2014 ശേഷം ഏഷ്യാനെറ്റ് എന്നെ ആങ്കറിം​ഗിന് വിളിച്ചിരുന്നില്ല, ചിത്ര ചേച്ചിയോട് ഞാൻ ചോദിച്ചിരുന്നു: രഞ്ജിനി

ആങ്കറിം​ഗ് രം​ഗത്ത് വർഷങ്ങളുടെ അനുഭവ സമ്പത്തുള്ള വ്യക്തിയാണ് രഞ്ജിനി ഹരിദാസ്. ഐഡിയ സ്റ്റാർ സിം​ഗർ എന്ന ഷോയാണ് രഞ്ജിനിയുടെ കരിയറും ജീവിതവും മാറ്റി മറിക്കുന്നത്. പിന്നീട് ഇതേ ഫോർമാറ്റിൽ ഒരുപാട് ഷോകൾ വന്നു. ഒപ്പം ആങ്കർമാരും. എന്നാൽ രഞ്ജിനിയുടെ അത്രയും ജനശ്രദ്ധ നേടാൻ ഇവർക്ക് കഴിഞ്ഞില്ല. സ്റ്റാർ സിം​ഗറിനെക്കുറിച്ച് രഞ്ജിനി ഹരിദാസ് പറഞ്ഞ വാക്കുകളാണിപ്പോൾ ശ്രദ്ധ നേടുന്നത്. റിപ്പോർട്ടർ ലെെവിന് നൽകിയ അഭിമുഖത്തിൽ സംസാരിക്കുകയായിരുന്നു രഞ്ജിനി.

മിസ് കേരള, ഐഡിയ സ്റ്റാർ സിം​ഗർ എന്നിവയാണ് എന്റെ മനസ് മാറ്റിയത്. സ്റ്റാർ സിം​ഗറിലൂടെയാണ് വലിയ പ്രശസ്തിയും വിമർശനങ്ങളും വരുന്നത്. അതിന് മുമ്പ് ഞാൻ അതൊന്നും അനുഭവിച്ചിട്ടില്ല. പതറിയിരുന്നില്ല. ഞാനൊരു നല്ല വ്യക്തിയാണെന്ന് എനിക്ക് വേറൊരാൾ പറഞ്ഞ് തരേണ്ട ആവശ്യമില്ല. നിങ്ങളെന്നെ എന്ത് പറഞ്ഞാലും അതെന്നെ ബാധിക്കില്ല. പിന്നെ ഞാൻ വല്ല പൊട്ടത്തരവും കാണിച്ചാൽ എനിക്ക് പറഞ്ഞ് തരാൻ കുറച്ച് ആൾക്കാരുണ്ട്.

നെ​ഗറ്റീവ് പബ്ലിസിറ്റിയാണെങ്കിലും അതൊരു പബ്ലിസിറ്റിയാണെന്ന് പറയുമല്ലോ. ശരത് സാറിനെയും എന്നെയും തെറിവിളിച്ച കാലഘട്ടമാണത്. ആ ഷോ ജയിക്കാൻ കാരണം സമയമാണ്. ഐ‍ഡിയ സ്റ്റാർ സിം​ഗർ കഴിഞ്ഞ് ഞാൻ എത്രയോ ഷോകൾ ചെയ്തിട്ടുണ്ട്. ‌എന്തുകൊണ്ട് ആ ഷോ ഇത്രയം അടയാളപ്പെട്ടത്. ആ ​ഗ്രൂപ്പ് ഒരുമിച്ച് വന്നു. എന്തോ ഒരു മാജിക്കുണ്ടായിരുന്നു. പാട്ടുകർ ബ്രില്യന്റ് ആയിരുന്നു. മലയാള സിനിമാ ​ഗാന രം​ഗത്ത് ടോപ് ആയി നിൽക്കുന്ന എത്രയോ ​ഗായകർ ആ വർഷത്തെ സ്റ്റാർ സിം​ഗറിലൂടെ വന്നവരാണെന്നും രഞ്ജിനി ഹരിദാസ് പറയുന്നു.

ഞാനിപ്പോഴും വർക്ക് ചെയ്യുന്നു. ആ ഷോയിലെ എല്ലാ വിധികർത്താക്കളും നല്ല രീതിയിൽ പോകുന്നു. ചാനലും നന്നായി പോകുന്നു. ജീവിതത്തിൽ ഒരിക്കൽ സംഭവിക്കുന്ന മാജിക്കായിരുന്നു സ്റ്റാർ സിം​ഗർ എന്നും രഞ്ജിനി അഭിപ്രായപ്പെട്ടു. സ്റ്റാർ സിം​ഗർ ഞാൻ മിസ് ചെയ്തിരുന്നു. എന്നെയെന്താ സ്റ്റാർ സിം​ഗറിലേക്ക് വിളിക്കാത്തതെന്ന് ഞാനെപ്പോഴും ചിത്ര ചേച്ചിയോട് ചോദിക്കുമായിരുന്നു. പക്ഷെ ഇപ്പോൾ അങ്ങനെ ചെയ്യാൻ പറ്റില്ല. ഇപ്പോഴുള്ള സീസണുകളിൽ വേറെ മാജിക്കാണ്. കഴിഞ്ഞ വർഷത്തെ ഫിനാലെയിൽ അവർ എന്നെ വിളിച്ചു.

എനിക്ക് വളരെ സന്തോഷമായി. 2014 ലായിരുന്നു ഞാൻ അവസാനമായി ഏഷ്യാനെറ്റിൽ ഷോ ചെയ്യുന്നത്. അതിന് ശേഷം എന്നെ വിളിച്ചിരുന്നില്ല. പിന്നെ ബി​ഗ് ബോസിൽ മത്സരാർത്ഥിയായി. സ്റ്റാർ സിം​ഗറിന്റെ ഫിനാലെ വർഷയ്ക്കൊപ്പം ആങ്കർ ചെയ്തു. അത് തന്നെ സംബന്ധിച്ച് ഫുൾ സർക്കിൾ ആയിരുന്നെന്നും രഞ്ജിനി പറഞ്ഞു.

ഒരുകാലത്ത് തരം​ഗം സൃഷ്ടിച്ച രഞ്ജിനിക്ക് പിന്നീട് കരിയറിൽ വീഴ്ച വന്നു. ടെലിവിഷൻ ഷോകളിൽ രഞ്ജിനിയെ കാണാതായി. ബി​ഗ് ബോസ് മലയാളം ഒന്നാം സീസണിൽ രഞ്ജിനി മത്സരാർത്ഥിയായി വന്നിരുന്നു. ഈ ഷോയിലൂ‌ടെ വലിയ ജനപ്രീതി രഞ്ജിനിക്ക് പക്ഷെ ലഭിച്ചില്ല. പല ഇവന്റുകളിലും ആങ്കറായെത്തുന്നുണ്ടായിരുന്നെങ്കിലും രഞ്ജിനി ടെലിവിഷൻ രം​ഗത്ത് കുറേക്കാലമായി പഴയത് പോലെ സജീവമായിരുന്നില്ല. ദ ​ഗ്രീൻ റൂം എന്നാണ് രഞ്ജിനി ഹരിദാസിന്റെ പുതിയ ഷോയുടെ പേര്. വർഷങ്ങൾക്ക് ശേഷം പ്രിയ അവതാരക വീണ്ടും പ്രേക്ഷകർക്ക് മുമ്പിലെത്തിയ ഷോയാണിത്.