നാത്തൂനായ ഡിവൈനിനോട് സംസാരിക്കാന്‍ പേടിയായിരുന്നു; കല്യാണം കഴിഞ്ഞ് വന്ന നാളുകളെ കുറിച്ച് ഡിംപിള്‍ റോസ്

ഡിംപിളിന്റെയും സഹോദരന്‍ ഡോണിന്റെയും വിവാഹം മുന്‍പ് ചര്‍ച്ചയാക്കപ്പെട്ടിരുന്നു. നടി മേഘ്‌ന വിന്‍സെന്റിനെയാണ് ഡോണ്‍ വിവാഹം കഴിച്ചത്. ഈ ബന്ധം വേര്‍പിരിഞ്ഞതോടെയാണ് താരകുടുംബം വീണ്ടും വാര്‍ത്തകളില്‍ നിറഞ്ഞത്. ശേഷം ഡോണ്‍ രണ്ടാമതും വിവാഹിതനായി. ഡിവൈന്‍ എന്നാണ് പെണ്‍കുട്ടിയുടെ പേര്. നാത്തൂന്‍ വീട്ടില്‍ വന്ന സമയത്തെ കുറിച്ചും പിന്നീട് തങ്ങളുടെ ജീവിതത്തിലുണ്ടായ മാറ്റങ്ങളും അനുവിനോട് സംസാരിക്കുമ്പോഴാണ് ഇരുവരും മനസ് തുറന്നത്.

വളരെ അധികം സംസാരിക്കുന്ന ആള്‍ക്കാരാണ് ഡിംപിളിന്റെ വീട്ടില്‍. പ്രത്യേകിച്ച് മമ്മി. എന്നാല്‍ ഡിവൈന്‍ വരുന്ന സമയത്ത് എല്ലായിടത്തും നിശബ്ദതയാണ്. ഡിവൈന്‍ നല്ലോണം സംസാരിക്കുന്ന ആളായത് കൊണ്ട് എല്ലാവരും മിണ്ടാതിരിക്കുമ്പോള്‍ വിഷമമായി തുടങ്ങി. ശരിക്കും അന്ന് ഈ വീട് ഒരു അവാര്‍ഡ് പടം പോലെയായിരുന്നെന്നാണ് ഡിവൈന്‍ പറയുന്നത്. മിണ്ടാതെ നടക്കുന്നത് ഡിവൈന് വിഷമമായെന്ന് മനസിലാക്കി തുടങ്ങിയതോടെ താനും സംസാരിച്ച് തുടങ്ങിയതായി ഡിംപിളിന്റെ മമ്മി പറയുന്നു.

എന്നാല്‍ നാത്തൂനായി വന്ന ഡിവൈനിനോട് തുടക്കത്തില്‍ സംസാരിക്കാന്‍ പേടിയായിരുന്നെന്നാണ് ഡിംപിള്‍ പറയുന്നത്. താനെന്തെങ്കിലും പറയുന്നത് ഡിവൈന്‍ എങ്ങനെയാണ് മനസ്സിലാക്കുന്നതെന്നും അവരത് എങ്ങനെ എടുക്കുമെന്നും അറിയില്ലല്ലോ. അതാണ് മിണ്ടാന്‍ മടിച്ചതിന് പിന്നില്‍. പിന്നെ ഞാന്‍ പൊതുവേ സംസാരം കുറവുള്ള ആളായിരുന്നെങ്കിലും ഡിവൈനിനൊപ്പം ചേര്‍ന്നതിന് ശേഷമാണ് ഇത്രയും സംസാരിച്ച് തുടങ്ങിയത്.

ഭര്‍ത്താവ് ആന്‍സനും സംസാരിക്കാന്‍ വളരെ താല്‍പര്യമുള്ള ആളാണ്. അദ്ദേഹമാണ് വീട്ടിലുള്ളവരുടെ മൗനം മാറ്റിയെടുത്തതെന്നും ഡിംപിള്‍ പറയുന്നു. ചോദിച്ചാല്‍ അതിന് മാത്രം മറുപടി പറയുന്ന എന്റെ ശീലം വിവാഹത്തോടെയാണ് മാറിയത്.

ഇപ്പോള്‍ എല്ലാവരും സംസാരിക്കാന്‍ തുടങ്ങിയാല്‍ അത് നിര്‍ത്താന്‍ പറ്റില്ലാത്ത അവസ്ഥയിലായി. യൂട്യൂബ് ചാനലില്‍ സജീവമായി വ്ളോഗ് ചെയ്യാന്‍ ഏറ്റവും വലിയ പിന്തുണ നല്‍കിയത് നാത്തൂനാണ്. കുഞ്ഞ് കൂടി ജനിച്ചതോടെ ജീവിതത്തില്‍ ഒത്തിരി മാറ്റങ്ങള്‍ സംഭവിച്ചതായിട്ടും നടി പറയുന്നു.