പുറത്തുള്ളവരെല്ലാം ബിഗ് ഹൗസില്‍! സാബുവിനായി ആര്‍പ്പുവിളി! ആരാവും അന്തിമ വിജയി? കാണൂ!

സാബുവിനായുള്ള ആര്‍പ്പുവിളി

സോഷ്യല്‍ മീഡിയയിലൂടെ മികച്ച പിന്തുണയാണ് സാബുവിന് ലഭിക്കുന്നത്. സാബു ആര്‍മിയിലൂടെയാണ് ആരാധകര്‍ അദ്ദേഹത്തിനായി വോട്ട് ചെയ്യാന്‍ അഭ്യര്‍ത്ഥിക്കുന്നത്. ബിഗ് ബോസിലെ ശക്തരായ മത്സരാര്‍ത്ഥികളിലൊരാളാണ് സാബു. ടാസ്‌ക്കുകളിലെല്ലാം മികച്ച പ്രകടനമാണ് അദ്ദേഹം പുറത്തെടുക്കുന്നത്. തന്റെ അഭിപ്രായം കൃത്യമായി വ്യക്തമാക്കിയാണ് അദ്ദേഹം മുന്നേറുന്നത്. സാബുവെന്ന വ്യക്തിയുടെ ഇതുവരെ കാണാത്ത മുഖം കൂടിയാണ് ബിഗ് ബോസിലൂടെ പുറത്തുവന്നത്. അദ്ദേഹമാണ് വിജയിക്കാന്‍ അര്‍ഹനെന്ന് ആരാധകര്‍ മാത്രമല്ല ഇടവേളയ്ക്ക് ശേഷം ബിഗ് ഹൗസിലേക്ക് തിരികയെത്തിവരും ഇക്കാര്യം ശരിവെക്കുകയാണ്.

തരികിട ഇമേജ് മാറ്റി

സോഷ്യല്‍ മീഡിയയിലൂടെ മോശം പരാമര്‍ശങ്ങളും കമന്റുകളുമൊക്കെയായി വാര്‍ത്തകളില്‍ നിറഞ്ഞുനിന്നിരുന്ന സാബു. പൊതുവെ അത്ര നല്ല ഇമേജല്ല സാബുവിനെക്കുറിച്ചുണ്ടായിരുന്നത്. തരികിട എന്ന പരിപാടിയിലെപ്പോലെ തന്നെ ആളും മഹാതരികിടയാണെന്നായിരുന്നു പൊതുവിലുള്ള ധാരണ. എന്നാല്‍ തരികിട ഇമേജൊക്കെ മാറ്റി ഇപ്പോള്‍ ഗൂഗിള്‍ സാബുവായി മാറിയിരിക്കുകയാണ് അദ്ദേഹം. മത്സരത്തിലെ എന്റര്‍ടൈയിനര്‍മാരിലൊരാള്‍ കൂടിയാണ് അദ്ദേഹം. അദ്ദേഹമാണ് ബിഗ് ബോസ് സീസണ്‍ ഒന്നിലെ വിജയി എന്നാണ് അര്‍ച്ചന പറയുന്നത്.

ബിഗ് ബോസെന്നാല്‍ സാബുവാണ്

തുടക്കത്തിലെ ഒന്നോ രണ്ട് എപ്പിസോഡുകളില്‍ മാത്രമേയുണ്ടായിരുന്നുള്ളൂവെങ്കിലും പലരും തന്നോട് ബിഗ് ബോസില്‍ ഉണ്ടായിരുന്നില്ലേയെന്ന് ചോദിക്കാറുണ്ടെന്നും ഇത് വളരെയധികം സന്തോഷമുള്ള കാര്യമാണെന്നും മനോജ് വര്‍മ്മ പറഞ്ഞിരുന്നു. ക്ലീന്‍ ചെയ്യാനായി മുഖംമൂടി ധരിച്ചാണ് അദ്ദേഹം ബി്ഗ് ഹൗസിലേക്കെത്തിയത്. ശ്രിനിഷാണ് ആദ്യം താരത്തെ തിരിച്ചറിഞ്ഞത്. തന്നെ സംബന്ധിച്ച് ബിഗ് ബോസെന്നാല്‍ സാബു ചേട്ടനാണെന്നും അദ്ദേഹമാണ് അത് അര്‍ഹിക്കുന്നതെന്നും താരം പറയുന്നു.

സാബു ചേട്ടന്‍ ജയിക്കണം

ബിഗ് ബോസിലേക്ക് തിരികെയെത്തിയപ്പോള്‍ മുതല്‍ ദിയ സാബുവിനെ ഇടിക്കുകയായിരുന്നു. ഇവരുടെ ഇടി താങ്ങാനാവുന്നില്ലെന്നും തന്നെ രക്ഷിക്കണമെന്നുമായിരുന്നു സാബു പറഞ്ഞത്. തന്റെ അഭിപ്രായത്തില്‍ സാബു ചേട്ടന്‍ തന്നെ ജയിക്കണമെന്നാണ് ആഗ്രഹമെന്നും ദിയ സന പറയുന്നു. ഇടവേളയ്ക്ക് ശേഷം തിരികയെത്തിയതിന്റെ സന്തോഷം താരം പങ്കുവെച്ചിരുന്നു. ഇവിടെ നിന്ന് പോയപ്പോഴാണ് ബിഗ് ഹൗസ് എത്രത്തോളം മിസ്സ് ചെയ്യുന്നുവെന്ന് മനസ്സിലാക്കിയതെന്നും താരം പറയുന്നു.

ഷിയാസാണ് അര്‍ഹിക്കുന്നത്

സാബുവാണ് നന്നായി കളിക്കുന്നതെങ്കിലും വിജയം അര്‍ഹിക്കുന്നത് ഷിയാസാണ്. വിജയിക്കുന്നതിനായി ഏതറ്റം വരെയും പോകാവുന്ന തരത്തിലാണ് അദ്ദേഹത്തിന്റെ നീക്കമെന്നാണ് ഹിമ പറയുന്നത്. അദ്ദേഹത്തെ നന്നായി മനസ്സിലാക്കിയിട്ടുണ്ടെന്നും ഗെയിമില്‍ പിടിച്ചുനില്‍ക്കുന്നതിനായി ഏത് തരത്തിലുള്ള തന്ത്രവും പയറ്റുമെന്നും താരം ഷിയാസിനോടും പറഞ്ഞിരുന്നു. പുതിയ മേക്കോവറിലാണ് ഹിമയെത്തിയത്. ഷിയാസുമായി ഇക്കാര്യത്തെക്കുറിച്ച് താരം സംസാരിച്ചിരുന്നു.

രഞ്ജിനിയുടെ പിന്തുണ

മത്സരത്തില്‍ സാബുവും ഉണ്ടെന്നറിഞ്ഞപ്പോള്‍ തന്നെ വഴക്ക് ഉറപ്പാണെന്ന് താന്‍ ഉറപ്പിച്ചിരുന്നുവെന്ന് രഞ്ജിനി പറഞ്ഞിരുന്നു. ഫേസ്ബുക്കിലൂടെ തന്നെ അപമാനിക്കാന്‍ ശ്രമിച്ച കാര്യത്തെക്കുറിച്ച് താരം നേരിട്ട് ചോദിക്കുകയും ചെയ്തിരുന്നു. എന്നാല്‍ കൃത്യമായ മറുപടി നല്‍കാതെ ഒഴിഞ്ഞു മാറുകയായിരുന്നു സാബു. അടുത്തറിഞ്ഞപ്പോഴാണ് സാബുവിനെ കൂടുതല്‍ മനസ്സിലായതെന്നും തെറ്റിദ്ധാരണകളെല്ലാം മാറിയെന്നും രഞ്ജിനി പിന്നീട് പറഞ്ഞിരുന്നു. ഇരുവരും അടുത്ത സുഹൃത്തുക്കളായി മാറിയിരുന്നു. അദ്ദേഹം തന്നെ നന്നായി അവതരിപ്പിച്ചുവെന്നും അദ്ദേഹം തന്നെ ജയിക്കുമെന്നുമാണ് രഞ്ജിനി പറയുന്നത്.

ഷിയാസിന് കിട്ടിയിരുന്നേല്‍ നന്നായേനെ

ഒരുകോടി രൂപയുടെ ഫ്‌ളാറ്റ് ഷിയാസിന് ലഭിക്കണമെന്നാണ് താന്‍ ആഗ്രഹിക്കുന്നതെന്ന് അനൂപ് ചന്ദ്രന്‍ പറയുന്നു. സ്വന്തമായി വീടോ സ്ഥലമോ ഇല്ലാത്ത ഷിയാസിനെ സംബന്ധിച്ചിടത്തോളം അത് വലിയ കാര്യമാണ്. എന്നാല്‍ പ്രകടനത്തില്‍ മുന്നിട്ട് നില്‍ക്കുന്നത് സാബുവാണ്. അതിനാല്‍ അദ്ദേഹം തന്നെയായിരിക്കും വിജയിക്കുന്നതെന്നാണ് അനൂപ് പറയുന്നത്.

ശ്രീലക്ഷ്മി പറയുന്നത്?

ശ്രീലക്ഷ്മി ഇടയ്ക്ക് വെച്ച് മത്സരത്തില്‍ നിന്നും പുറത്തേക്ക് പോയിരുന്നു. പോയവരെല്ലാം തിരികയെത്തിയപ്പോള്‍ തനിക്ക് വരാന്‍ കഴിയാത്തതിന്റെ വിഷമം താരം പങ്കുവെച്ചിരുന്നു. എല്ലാവരെയും തന്‍രെ സ്‌നേഹന്വാഷേണം അറിയിക്കാനായി താരം പറഞ്ഞിരുന്നുവെന്ന് ദിയയാണ് അറിയിച്ചത്. സാബു ചേട്ടന്‍ വിജയിക്കണമെന്നാണ് ആഗ്രഹിക്കുന്നതെന്നാണ് ശ്രീലക്ഷ്മിയും പറഞ്ഞത്.

ഡേവിഡിനും അതേ അഭിപ്രായം

ആദ്യ ആഴ്ചയിലെ എലിമിനേഷനിലൂടെ പുറത്തേക്ക് പോയ ആളാണ് ഡേവിഡ് ജോണ്‍. തന്നെ സംബന്ധിച്ചിടത്തോളം ബിഗ് ബോസ് നല്ലൊരു അനുഭവമായിരുന്നു. സ്വേത മേനോനെയും രഞ്ജിനി ഹരിദാസിനെയും പരിചയപ്പെടാന്‍ കഴിഞ്ഞതും മോഹന്‍ലാലിനൊപ്പം സ്‌ക്രീനില്‍ നില്‍ക്കാന്‍ കഴിഞ്ഞതും അതുല്യ ഭാഗ്യമായാണ് അദ്ദേഹം കാണുന്നത്. ടാസ്‌ക്കുകളെ സമീപിക്കുന്ന രീതിയായാലും മറ്റ് കാര്യങ്ങളിലായാലും മുന്നിട്ട് നില്‍ക്കുന്നത് സാബുവാണ്. അദ്ദേഹം ജയിക്കണമെന്നാണ് ആഗ്രഹമെന്ന് ഡേവിഡും പറയുന്നു.