'കേരളത്തിലെ ആളുകളുടെ ചിന്ത മാറണം, പെണ്ണുങ്ങൾ ഭർത്താവിനെ ആശ്രയിച്ച് ജീവിക്കണമെന്ന രീതി മാറണം'; നടി അനുശ്രീ

എന്റെ മാതാവ് എന്ന സീരിയലിന്റെ ക്യാമറാമാനായിരുന്നു വിഷ്ണു സന്തോഷ്. അരയന്നങ്ങളുടെ വീട് എന്ന സീരിയൽ ലോക്കേഷനിൽ വെച്ചാണ് ഇരുവരും പരിചയപ്പെടുന്നത്. പിന്നീട് ആ സൗഹൃദം പ്രണയമാവുകയായിരുന്നു. പ്രണയം കണ്ടുപിടിച്ചപ്പോൾ മുതൽ അമ്മ അത് പരമാവധി തടയാൻ ശ്രമിച്ചിരുന്നു.

ഇതോടെയാണ് അനുശ്രീ വിഷ്ണുവിനെ രഹസ്യമായി വിവാഹം ചെയ്തത്. പക്ഷെ പ്രസവശേഷം അനുശ്രീയും വിഷ്ണുവും അകൽച്ചയിലാണ്. താനും വിഷ്ണുവും തമ്മിൽ പ്രശ്നങ്ങളുണ്ടെന്ന് അനുശ്രീ തന്നെ വെളിപ്പെടുത്തിയിരുന്നു.

അച്ഛൻ വിഷ്ണുവിന്റെ സാന്നിധ്യമില്ലാതെയാണ് അനുശ്രീ മകന്റെ നൂലുകെട്ട് ചടങ്ങ് അടക്കം നടത്തിയത്. പ്രസവശേഷം അനുശ്രീ ഭർത്താവ് വിഷ്ണുവിനെ കുറിച്ചുള്ള ഒരു കാര്യവും പങ്കുവെച്ചില്ലെന്ന് മാത്രമല്ല വിവാഹമോചനവുമായി ബന്ധപ്പെട്ട ഒരു കുറിപ്പ് സോഷ്യൽമീഡിയയിൽ പങ്കുവെക്കുകയും ചെയ്തു. ഇതോടെയാണ് അനുശ്രീ വിവാഹമോചനത്തിന് തയ്യാറെടുക്കുന്നുവെന്ന തരത്തിൽ വാർത്തകൾ വരാൻ തുടങ്ങിയത്.

വിഷ്ണുവിന് സാമ്പത്തികമായി ഒരുപാട് പ്രശ്നങ്ങളുണ്ടെന്നും അതുമായി ബന്ധപ്പെട്ട വഴക്ക് തങ്ങൾക്കിടയിൽ എപ്പോഴും ഉണ്ടാകാറുണ്ടെന്നും അടുത്തിടെ അനുശ്രീ വെളിപ്പെടുത്തിയിരുന്നു.

തന്റെ കു‍ഞ്ഞിനെ നന്നായി നോക്കണമെന്ന ആ​ഗ്രഹമുള്ളതുകൊണ്ടാണ് അമ്മയോടൊപ്പം നിൽക്കുന്നതെന്നും അനുശ്രീ പറഞ്ഞിരുന്നു. തനിക്ക് വലിയ ചിലവുകളൊന്നും ഇല്ലായിരുന്നുവെന്നും വിഷ്ണുവിന്റെ വീട്ടുകാരുടെ സാമ്പത്തിക പ്രശ്നങ്ങൾ തങ്ങളുടെ കുടുംബത്തെ ബാധിക്കുകയായിരുന്നുവെന്നുമാണ് അനുശ്രീ പറ‍ഞ്ഞത്.

ഇപ്പോൾ ഭർത്താക്കന്മാരെ കുറിച്ചും കേരളത്തിലെ ആളുകളുടെ ചിന്താ​ഗതിയെ കുറിച്ചും അനുശ്രീ പറഞ്ഞ വാക്കുകളാണ് വൈറലാകുന്നത്. സീ മലയാളത്തിന് നൽകിയ അഭിമുഖത്തിലായിരുന്നു അനുശ്രീയുടെ വെളിപ്പെടുത്തൽ.

'കേരളം എനിക്ക് ഇഷ്ടമാണ്. പക്ഷെ കേരളത്തിലെ ആളുകളുടെ മൈൻഡ് സെറ്റ് മാറ്റേണ്ടതായിട്ടുണ്ട്. അത് അവർ തന്നെ ചിന്തിച്ച് മാറ്റേണ്ടതാണ്. കാലം മാറി പഴയതുപോലെ അല്ല. ഇതിപ്പോൾ 2020 ആണ്. അതുകൊണ്ട് തന്നെ പെൺപിള്ളേർ ഭർത്താവിനെ അല്ലെങ്കിൽ വീട്ടുകാരെ ആശ്രയിച്ച് ജീവിക്കണമെന്ന രീതി മാറി.'

'പെണ്ണുങ്ങൾക്ക് അവരുടേതായ സ്റ്റാന്റുണ്ട്. അവർക്ക് അവരുടെ കാഴ്ചപ്പാടുകളുണ്ട്. അതിന് വേണ്ടി അവരെ ഫ്രീയായി വിടുക' അനുശ്രീ പറഞ്ഞു. 2005 മുതൽ അഭിനയരംഗത്ത് സജീവമായ അനുശ്രീ ഇതുവരെ അമ്പതോളം സീരിയലുകളിൽ അഭിനയിച്ചുകഴിഞ്ഞു.

ഓമനത്തിങ്കൾ പക്ഷി എന്ന സീരിയലിൽ ആൺകുട്ടിയായി വേഷമിട്ടുകൊണ്ടാണ് മിനി സ്‌ക്രീനിലേക്ക് അനുശ്രീ അരങ്ങേറിയത്. ശ്രീമഹാഭാഗവതം, പാദസരം, ഏഴുരാത്രികൾ, അമല, അരയന്നങ്ങളുടെ വീട്, മഞ്ഞിൽ വിരിഞ്ഞപൂവ് തുടങ്ങിയ സീരിയലുകളിലെ കഥാപാത്രങ്ങളും അനുശ്രീയ്ക്ക് ഏറെ പ്രേക്ഷകശ്രദ്ധ നേടികൊടുത്തവയാണ്.

സീ കേരളം ചാനലിൽ സംപ്രേഷണം ചെയ്യുന്ന പൂക്കാലം വരവായി എന്ന പരമ്പരയിൽ അഭിനയിച്ചുകൊണ്ടിരിക്കവെയാണ് അനുശ്രീ വിവാഹിതയായത്.