'ബാഹുബലിയുടെ വിജയം എന്നെവെച്ച് സിനിമ ചെയ്യുന്നവർക്കെല്ലാം ബാധ്യതയാണ്'; മനസ് തുറന്ന് പ്രഭാസ്

ബാഹുബലിയുടെ വിജയത്തിന് ശേഷം സ്റ്റാർ വാല്യു കുത്തനെ ഉയർന്ന പ്രഭാസ് രണ്ട് സിനിമകളാണ് ചെയ്തത്. രണ്ടും പാൻ ഇന്ത്യൻ ആയിട്ടാണ് പ്രേക്ഷകരിലേക്ക് എത്തിയത്. എന്നാൽ നിർ​ഭാ​ഗ്യമെന്ന് പറയട്ടെ വലിയ പരാജയമായിരുന്നു ആ രണ്ട് സിനിമകളും. ആദ്യം പുറത്തിറങ്ങിയ സാഹോയും രണ്ടാമത് ‌പുറത്തിറങ്ങിയ രാധേ ശ്യാമും വലിയ ബോക്സോഫീസിലടക്കം വലിയ പരാജയമായി. സിനിമകൾ തുടരെ തുടരെ പരാജയമാകുന്നതിനെ കുറിച്ച് ആദ്യമായി പ്രതികരിച്ചിരിക്കുകയാണ് നടൻ പ്രഭാസ്. തന്റെ സിനിമൾ പരാജയപ്പെടുന്നതിന് പിന്നിൽ ബാഹഹുബലിക്കും പങ്കുണ്ടെന്നാണ് പ്രഭാസ് പറയുന്നത്.

വലിയ മുതൽ മുടക്കിൽ നിർമിച്ച രാധേ ശ്യാം കൂടി പരാജയപ്പെട്ടതോടെയാണ് പ്രഭാസ് വെളിപ്പെടുത്തൽ നടത്തിയത്. 'ഒരുപക്ഷേ കൊവിഡ് അല്ലെങ്കിൽ നമുക്ക് സ്ക്രിപ്റ്റിൽ എന്തെങ്കിലും തെറ്റുപറ്റുകയോ മറ്റെന്തെങ്കിലും വിട്ടുപോവുകയോ ചെയ്തിരിക്കാം. അല്ലെങ്കിൽ അത്തരം ജോണറിലുള്ള സിനിമകളിൽ ആളുകൾ എന്നെ കാണാൻ ആഗ്രഹിക്കുന്നില്ലായിരിക്കാം. അല്ലെങ്കിൽ പ്രേക്ഷകർ എന്നിൽ നിന്നും കുറച്ച് കൂടി പ്രതീക്ഷിച്ചിരിക്കാം. ബാഹുബലി വലിയ വിജയമായിരുന്നുവെന്നതിനാൽ ബാഹുബലി പോലെ മികച്ച പ്രതികരണം ലഭ്യമാക്കേണ്ട സാഹചര്യവും സമ്മർദ്ദവും എന്റെ സംവിധായകരിലും നിർമ്മാതാക്കളിലും വരുന്നുണ്ട്.'

'ബാഹുബലി മറികടക്കാനോ ഏറ്റവും വലിയ സിനിമ ചെയ്യാനോ ഉള്ള തോന്നലൊന്നും എനിക്കില്ല. ബാഹുബലി ലഭിച്ചതിൽ ഞാൻ വളരെ ഭാഗ്യവാനാണ്. പക്ഷേ രാജ്യത്ത് കഴിയുന്നത്ര പ്രേക്ഷകരെ രസിപ്പിക്കാൻ ഞാൻ ആഗ്രഹിക്കുന്നു. ഞാനോ ബാഹുബലിയോ ഇല്ലാതെയും പ്രേക്ഷകരെ രസിപ്പിക്കണമെന്ന് ഞാൻ ആഗ്രഹിക്കുന്നു' പ്രഭാസ് പറഞ്ഞു. രാധാ കൃഷ്‍ണ കുമാറിന്റെ സംവിധാനത്തിലാണ് പ്രഭാസും പൂജ ഹെഗ്‍ഡെയും ഒന്നിച്ച രാധേ ശ്യാം എത്തിയത്. രാധ കൃഷ്‍ണ കുമാറാണ് ചിത്രത്തിന്റെ തിരക്കഥ എഴുതിയതും. ഭൂഷൺ കുമാർ, വാംസി, പ്രമോദ് എന്നിവർ ചേർന്നാണ് സിനിമ നിർമ്മിച്ചത്. സച്ചിൻ ഖറേഡേക്കർ, പ്രിയദർശിനി, മുരളി ശർമ, സാഷ ഛേത്രി, കുനാൽ റോയ് കപൂർ തുടങ്ങിയവരും പ്രധാന കഥാപാത്രങ്ങളായി എത്തി.

ഹസ്‍തരേഖ വിദഗ്‍ധനായ വിക്രമാദിത്യ' എന്ന കഥാപാത്രത്തെയാണ് പ്രഭാസ് അവതരിപ്പിച്ചത്. പ്രേരണ എന്ന കഥാപാത്രമായിട്ടാണ് ചിത്രത്തിൽ പൂജ ഹെഗ്‍ഡെ എത്തിയത്. പ്രഭാസിനെ നായകനാക്കി കെജിഎഫ് സംവിധായകൻ പ്രശാന്ത് നീലിന്റെ ചിത്രവും വരാനുണ്ട്. ഒരു ആക്ഷൻ ത്രില്ലർ ചിത്രമാണ് പ്രഭാസ് നായകനാകുന്ന സലാർ. ശ്രുതി ഹാസൻ ആണ് ചിത്രത്തിലെ നായിക. സലാർ എന്ന ടൈറ്റിൽ കഥാപാത്രമായിട്ടാണ് ചിത്രത്തിൽ പ്രഭാസ് അഭിനയിക്കുന്നത്.