സ്ത്രീകളെ സ്പര്‍ശിച്ചിട്ടുണ്ടെന്ന് എന്തൊരഭിമാനത്തോടെയാണ് പറയുന്നത്! ബിഗ് ബോസിനെ വിമര്‍ശിച്ച് ചിന്മയി

ബിഗ് ബോസിന്റെ കഴിഞ്ഞ എപ്പിസോഡില്‍ മല്‍സരാര്‍ത്ഥികളില്‍ ഒരാളായ ശരവണന്‍ കോളേജില്‍ പഠിക്കുന്ന സമയത്ത് ബസില്‍ കയറുമ്പോള്‍ സ്ത്രീകളെ തോണ്ടുകയും ദുരുദ്ദേശത്തോടെ സ്പര്‍ശിക്കുകയും ചെയ്തിട്ടുണ്ടെന്ന് പറഞ്ഞിരുന്നു. കമല്‍ഹാസന്‍ മല്‍സരാര്‍ത്ഥികളോടെല്ലാം സംസാരിക്കുന്ന സമയത്തായിരുന്നു ശരവണന്‍ ഇക്കാര്യം പറഞ്ഞത്. ശരവണന്‍ പറഞ്ഞതിന് വലിയ കൈയ്യടിയാണ് കാണികള്‍ നല്‍കിയത്. സ്ത്രീകള്‍ക്ക് ബസില്‍ മോശം അനുഭവങ്ങള്‍ എല്ലായ്‌പ്പോഴും നേരിടേണ്ടി വരാറുണ്ടെന്ന് കമല്‍ഹാസന്‍ പറഞ്ഞപ്പോളാണ് ശരവണന്‍ തന്റെ അനുഭവം വെളിപ്പെടുത്തിയത്.

ശരവണന്‍ തന്റെ അനുഭവം ബിഗ് ബോസില്‍ വെളിപ്പെടുത്തിയെങ്കിലും കമല്‍ഹാസന്‍ ഉള്‍പ്പെടെയുളള ആരും അതിനെ വിമര്‍ശിച്ചില്ല. എന്നാല്‍ സോഷ്യല്‍ മീഡിയയില്‍ ഇതിനെതിരെ വലിയ രീതിയിലുളള വിമര്‍ശനങ്ങളാണ് വന്നുകൊണ്ടിരിക്കുന്നത്. മല്‍സരാര്‍ത്ഥികള്‍ക്കൊപ്പം തന്നെ കമല്‍ഹാസനെ വിമര്‍ശിച്ചുകൊണ്ടും നിരവധിപേര്‍ സമൂഹ മാധ്യമങ്ങളില്‍ എത്തുന്നുണ്ട്. തമിഴ് ബിഗ് ബോസിനെതിരെ എല്ലാവരും രംഗത്തെത്തിയ സമയത്താണ് ഗായിക ചിന്മയിയും വിമര്‍ശനവുമായി എത്തിയിരുന്നത്.

തന്റെ ട്വിറ്റര്‍ പേജിലൂടെയായിരുന്നു വിമര്‍ശനവുമായി ചിന്മയി എത്തിയിരുന്നത്. "താന്‍ സ്ത്രീകളെ തോണ്ടുകയും ഉപദ്രവിക്കുകയും ചെയ്തിട്ടുണ്ടെന്ന് ഒരാള്‍ അഭിമാനത്തോടെ പറഞ്ഞത് ഒരു തമിഴ് ചാനല്‍ സംപ്രേക്ഷണം ചെയ്തിരിക്കുന്നു. ഇത് കണ്ട് പ്രേക്ഷകര്‍ കൈയ്യടിക്കുകയും ആര്‍പ്പുവിളിക്കുകയും ചെയ്യുന്നു. കയ്യടിക്കുന്ന പ്രേക്ഷകര്‍ക്കും സ്ത്രീകള്‍ക്കും പീഡകനും ഇതൊരു തമാശയാണ്. കഷ്ടം", ചിന്മയി തന്റെ ട്വിറ്ററില്‍ കുറിച്ചു.

കഴിഞ്ഞ തവണ സംവിധായകന്‍ ചേരനും നടി മീര മിഥുനും തമ്മിലുളള പ്രശ്‌നമായിരുന്നു ബിഗ് ബോസിന്റെതായി ചര്‍ച്ചയായി മാറിയത്. നടനും സംവിധായകനുമായ ചേരന്‍ ബിഗ് ബോസില്‍ നിന്നും തന്നെ കേറിപിടിച്ചെന്ന ആരോപണവുമായിട്ടായിരുന്നു മീര മിഥുന്‍ എത്തിയിരുന്നത്. ഈ സംഭവത്തിന് ശേഷം സംവിധായകനെ വിമര്‍ശിച്ചുകൊണ്ട് നിരവധി പേര്‍ എത്തിയിരുന്നു. ടാസ്‌കിനിടെ ചേരന്‍ അനുവാദമില്ലാതെ എന്റെ അരയില്‍ ചുറ്റി പിടിച്ചെന്നാണ് നടി പറഞ്ഞത്. സംഭവം വിവാദമായതോടെ ചേരന്‍ നടിയോട് മാപ്പ് പറഞ്ഞ് എത്തുകയും ചെയ്തിരുന്നു.