'രണ്ട് ജെൻഡറെയുള്ളൂ'; അഭിഷേകുണ്ടാക്കുന്ന വിവാദം ബി​ഗ് ബോസിന് താങ്ങാനാകുമോ; എല്ലാം പഠിച്ചെത്തുന്ന സായിയും

ബി​ഗ് ബോസ് ആറാം സീസൺ മുന്നോട്ട് പോകെ അപ്രതീക്ഷിത സംഭവ വികാസങ്ങളാണ് ഷോയെ ചുറ്റിപ്പറ്റി ഉണ്ടാകുന്നത് . തുടക്കം മുതൽ പല തരത്തിലുള്ള അഭിപ്രായം വന്ന സീസണാണിത്. ഭൂരിഭാ​ഗം പേരും മറ്റു സീസണുകളുമായി ആറാം സീസണിനെ താരതമ്യം ചെയ്തു. മുൻ സീസണുകളുടെയത്ര പോരെന്ന് അഭിപ്രായം വന്നെങ്കിലും പിന്നീടിത് പതിയെ മാറി. സംഘർഷ ഭരിതമായ അന്തരീക്ഷം പലപ്പോഴും ബി​ഗ് ബോസ് വീട്ടിലുണ്ടായി.

അസി റോക്കി-സിജോ വഴക്ക് കൈയാങ്കളിയിലേക്ക് നീങ്ങുകയും റോക്കിയെ ഷോയിൽ നിന്ന് പുറത്താക്കുകയും ചെയ്തു. റോക്കിയുടെ ആക്രമണത്തിൽ പരിക്ക് പറ്റിയ സിജോ ചികിത്സയുടെ ഭാ​ഗമായി മത്സരത്തിൽ നിന്ന് മാറി നിന്നു. ഇവരുൾപ്പെടെ അഞ്ച് പേരാണ് ഇതുവരെ ഷോയിൽ നിന്ന് പുറത്തായത്. പുതിയ സീസൺ തുടങ്ങുമ്പോഴേക്കും ഇത്രയും പേർ പുറത്ത് പോകുമെന്ന് ബി​ഗ് ബോസോ പ്രേക്ഷകരോ പ്രതീക്ഷിച്ചിരുന്നില്ല. ഇത് ഒരു പരിധി വരെ ഷോയെ ബാധിച്ചിട്ടുണ്ട്.

ഈ സാഹചര്യത്തിൽവൈൽഡ് കാർഡിലൂ‌ടെ പുതിയ മത്സരാർത്ഥികളെ എത്തിക്കുകയാണ് ബി​ഗ് ബോസ്. ഇവരെക്കുറിച്ചുള്ള കൂടുതൽ വിവരങ്ങൾ ഇപ്പോൾ പുറത്ത് വന്നു. സായ് കൃഷ്ണ, അഭിഷേക് ശ്രീകുമാർ, പൂജ കൃഷ്ണ, അഭിഷേക് ജയ്ദീപ്, ഡിജെ സിബിൻ‌, നന്ദന എന്നിവരാണ് വൈൽഡ് കാർഡ് എൻട്രികൾ. ഞായറാഴ്ചത്തെ എപ്പിസോഡിൽ ഈ ആറ് പേരെ കാണാൻ പറ്റും. സോഷ്യൽ മീഡിയയിലെ സജീവ സാന്നിധ്യമാണ് സീക്രട്ട് ഏജന്റ് എന്ന പേരിൽ അറിയപ്പെടുന്ന സായ് കൃഷ്ണ.

ഇതുവരെയുള്ള ബി​ഗ് ബോസ് എപ്പിസോഡുകളുടെ റിവ്യൂവും സായ് കൃഷ്ണ മനസിലാക്കിയിട്ടുണ്ട്. ഇപ്പോൾ ബി​ഗ് ബോസ് വീട്ടിലുള്ള ഓരോ മത്സരാർത്ഥികളുടെയും ​ഗെയിം പ്ലാനും സ്വഭാവ രീതികളും കൃത്യമായി മനസിലാക്കിക്കൊണ്ടാണ് സായ് കൃഷ്ണ ഷോയിലേക്ക് എത്താൻ പോകുന്നത്. സോഷ്യൽ മീഡിയ താരം ബി​ഗ് ബോസിൽ എങ്ങനെയും ​ഗെയി കളിക്കും എന്ന ആകാംക്ഷയിലാണ് പ്രേക്ഷകർ. മോഡലായ അഭിഷേക് ശ്രീകുമാറും സോഷ്യൽ മീഡിയയിൽ തന്റേതായ സ്ഥാനം അറിയിച്ചിട്ടുണ്ട്.

എൽജിബിടിക്യു വിരുദ്ധ പ്രസ്താവനകളും പോസ്റ്റുകളും കാരണം അഭിഷേകിന്റെ ഇൻസ്റ്റ​ഗ്രാം അക്കൗണ്ട് നേരത്തെ സസ്പെൻഡ് ചെയ്യപ്പെട്ടിട്ടുമുണ്ട്. എൽജിബിടിക്യു വിരുദ്ധ പോസ്റ്റുകൾക്കായി അഭിഷേകുണ്ടാക്കിയ പേജാണ് സസ്പെൻഡ് ചെയ്യപ്പെട്ടത്. എൽജിബിടിക്യു കമ്മ്യൂണിറ്റിയിൽ ഉൾപ്പെടുന്ന ജാൻമണി ദാസ് നിലവിൽ ബി​ഗ് ബോസ് വീട്ടിലുണ്ട്. ഇവർ തമ്മിൽ വീട്ടിനുള്ളിൽ പ്രശ്നങ്ങൾ ഉണ്ടാകാനുള്ള സാധ്യതയും കൂടുതലാണ്. രണ്ട് ജെൻഡർ മാത്രമേ ലോകത്തുള്ളൂയെന്ന് വാദിക്കുന്നയാളാണ് അഭിഷേക് ശ്രീകുമാർ. 2 ജെൻഡർ സ്ക്വാഡ് എന്നെഴുതിയ ടീ ഷർട്ടാണ് അഭിഷേക് ശ്രീകുമാർ ചില പോസ്റ്റുകളിൽ ധരിച്ചിരിക്കുന്നത്.

അതേസമയം അടുത്ത വൈൽഡ് കാർഡ് എൻട്രിയായ അഭിഷേക് ജയ്ദീപ് എൽ‌ജിബിടിക്യു പ്രതിനിധിയാണ്. 2023 ലെ മിസ്റ്റർ ​ഗേ വേൾഡ് റണ്ണറപ്പാണ്. ഓൺലൈൻ മീഡിയ അവതാരകയാണ് പൂജ കൃഷ്ണ. സോഷ്യൽ മീഡിയയിൽ പലപ്പോഴും വിമർശനങ്ങൾ വന്ന അവതാരക കൂ‌ടിയാണ് പൂജ കൃഷ്ണ. അനാവശ്യ ചോദ്യങ്ങൾ ചോദിക്കുന്നു, ക്യൂട്ട്നെസ് കാണിക്കാൻ‌ കോപ്രായം കാണിക്കുന്നു തുടങ്ങിയ കുറ്റപ്പെടുത്തലുകൾ പൂജ കൃഷ്ണയ്ക്കെതിര വരാറുണ്ട്.