ബിഗ് ബോസ് മല്‍സരാര്‍ത്ഥികള്‍ക്ക്‌ ആശംസയുമായി പേളി! രണ്ട് സൂപ്പര്‍ സ്റ്റാറുകളെന്ന് ഷിയാസ്‌

ബിഗ് ബോസ് മലയാളത്തിന്റെ പുതിയ സീസണ്‍ കഴിഞ്ഞ ദിവസമാണ് ആരംഭിച്ചത്. രണ്ടാം സീസണിലെ മല്‍സരാര്‍ത്ഥികള്‍ക്ക് ആശംസ നേര്‍ന്നുകൊണ്ടുളള പേളി മാണിയുടെ ഇന്‍സ്റ്റഗ്രാം പോസ്റ്റ് ശ്രദ്ധേയമായി മാറിയിരുന്നു. ബിഗ് ബോസ് രണ്ടാം സീസണ്‍ മല്‍സാര്‍ത്ഥികള്‍ക്ക് ചിയേഴ്‌സ് അറിയിച്ചുകൊണ്ടാണ് പേളി എത്തിയിരിക്കുന്നത്. ബിഗ് ബോസ് തമിഴിലൂടെ തരംഗമായ നടി ഓവിയയ്‌ക്കൊപ്പമുളള ഒരു ചിത്രം പങ്കുവെച്ചുകൊണ്ടാണ് പേളി എത്തിയത്.

വലിയ ആഘോഷങ്ങളോടെയാണ് ബിഗ് ബോസിന്റെ പുതിയ സീസണ് കഴിഞ്ഞ ദിവസം തുടക്കമായത്. ഇത്തവണ 17 മല്‍സരാര്‍ത്ഥികളാണ് റിയാലിറ്റി ഷോയില്‍ പങ്കെടുക്കുന്നത്. മാസ് എന്‍ട്രിയോടെയാണ് അധികപേരും ബിഗ് ബോസ് വേദിയിലേക്ക് എത്തിയത്. എല്ലാവരെയും അവതാരകനായ മോഹന്‍ലാല്‍ തന്നെയാണ് സ്വീകരിച്ചത്.

ബിഗ് ബോസിലേക്ക്‌ വരാനുളള കാരണം എല്ലാവരോടും ലാലേട്ടന്‍ ചോദിച്ചിരുന്നു. കഴിഞ്ഞ സീസണ്‍ കണ്ടിരുന്നുവെന്നും ബിഗ് ബോസിന്റെ പുതിയ പതിപ്പില്‍ പങ്കെടുക്കാന്‍ താല്‍പര്യമുണ്ടായിരുന്നു എന്നുമാണ് അധികപേരും പറഞ്ഞത്. ഇത്തവണ ചെന്നൈയിലാണ് ബിഗ് ബോസിന്റെ വേദി ഒരുക്കിയിരിക്കുന്നത്. അപ്രതീക്ഷിത ട്വിസ്റ്റുകളും,ടാസ്‌ക്കളും പുതിയ സീസണിലും ഉണ്ടാവും. വിവിധ മേഖലകളില്‍ നിന്നായുളള 17പേരാണ് ബിഗ് ബോസില്‍ പങ്കെടുക്കുന്നത്.

ഇതില്‍ കുറച്ചു പേര്‍ പ്രേക്ഷകര്‍ക്ക് സുപരിചിതരാണെങ്കിലും മറ്റുളളവരെ ആദ്യമായിട്ടാണ് അധികപേരും കാണുന്നത്. നൂറ് ദിവസം നീണ്ടുനില്‍ക്കുന്ന പരിപാടിയിലെ പുതിയ സംഭവ വികാസങ്ങള്‍ക്കായുളള കാത്തിരിപ്പിലാണ് എല്ലാവരും. നേരത്തെ ബിഗ് ബോസ് 2വില്‍ പങ്കെടുക്കുന്നവര്‍ക്ക് ആശംസകളുമായി ആദ്യ സീസണിലെ മല്‍സരാര്‍ത്ഥികള്‍ എത്തിയിരുന്നു. ആശംസയ്‌ക്കൊപ്പം ചില ഉപദേശങ്ങളും നല്‍കികൊണ്ടാണ് ഇവര്‍ എത്തിയത്.