റിമി ടോമിയുടെ ആദ്യ പ്രണയം; സൂപ്പര്‍ 4 വേദിയില്‍ പ്രണയ കഥകള്‍ പറഞ്ഞ് പ്രിയ താരങ്ങള്‍, ഒപ്പം പ്രയാഗയും

ആദ്യാനുരാഗം എന്ന് പറയുന്നത് വളരെയധികം വിലയേറിയതാണ്. തനിക്ക് ഓര്‍മ്മയിലുള്ളത് സ്‌കൂളില്‍ പഠിക്കുമ്പോള്‍ ഉണ്ടായിരുന്ന പ്രണയത്തെ കുറിച്ചാണ് റിമി ടോമി പറഞ്ഞത്. സ്‌കൂളില്‍ നിന്ന് താന്‍ വരുമ്പോള്‍ അദ്ദേഹം ഓപ്പോസിറ്റ് വന്ന് നില്‍ക്കും. ആ സമയത്ത് അറിയാതെ നോക്കി പോകാറുണ്ടെന്ന് മാത്രമേ റിമി പറയുന്നുള്ളു. ബാക്കി എപ്പിസോഡിലായിരിക്കും ഉണ്ടാവുക. അതേ സമയം ജ്യോത്സനയുടെ ആദ്യ പ്രണയം മലയാളിയോട് ആയിരുന്നില്ല. അതൊരു ഗുജറാത്തി ആയിരുന്നു.

വിധു പ്രതാപും സിത്താരയുമൊക്കെ തങ്ങളുടെ പ്രണയത്തെ കുറിച്ചുള്ള രസകരമായ ഓരോ കാര്യങ്ങള്‍ വേദിയില്‍ വെളിപ്പെടുത്തുന്നുണ്ട്. ഇത്തവണ വാലന്റൈന്‍സ് ഡേ പ്രമാണിച്ച് നടി പ്രയാഗ മാര്‍ട്ടിനായിരുന്നു സൂപ്പര്‍ ഫോറിന്റെ വേദിയിലെത്തിയ അതിഥി താരം. പ്രയാഗയുടെ പ്രണയത്തെ കുറിച്ചും ചോദ്യം ഉയര്‍ന്ന് വന്നിരുന്നു. പ്രായഗയ്ക്ക് ബോയ്ഫ്രണ്ട് ഉണ്ടോ, നിങ്ങളിപ്പോള്‍ റിലേഷന്‍ഷിപ്പില്‍ ആണോ, പ്രണയിക്കുന്നുണ്ടോ? എന്നിങ്ങനെയുള്ള ചോദ്യങ്ങളെ കുറിച്ച് പ്രായഗ തുറന്ന് സംസാരിച്ചിരുന്നു.

മത്സരാര്‍ഥിയുമായി പ്രണയ ഗാനത്തിന് ചുവടുവെച്ച പ്രയാഗ അവതാരകനുമായി ഇന്നൊരു ദിവസത്തേക്ക് മാത്രം പ്രണയിക്കാമെന്ന് പറയുന്നുണ്ട്. മാത്രമല്ല പ്രയാഗയുടെ മനസിലുള്ള ആളെ വേദിയില്‍ വെളിപ്പെടുത്തുകയും ചെയ്തിരുന്നു. ടൊവിനോ ആണോന്ന് സംശയം ഉണര്‍ത്തുന്ന തരത്തിലുള്ള ഫോട്ടോയാണ് വേദിയില്‍ തുറന്ന് കാണിച്ചതെങ്കിലും ആരാണെന്ന് വ്യക്തമാക്കിയില്ല. ഫെബ്രുവരി പതിനാലിന് വൈകുന്നേരം 7 മണി മുതലാണ് പരിപാടിയുടെ സംപ്രേക്ഷണം നടക്കുന്നത്. ഇത്തവണ പ്രേക്ഷകരെ ത്രില്ലടിപ്പിക്കുന്ന തുറന്ന് പറച്ചിലുകളായിരിക്കും ഷോ യില്‍ ഉണ്ടാവുകയെന്നാണ് പ്രൊമോ വീഡിയോയിലൂടെ അറിയുന്നത്.

അടുത്തിടെ സൂപ്പര്‍ 4 നെ കുറിച്ച് തുറന്ന് സംസാരിച്ച് റിമി എത്തിയിരുന്നു. ഗായിക കൂടിയായ തനിക്ക് കൂടുതല്‍ കാര്യങ്ങള്‍ പഠിക്കാനുള്ള അവസരമാണ് ഈ ഷോ യിലൂടെ ലഭിക്കുന്നത്. തനിക്കൊപ്പമുള്ള മറ്റ് സുഹൃത്തുക്കള്‍ക്കൊപ്പം ചേര്‍ന്ന് ഏറ്റവും മനോഹരമായ നിമിഷങ്ങളാണ് ഷോയിലൂടെ ലഭിക്കുന്നതെന്നും റിമി സൂചിപ്പിച്ചിരുന്നു.