അനിയത്തിപ്രാവിലെ ആ കൂട്ടുകാരന്‍ വീണ്ടും ചാക്കോച്ചന് മുന്നില്‍! വൈറലായി വീഡിയോ

സ്‌പെന്‍ഡര്‍ ബൈക്ക് ഓടിച്ചുകൊണ്ടാണ് ഒരുപാട് ആരാധികമാരുടെ മനസിലേക്ക് ചാക്കോച്ചന്‍ എന്ന ചോക്ലേറ്റ് ഹീറോ കയറിവന്നത്. സിനിമയിലൂടനീളം ചാക്കോച്ചന്റെ സുധി എന്ന നായക കഥാപാത്രത്തിന് കൂട്ടായി ഈ ബൈക്കുമുണ്ടായിരുന്നു. വര്‍ഷങ്ങള്‍ക്ക് ശേഷം ഇതേ ബൈക്ക് വീണ്ടും കാണാന്‍ സാധിച്ചതിന്റെ സന്തോഷം ചാക്കോച്ചന്‍ പങ്കുവെച്ചിരുന്നു.

ഫ്‌ളവേഴ്‌സ് ടിവിയുടെ സ്റ്റാര്‍ മാജിക്ക് അണിയറ പ്രവര്‍ത്തകരാണ് സര്‍പ്രൈസ് നല്‍കി ഈ ബൈക്ക് കണ്ടുപിടിച്ച് താരത്തിന്റെ മുന്നിലെത്തിച്ചത്. തിരുവോണദിനത്തില്‍ സംപ്രേക്ഷണം ചെയ്യുന്ന ഓണം സ്‌പെഷ്യല്‍ എപ്പിസോഡിലാണ് ഇത് കാണിക്കുന്നത്. സ്റ്റാര്‍ മാജിക്കിന്റെതായി പുറത്തിറങ്ങിയ പുതിയ പ്രൊമോ വീഡിയോ സോഷ്യല്‍ മീഡിയയില്‍ ഒന്നടങ്കം വൈറലായി മാറിയിരിക്കുകയാണ്.

Recommended Video

നായകനായും വില്ലനായും തിളങ്ങിയ യുവനായകന്മാർ | filmibeat Malayalam

പഴയ സഹയാത്രികനെ വീണ്ടും കണ്ടതിന് പുറമെ ആ ബൈക്ക് ഓടിച്ചുനോക്കുകയും ചെയ്യുന്നുണ്ട് ചാക്കോച്ചന്‍. കുഞ്ചാക്കോ ബോബനൊപ്പം അവതാരക ലക്ഷ്മി നക്ഷത്രയും ബൈക്കില്‍ സ്റ്റേജ് വലംവെക്കുന്നത് കാണാം. സ്റ്റാര്‍ മാജിക്കിന്റെ പുതിയ പ്രൊമോ വീഡിയോ ചാക്കോച്ചനും തന്റെ ഇന്‍സ്റ്റഗ്രാം പേജില്‍ പങ്കുവെച്ചിരുന്നു.

അഞ്ചാം പാതിരയുടെ വന്‍വിജയത്തിന് പിന്നാലെ മലയാളത്തില്‍ ഈ വര്‍ഷം തിളങ്ങിനില്‍ക്കുന്ന താരമാണ് കുഞ്ചാക്കോ ബോബന്‍. മികച്ച പ്രതികരണത്തോടൊപ്പം ബോക്‌സോഫീസ് കളക്ഷന്റെ കാര്യത്തിലും ചിത്രം നേട്ടമുണ്ടാക്കിയിരുന്നു. അഞ്ചാം പാതിരയ്ക്ക് പിന്നാലെ കൈനിറയെ ചിത്രങ്ങള്‍ കുഞ്ചാക്കോ ബോബന്റെതായി അണിയറയില്‍ ഒരുങ്ങുന്നുണ്ട്.

മകന്‍ ഇസഹാക്ക് ജനിച്ചതിന് പിന്നാലെയാണ് കുഞ്ചാക്കോ ബോബന് തന്റെ കരിയറിലെ എറ്റവും വലിയ വിജയചിത്രം ലഭിച്ചത്. കഴിഞ്ഞ വര്‍ഷം എപ്രിലിലാണ് ഇസ ചാക്കോച്ചന്റെയും പ്രിയയുടെയും ജീവിതത്തിലേക്ക് വന്നത്. ഇസകുട്ടന്റെ പുതിയ വിശേഷങ്ങളെല്ലാം ചാക്കോച്ചന്‍ തന്റെ ഇന്‍സ്റ്റഗ്രാം പേജിലൂടെ പങ്കുവെക്കാറുണ്ട്. ചാക്കോച്ചനും പ്രിയയ്ക്കുമൊപ്പം ഇസയും ഇപ്പോള്‍ സോഷ്യല്‍ മീഡിയയിലെ താരമാണ്. അടുത്തിടെയായിരുന്നു ഇസയുടെ ഒന്നാം പിറന്നാളും ചാക്കോച്ചന്റെയും പ്രിയയയുടെയും വിവാഹവാര്‍ഷികവുമെല്ലാം കുടുംബം ആഘോഷിച്ചത്.