സർജറി കഴിഞ്ഞ് റൂമിലേക്ക് മാറ്റി, സുഖമായിരിക്കുന്നു, ആരാധകരോട് നന്ദി പറഞ്ഞ് കുടുംബവിളക്കിലെ അനിരുദ്ധ്

ദിവസങ്ങൾക്ക് മുൻപാണ് ശസ്ത്രക്രിയയ്ക്ക് വിധേയനാകുന്ന വിവരം ആനന്ദ് പങ്കുവെച്ചത്. ഫേസ്ബുക്കിലൂടെയാണ് നടൻ ഇക്കാര്യം വെളിപ്പെടുത്തിയതും. നട്ടെല്ലിലെ ശസ്ത്രക്രിയക്കായി കോസ്‌മോ ആശുപത്രിയിൽ അഡ്മിറ്റാണ്. നല്ലത് പ്രതീക്ഷിക്കുന്നു. എനിക്ക് വേണ്ടി പ്രാർത്ഥിക്കുക എന്ന് നടൻ സോഷ്യൽ മീഡിയ പേജിൽ പങ്കുവെച്ചിരുന്നു. അന്ന് താരത്തിന് രോഗശാന്തി നേർന്ന് നിരവധി ആരാധകരാണ് രംഗത്തുവന്നത്.

ഇപ്പോഴിതാ ആശുപത്രിയിൽ നിന്ന് പുതിയ വിശേഷം പങ്കുവെച്ച് നടൻ വീണ്ടും കടന്നുവരികയാണ്. സർജറിക്ക് ശേഷം റൂമിലേയ്ക്ക് മാറ്റിയെന്നും സുഖമായി ഇരിക്കുന്നുവെന്നും ആനന്ദ് പറയുന്നു. നടന്റെ വിശേഷം ആരാഞ്ഞ് സഹപ്രവർത്തകരും ആരാധകരും രംഗത്തെത്തിയിട്ടുണ്ട്. രോഗമുക്തനായി എത്രയും വേഗം മിനിസ്ക്രീനിൽ തിരികെവരികയെന്ന ആശംസയും ആരാധകർ നേരുന്നു.

അവതാരകനായി അഭിനയജീവിതം ആരംഭിച്ച ആനന്ദ്, 2014 ൽ പുറത്തുവന്ന സീരിയൽ വഴിയാണ് മുഖ്യധാരയിലേക്ക് എത്തുന്നത്. എന്നാൽ ആദ്യത്തെ സീരിയലിൽ താരത്തിന് ഏറെ ശോഭിക്കാനായില്ല. പിന്നീട് പുറത്തിറങ്ങിയ കാണാകണ്മണി, എന്ന് സ്വന്തം ജാനി, അരുന്ധതി, തുടങ്ങിയ സീരിയലുകളിലൂടെ മുൻനിര നായകന്മാരുടെ ഇടയിലേക്ക് താരം കടന്നെത്തി. ടൈപ്പ് കാസ്റ്റിൽ ഒതുങ്ങി നിൽക്കാതെ നായക കഥാപാത്രങ്ങൾക്കൊപ്പം വില്ലൻ കഥാപാത്രങ്ങളും തനിക്ക് വഴങ്ങുമെന്ന് തെളിയിക്കുകയായിരുന്നു അനിരുദ്ധ്. സ്വാതി നക്ഷത്രവും ചോതിയിലും മിന്നും പ്രകടനമാണ് ഇദ്ദേഹം കാഴ്ചവച്ചത്.

2020 ജനുവരി 27 ന് ആരംഭിച്ച കുടുംബവിളക്ക് പരമ്പര സംഭബഹുലമായ കഥഗതികളിലൂടെ മുന്നേറുകയാണ്. ബംഗാളി സീരിയൽ ശ്രീമോയീ എന്ന പരമ്പരയുടെ പുനരാവിഷ്കരണമാണ് കുടുംബവിളക്ക്. വലിയ വിദ്യാഭ്യാസമോ പുറം ലോകവുമായി ബന്ധമോ അവകാശപ്പെടാനില്ലാത്ത ഒരു വീട്ടമ്മയായ സുമിത്രയെ ചുറ്റിപ്പറ്റിയാണ് കഥ മുന്നോട്ട് സഞ്ചരിക്കുന്നത്.

കുടുംബത്തിന്റെ സന്തോഷത്തിന് വേണ്ടി സ്വന്തം ജീവിതം ത്യജിക്കുന്ന കഥാപാത്രമാണ് സുമിത്ര. മലയാളി പ്രേക്ഷകരുടെ പ്രിയപ്പെട്ട താരമായ മീര വാസുദേവാണ് സമുത്രയായി എത്തുന്നത്. സുമിത്രയുടെ ഭർത്താവ് സിദ്ധാർത്ഥ് മേനോനായി എത്തുന്നത് കെ കെ മേനോനാണ്. നടി ശരണ്യ ആനന്ദ്, നൂബിൻ ജോണി തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.