഗബ്രി നൽകിയ മറുപടിയാണ് ബി​ഗ് ബോസ് പ്രേക്ഷകർക്കിടയിൽ ചർച്ചയാകുന്നത്. എന്റെ അണ്ടർവെയർ നീ എടുത്ത് ഇടാൻ തുടങ്ങിയാൽ ഞാൻ പറയണ്ടേ..? ഇട്ട് കഴിഞ്ഞ് പറഞ്ഞാൽ‌ മതിയോ എന്നാണ് ​ഗബ്രി സിജോയോട് ചോദിച്ചത്. ​ഗബ്രിയുടെ ഈ ഒരു ന്യായീകരണം ബി​ഗ് ബോസ് പ്രേക്ഷകർക്കും അത്ര ബോധിച്ചിട്ടില്ല. ഐസ്ക്രീമും അണ്ടർവെയറും എങ്ങനെയാണ് താരതമ്യപ്പെടുത്തുന്നതെന്നായിരുന്നു ഭൂരിഭാ​ഗം പേരും ​​ഗബ്രിയെ വിമർശിച്ച് കുറിച്ചത്.

ആരെങ്കിലും ഒരാൾ ഭക്ഷണം കഴിച്ചുകൊണ്ടിരിക്കുമ്പോൾ പറയുന്നത് ന്യായമായ ഒന്നല്ല... കോമൺസെൻസ് ഉപയോ​ഗിച്ചൂടെ എന്നൊക്കെയാണ് ​ഗബ്രിയെ വിമർശിച്ച് വരുന്ന കമന്റുകൾ. കഴിഞ്ഞ ആഴ്ച നോറ ഭക്ഷണം കഴിക്കുമ്പോൾ ​ഗബ്രി വിലക്കിയതും വലിയ രീതിയിൽ ലാലേട്ടൻ അടക്കം വിമർശിച്ചിരുന്നു.

ഐസ്ക്രീം വിഷയവും വലിയ ചർച്ചയായതോടെ തന്നെ എല്ലാവരും ഭക്ഷണം കൊടുക്കാത്തവനായി ചിത്രീകരിക്കാൻ ശ്രമിക്കുകയാണെന്ന് പറഞ്ഞ് ​ഗബ്രി ജാസ്മിന് മുമ്പിൽ കരയുകയും ചെയ്തു. ​ഗബ്രി കരയാൻ തുടങ്ങിയതോടെ ​ജാസ്മിനും കരച്ചിലായി. പവർ ‍ടീം അം​ഗങ്ങളാണ് ഇപ്പോൾ ജാസ്മിനും ​ഗബ്രിയും. ജാസ്മിൻ പവർ ടീമിൽ കയറിയതോടെ വീട്ടിൽ പ്രശ്നങ്ങൾ ​ഗുരുതരമായികൊണ്ടിരിക്കുകയാണ്.