ഉപ്പും മുളകും നിർത്തിയത് ഒരു വരുമാനം ഇല്ലാതാക്കി, ബാലുവിനെ നേരത്തെ അറിയാം, മുരളി മാനിഷാദ പറയുന്നു

ഉപ്പും മുളകും പരമ്പര അവസാനിച്ചിട്ടും സീരിയലിലെ താരങ്ങൾ ഇന്നും പ്രേക്ഷകരുടെ ഇടയിൽ ചർച്ചയാണ്. ബാലുവും നീലവും ആഞ്ച് മക്കളും ശങ്കരനും സുരേന്ദ്രനുമെല്ലാം പ്രേക്ഷകരുടെ ഇടയിൽ ഇന്നും ചർച്ചയാവുന്നുണ്ട്. താരങ്ങളെയെല്ലാം ഇന്നും പ്രേക്ഷകരുടെ ഇടയിൽ ഇതേ പേരിൽ തന്നെയാണ് അറിയപ്പെടുന്നത്. ഇപ്പോഴിത സോഷ്യൽ മീഡിയയിൽ വൈറലാവുന്നത് ഉപ്പും മുളകും പരമ്പരയിലെ ജനപ്രിയതാരമായ മുരളി മാനിഷാദയുടെ വാക്കുകളാണ്. അദ്ദേഹത്തിന്റെ യഥാർത്ഥ പേരിനെക്കാളും ശങ്കരൻ എന്നാണ് പ്രേക്ഷകരുടെ ഇടയിൽ അറിയപ്പെടുന്നത്. സമൂസ ഓൺലൈൻ ചാനലാണ് ഇദ്ദേഹത്തിന്റെ വിശേഷം പ്രേക്ഷകരിൽ എത്തിച്ചത്. വളരെ പെട്ടെന്നാണ് ഉപ്പും മുളകും നിറുത്തിയതെന്നും ചെറിയൊരു വരുമാനം ഇല്ലാതാക്കിയെന്നും ഇദ്ദേഹം പറയുന്നു. കൂടാതെ സഹതാരങ്ങളായ ബാലുവിനേയും നീലുവിനേയും പിളളരേയും കുറിച്ചുമൊക്കെ പറയുന്നുണ്ട്.

ഉപ്പും മുളകിലും ബാലു ആയി എത്തിയ ബിജു സോപനത്തെ നേരത്തെ അറിയാം എന്നാണ് മുരളി പറയുന്നത്. ഇതിന് മുൻപ് കൈരളി ചാനലിൽ ഒരു പോഗ്രാം ചെയ്യാൻ പോയിട്ടുണ്ടെന്നും ഇദ്ദേഹം പറയുന്നു. എന്നാൽ പരിപാടി ടെലികാസ്റ്റ് ചെയ്തിട്ടില്ല. അന്ന് മുതലെ ബാലുവിനെ അറിയാം. ഡയലോഗ് പറയാൻ തന്ന ഒരുപാട് സഹായിച്ചിട്ടുണ്ടെന്നു ഉപ്പും മുളകും സീരിയലിന്റെ ഓർമ പങ്കുവെച്ച് കൊണ്ട് താരം പറഞ്ഞു. കൂടാതെ അദ്ദേഹം മികച്ച നടനാണെന്നും അദ്ദേഹം പറയുന്നുണ്ട്. കാവാലം നാരായണൻ സാറിന്റെ സോപാനം നാടകത്തിൽ നിന്നാണ് ബിജു വരുന്നത്. മറ്റുളള നാടകം പോലെയല്ല ഇവരുടേത്. അതിൽ നിന്ന് വന്നിട്ട് തിരുവനന്തപുരം ശൈലിയിൽ സംസാരിക്കുന്ന അദ്ദേഹത്തെ സമ്മതിക്കണം എന്നാണ് ഉപ്പും മുളകും താരം പറയുന്നത്.

നീലുവായി എത്തുന്ന നിഷയെ കുറിച്ചും അദ്ദേഹം സംസാരിച്ചിരുന്നു. വളരെ മിടുക്കി കുട്ടിയാണ് നിഷ എന്നാണ് മുരളി പറയുന്നത്. ഷൂട്ടിംഗ് സമയം ഓരോന്ന് പറഞ്ഞ് തരാറുണ്ടെന്നും അദ്ദേഹം പറയുന്നു. ഏത് റോളും വളരെ പെട്ടെന്ന് ചെയ്യും ഒന്നിനും പിന്നോട്ട് പോകില്ലെന്നും എല്ലാം കറക്ട് ആണെന്നും നിഷയെ കുറിച്ച് മുരളി പറയുന്നു. ബാലുവിനോടൊപ്പം ഇത്രയും പിടിച്ചു പോകുന്ന മറ്റെരാൾ ഇല്ല. നിഷ അല്ലാതെ വേറെ ആർക്കും ബാലുവിനോടൊപ്പം ഇത്രയും നല്ലത് പോലെ ചെയ്യാൻ പറ്റില്ലെന്നും അദ്ദേഹം പറയുന്നു. നേരത്തെ തന്നെ ബിജു സോപാനം നിഷ സാരംഗ് കെമിസ്ട്രിയെ അഭിനന്ദിച്ച് പ്രേക്ഷകർ രംഗത്ത് എത്തിയിരുന്നു. മിനിസ്ക്രീനിലെ മികച്ച ഓൺ സ്ക്രീൻ ജോഡികളാണ് ഇരുവരും. വിഷ്ണുവിനെ കുറിച്ചും പാറുക്കുട്ടിയെ പറ്റിയും ലെച്ചുവിനെ കുറിച്ചുമൊക്കെ അഭിമുഖത്തിൽ പറയുന്നുണ്ട്.

Recommended Video

Biju Sopanam Exclusive Interview | FilmiBeat Malayalam

ഉപ്പും മുളകും നിർത്തിയതിനെ പറ്റിയും നടൻ പറയുന്നുണ്ട്. അപ്രതീക്ഷിതമായിട്ടായിരുന്നു ഉപ്പു മുളകും നിർത്തുന്നത്. ഇത്ര വേഗം സീരിയൽ നിർത്തുമെന്ന് ആരും വിചാരിച്ചില്ലെന്നും നടൻ പറയുന്നു. റേറ്റിംഗ് കുറവായത് കൊണ്ടാണ് സീരിയൽ താൽക്കാലികമായി നിർത്തി വയ്ക്കുന്നതെന്നാണ് ചാനൽ അധികൃതർ പറഞ്ഞത്.പൂർണ്ണമായും നിർത്തിയില്ല. കുറച്ച് നാളത്തെ ബ്രേക്കിന് ശേഷം തുടരും എന്നാണ് അന്ന് പറഞ്ഞത്. സീരിയൽ നിർത്തിയത് ഭയങ്കര മായ പ്രായസമായിപ്പോയി എന്നും അദ്ദേഹം പറയുന്നു. വളരെ നല്ലെരു പരിപാടിയായിരുന്നു. അതുപോലെ തന്നെ നമ്മളുടെ ചെറിയൊരു വരുമാനമാണ് സീരിയൽ നിർത്തിയതോടെ നഷ്ടപ്പെട്ടതെന്നും മുരളി പറഞ്ഞു.