പ്രണയം വണ്‍സൈഡ് മാത്രമേ ഉണ്ടായിരുന്നുള്ളു; നാരായണ്‍കുട്ടിയുടെ പ്രണയകഥ പറഞ്ഞ് ഭാര്യ പ്രമീള

1990 ലായിരുന്നു വിവാഹം. തങ്ങളുടേത് പ്രേമ വിവാഹം ആയിരുന്നു. പക്ഷേ അത് വണ്‍സൈഡ് ആണ്. നാരായണ്‍കുട്ടി ചേട്ടന് മാത്രമേ ഉണ്ടായിരുന്നുള്ളു എന്നാണ് പ്രമീള പറയുന്നത്. സിനിമാക്കാരനെ വിവാഹം കഴിക്കുന്നതില്‍ വീട്ടുകാര്‍ക്ക് പ്രശ്‌നം ഉണ്ടായിരുന്നോ എന്ന ചോദ്യത്തിന് അങ്ങനെ കുഴപ്പം ഒന്നുമില്ലായിരുന്നു എന്നും താരപത്‌നി പറയുന്നു. സിനിമയിലെക്കാളും നാരായണന്‍കുട്ടിയുടെ തമാശ വീട്ടിലാണെന്നാണ് ഭാര്യയുടെ അഭിപ്രായം. എന്താണെങ്കിലും കോമഡി ആയിരിക്കും. അത് കേട്ട് കേട്ട് നമുക്ക് ദേഷ്യം വരുമെന്നും താരപത്‌നി പറയുന്നു.

വീട്ടില്‍ പച്ചക്കറികളും ഫ്രൂട്ടുസുമൊക്കെ നട്ട് വളര്‍ത്തിയാണ് പ്രമീള സമയം ചെലവഴിക്കുന്നത്. ടെറസിലെ കൃഷിയെ കുറിച്ചുള്ള എംജിയുടെ സംശയങ്ങള്‍ക്ക് അവര്‍ മറുപടി പറയുകയും ചെയ്തിരുന്നു. വിവാഹം കഴിഞ്ഞ് വര്‍ഷങ്ങള്‍ക്ക് ശേഷമാണ് നാരായണന്‍കുട്ടിയ്ക്കും ഭാര്യ പ്രമീളയ്ക്കും ഒരു കുഞ്ഞ് ജനിക്കുന്നത്. മകള്‍ ഭാഗ്യലക്ഷ്മിയുടെ ജനനം എങ്ങനെയായിരുന്നുവെന്ന് താരങ്ങള്‍ അഭിമുഖത്തില്‍ വ്യക്തമാക്കിയിരുന്നു.

പതിനേഴ് വര്‍ഷത്തെ കാത്തിരിപ്പിനൊടുവിലാണ് ഒരു കുഞ്ഞിനെ കിട്ടുന്നത്. അത്രയും കാലം വേദനാജനകമായിരുന്നോ എന്ന ചോദ്യത്തിന് തനിക്ക് അത്ര വേദന ഇല്ലായിരുന്നുവെന്നും ഭാര്യയാണ് കൂടുതല്‍ സങ്കടപ്പെട്ടതെന്നും നാരായണന്‍കുട്ടി പറയുന്നു. ഞാന്‍ ഷൂട്ടിങ്ങിനും മറ്റ് പരിപാടികള്‍ക്കുമൊക്കെ പോയി തിരക്കിലായിരിക്കും. പക്ഷേ ഇയാള്‍ അങ്ങനെ അല്ലായിരുന്നു. അതുകൊണ്ട് വിഷമം മുഴുവന്‍ അനുഭവിച്ചത് ഇവളായിരുന്നു. നാട്ടുകാരുടെ ചോദ്യങ്ങളും അതിനുള്ള മറുപടിയും പറഞ്ഞ് നമുക്ക് നാണക്കേട് ആയി പോവും. അതൊക്കെ കേട്ട് ഇവള്‍ക്ക് വിഷമമാവും. സാരമില്ലടോ, സമയം ആവുമ്പോള്‍ നമുക്ക് തമ്പുരാന്‍ തരുമെന്ന് ഞാനും പറയും.

ആവണങ്ങാട്ട് വിഷ്ണുമായയുടെ ആരാധകനാണ് ഞാന്‍. ചാത്തന്‍സ്വാമിയാണ്. അവിടെ പോയി പ്രാര്‍ഥിച്ചു. ചാത്തന്‍സേവ എന്നൊക്കെ പറയുമ്പോള്‍ ആളുകള്‍ക്ക് പേടിയാണ്. എന്താണെന്ന് അറിയാന്‍ പാടില്ലാത്തത് കൊണ്ടാണ്. അതെന്താണെന്ന് അറിഞ്ഞാലേ അതിന്റെ ഗുണം ഉണ്ടാവുകയുള്ളു. അങ്ങനെ വിഷ്ണുമായ അനുഗ്രഹിച്ച് ഒരു മകള്‍ ഉണ്ടായി. ഭാഗ്യലക്ഷ്മി എന്നാണ് മകളുടെ പേര്. മാതാപിതാക്കള്‍ക്കൊപ്പം ഭാഗ്യലക്ഷ്മിയും പരിപാടിയില്‍ വന്നിരുന്നു. എംജിയുടെ നിര്‍ദ്ദേശപ്രകാരം താരപുത്രി മനോഹരമായൊരു പാട്ട് പാടിയിട്ടാണ് അവിടെ നിന്നും പോയത്.