'അമ്മായിയമ്മയും മരുമോനും കണ്ടുമുട്ടിയപ്പോൾ'; ആതിര മാധവിനേയും കു‍ഞ്ഞിനേയും സന്ദർശിച്ച് അമൃത!

​ഗർഭിണിയായ ശേഷമാണ് ആതിര മാധവ് കുടുംബവിളക്കിൽ നിന്നും പിന്മാറിയത്. അമൃത നായർ മീര വാസുദേവ് അവതരിപ്പിക്കുന്ന കഥാപാത്രത്തിന്റെ മകളുടെ വേഷമാണ് അവതരിപ്പിച്ചിരുന്നത്.

കുറച്ച് എപ്പിസോഡുകളിൽ അഭിനയിച്ച ശേഷം ചില കാരണങ്ങൾ അമൃത നായർ കുടുംബവിളക്കിൽ നിന്നും പിന്മാറി. ഇപ്പോൾ മോഡലിങും വെബ് സീരിസ് അഭിനയവും യുട്യൂബ് വ്ലോ​ഗിങുമെല്ലാമായി അമൃത തിരക്കിലാണ്.

കുടുംബവിളക്കിൽ ഒരുമിച്ച് അഭിനയിച്ച ശേഷമാണ് ആതിര മാധവും അമൃതയും അടുത്ത സുഹൃത്തുക്കളായത്. ആതിരയ്ക്ക് അടുത്തിടെയാണ് ആൺകുഞ്ഞ് പിറന്നത്.

അമ്മയായ സന്തോഷം ആരാധകർ അറിഞ്ഞത് ആതിര പറയുന്നതിന് മുമ്പ് അമൃതയിലൂടെയായിരുന്നു. ആൺകുഞ്ഞ് ആണെന്നും എന്റെ മരുമകൻ എത്തിയെന്നുമൊക്കെയായിരുന്നു രസകരമായി അമൃത അറിയിച്ചത്.

പിന്നാലെ കുഞ്ഞിന്റെ മുഖം കാണിച്ച് ആതിരയും എത്തുകയായിരുന്നു. ഇപ്പോഴിത അമൃത നായർ തന്റെ പ്രിയ കൂട്ടുകാരിയുടെ കുഞ്ഞിനെ കാണാൻ പോയ സന്തോഷം പങ്കുവെച്ച് വീഡിയോയുമായി എത്തിയിരിക്കുകയാണ്.

കുഞ്ഞിന് കളിപ്പാട്ടങ്ങളും മറ്റുമായാണ് അമൃത പോയത്. ഇനി എന്നാണ് താൻ മരുമോനെ തന്റെ വീട്ടിലേക്ക് കൂട്ടികൊണ്ടുപോകാൻ വരേണ്ടത് എന്നാണ് അമൃത കുഞ്ഞിനോട് ചോദിക്കുന്നത്

വീഡിയോ ഇതിനോടകം വൈറലാണ്. കൂടാതെ പ്രസവ വേദനയെ കുറിച്ചും ലേബർ പെയിനിനെ കുറിച്ചുമെല്ലാം അമൃത ആതിരയോട് ചോദിക്കുന്നുണ്ട്. മൂന്ന് ദിവസം വേദന അനുഭവിച്ച ശേഷമാണ് പ്രസവിച്ചത് എന്നാണ് ആതിര പറയുന്നത്.

'എന്നെ കാണാൻ വരുന്നവരെല്ലാം പലതും പറഞ്ഞ് തെറ്റിദ്ധാരണകൾ നിറച്ചിരുന്നു. പെൺകുഞ്ഞ് പതുക്കയെ പുറത്തേക്ക് വരൂ.'

'ആൺകുട്ടിയാണെങ്കിൽ പ്രസവം വേ​ഗം നടക്കും എന്നൊക്കെയാണ് എന്നെ പരിചയമുള്ളവരൊക്കെ കാണാൻ വന്നപ്പോൾ പറഞ്ഞത്. മൂന്ന് ദിവസം നല്ല വേദന അനുഭവിച്ചു. പ്രസവിക്കാനുള്ള താമസം കണ്ട് ഞാൻ പെൺകുഞ്ഞായിരിക്കുമെന്നാണ് കരുതിയത്.'

'കുഞ്ഞ് പിറന്ന് ശേഷം കൈയ്യിലേക്ക് തന്നപ്പോൾ ആണാണോ പെണ്ണാണോ എന്ന് പോലും ചോദിക്കാൻ മറന്നുപോയി. കുറെനേരം കുഞ്ഞിനെ തന്നെ നോക്കി നിൽക്കുകയായിരുന്നു. വേദനപോലും മറന്നുപോയി' എന്നാണ് അമൃതയോട് ആതിര പ്രസവ അനുഭവത്തെ കുറിച്ച് പറഞ്ഞത്.

മറ്റുള്ളവരുടെ കുഞ്ഞിനെ കണ്ട് നടന്നാൽ പോരെന്നും വേ​ഗം വിവാ​ഹിതയാകാനും ആതിര അമൃതയെ ഉപദേശിക്കുന്നതും കാണാം. തിരുവനന്തപുരം സ്വദേശിനിയായ ആതിര മുന്നേയും ചില പരമ്പരകളിൽ എത്തിയിരുന്നെങ്കിലും ആളുകൾക്കിടയിൽ പ്രശസ്‍തയാകുന്നത് കുടുംബവിളക്കിലെ അനന്യയായാണ്.

അഭിനേത്രിയാകുന്നതിന് മുന്നേ അവതാരകയായും ആതിര എത്തിയിരുന്നു. അമൃതയും ആതിരയും കുടുംബവിളിക്കിൽ നിന്നും പിന്മാറിയതിനാൽ ഇവരുടെ വിശേഷങ്ങൾ ആരാധകർ അറിയുന്നത് ഇവരുടെ യുട്യൂബ് ചാനൽ വഴിയാണ്.