സാന്ത്വനം സീരിയല്‍ പ്രേക്ഷകര്‍ക്ക് സന്തോഷിക്കാം; റേറ്റിങ്ങില്‍ കുടുംബവിളക്കിനെ പിന്നീലാക്കി സാന്ത്വനം ഒന്നാമത്

സുമിത്രയുടെയും വേദികയുടെയും പോരാട്ടങ്ങളും അതിജീവനവുമെല്ലാം ഒത്തൊരുമിച്ച് വന്നതോടെയാണ് കുടുംബവിളക്ക് റേറ്റിങ്ങില്‍ ഒന്നാമത് എത്തിയത്. നിരന്തരം വേദിക പരാജയപ്പെടുകയും സുമിത്ര വിജയിക്കുകയും ചെയ്യുന്നത് പ്രേക്ഷകരെയും ആകാംഷയിലാക്കി. ഇതോടെ മറ്റ് സീരിയലുകളൊക്കെ ഒപ്പം മത്സരിക്കേണ്ട അവസ്ഥയായിരുന്നു. എന്നാല്‍ കഴിഞ്ഞ കുറച്ച് ആഴ്ചകളായി കഥയില്‍ വരുത്തിയ മാറ്റം ഓഡിയന്‍സ് ഉള്‍കൊള്ളാന്‍ സാധിച്ചിരുന്നില്ല. സുമിത്രയുടെ മകന്‍ അനിരുദ്ധും സഹപ്രവര്‍ത്തകയുമായ ഇന്ദ്രജയും തമ്മിലുള്ള സൗഹൃദമാണ് അതിലൊരു പ്രധാന കാരണം. അത് തീരെ യോജിക്കുന്നതല്ലെന്നാണ് ഭൂരിഭാഗം പ്രേക്ഷകരുടെയും അഭിപ്രായം.

അത് മാത്രമല്ല നിരന്തരം വിജയങ്ങള്‍ നേടി കൊണ്ടിരുന്ന സുമിത്രയ്ക്ക് വന്ന തിരിച്ചടിയാണ് പുതിയ കഥ. വേദികയുടെ പ്രതികാരമായി കള്ളക്കേസില്‍ സുമിത്രയെ ജയിലിലേക്ക് പിടിച്ച് കൊണ്ട് പോയിരിക്കുകയാണ്. തെറ്റ് ചെയ്യാത്തവരെ അറസ്റ്റ് ചെയ്യുന്നത് എങ്ങനെയാണെന്ന് ചോദിച്ച് ആരാധകരും രംഗത്ത് വന്നിരുന്നു. എന്തായാലും ഈ രണ്ട് സംഭവങ്ങളും മാറ്റിയില്ലെങ്കില്‍ റേറ്റിങ്ങില്‍ താഴെ പോകുമെന്നായിരുന്നു ചിലരുടെ മുന്നറിയിപ്പ്. പുതിയ കണക്ക് വിവരം വന്നതോടെ പ്രേക്ഷകര്‍ പറഞ്ഞത് പോലെ നടന്നിരിക്കുകയാണ്. ഒന്നാം സ്ഥാനത്ത് നിന്നും പോയിന്റുകളുടെ വ്യത്യാസത്തില്‍ കുടുംബവിളക്ക് രണ്ടാമത് ആയിരിക്കുകയാണ്.

റേറ്റിങ്ങില്‍ ഒന്നാം സ്ഥാനം തിരിച്ച് പിടിച്ചതോടെ സാന്ത്വനം പ്രേക്ഷകര്‍ക്കിത് സന്തോഷത്തിന്റെ നാളുകളാണ്. ശിവനും അഞ്ജലിയും തമ്മിലുള്ള പ്രണയമാണ് സീരിയലിന്റെ മുഖ്യ ആകര്‍ഷണം. എന്നാല്‍ ഇരുവരും പിണക്കത്തിലായത് എല്ലാവരെയും നിരാശപ്പെടുത്തി. ഇരുവരും ഒരുമിക്കണമെന്നും അല്ലെങ്കില്‍ ഉള്ള റേറ്റിങ് കൂടി നഷ്ടപ്പെടാന്‍ സാധ്യതയുള്ളതായി മുന്നറിയിപ്പുമായി ചിലരെത്തിയിരുന്നു. ആഴ്ചകളോളം ശിവന്റെയും അഞ്ജലിയുടെയും പിണക്കം മുന്നോട്ട് കൊണ്ട് പോയി. ഒടുവില്‍ ഇരുവരും ഒന്നിക്കാന്‍ പോവുന്നതാണ് ഇനിയുള്ള എപ്പിസോഡില്‍ കാണിക്കുക. മുന്‍പ് കണ്ടതിനെക്കാളും പ്രണയത്തിലായിരിക്കും ഇനി അഞ്ജലിയും ശിവനുമെന്നാണ് സൂചനകള്‍. അതുപോലെ അപ്പു ഗർഭിണിയായതും സീരിയൽ പ്രേക്ഷകർക്ക് സന്തോഷം നൽകിയിരുന്നു.

Recommended Video

സഞ്ജനയ്ക്കും അനന്യയ്ക്കും പ്രതീഷിനും പറയാനുള്ളതെന്ത്

മൂന്നാം സ്ഥാനം അമ്മയറിയാതെ ആണ്. അപര്‍ണയുടെയും വിനീതിന്റെയും വിവാഹം കഴിഞ്ഞത് മുതലിങ്ങോട്ട് അമ്മയറിയതെ മൂന്നാം സ്ഥാനത്ത് തുടരുകയായിരുന്നു. അമ്മയെ അന്വേഷിച്ച് വന്ന അലീനയും അമ്പാടിയും തമ്മിലുള്ള വിവാഹക്കാര്യവും മറ്റുമൊക്കെയായി സീരിയലില്‍ വലിയ ആഘോഷം നടക്കുകയാണ്. ഇതിനിടയിലാണ് നീരജയുടെ മരണ വാര്‍ത്ത എത്തുന്നത്. ഇതോടെ സീരിയലിലും മറ്റൊരു ട്വിസ്റ്റ് സംഭവിച്ചതാണ് ഇനിയുള്ള എപ്പിസോഡുകളില്‍ കാണിക്കുക. മൗനരാഗം, തൂവല്‍സ്പര്‍ശം, കൂടെവിടെ എന്നീ സീരിയലുകളാണ് ഇതിന് പിന്നിലായി ടിആര്‍പി ലിസ്റ്റിലുള്ളത്.