അയ്യപ്പൻ നായരായി പവൻ കല്യാൺ, കോശിയായി റാണ, ഒപ്പം സായ് പല്ലവിയും ഐശ്വര്യ രാജേഷും?

തെലുങ്ക് പതിപ്പ് അയ്യപ്പനും കോശിയിലും പവർ സ്റ്റാർ പവൻ കല്യാണിനോടൊപ്പം തെന്നിന്ത്യൻ പ്രേക്ഷകരുടെ പ്രിയ താരമായ റാണ ദഗുബാട്ടിയും എത്തുന്നു. ഏറെ നാളുകളായി ഇതുസംബന്ധനായ ചർച്ചകൾ ടോളിവുഡിൽ നടക്കുകയായിരുന്നു. ഇപ്പോഴിത ചിത്രത്തെ കുറിച്ച് വെളിപ്പെടുത്തി റാണ തന്നെ രംഗത്തെത്തിയിരിക്കുകയാണ്. താരത്തിന്റെ ഔദ്യോഗിക ട്വിറ്റർ പേജിലൂടെയാണ് ഇക്കാര്യം വെളിപ്പെടുത്തിയിരിക്കുന്നത് .

ബിജു മേനോൻ അവതരിപ്പിച്ച കഥാപാത്രമായി പവൻ കല്യാൺ എത്തുമ്പോൾ പൃഥ്വിരാജ് അവിസ്മരണീയമാക്കിയ കോശിയെയാണ് റാണ അവതരിപ്പിക്കുന്നത്. നേരത്തെ നടൻ നിഥിനെയായിരുന്നു ഈ കഥാപാത്രത്തിനായി പരിഗണിച്ചത്. എന്നാൽ പിന്നീട് റാണയിലേയ്ക്ക് എത്തുകയായിരുന്നു . ടോളിവുഡിൽ മാത്രമല്ല മലയാളത്തിലും കൈനിറയെ ആരാധകരുള്ള താരമാണ് റാണ ദഗുബാട്ടി. നടന്റെ അന്യാഭാഷ ചിത്രങ്ങൾക്ക് കേരളത്തിലു ഒട്ടേറെ ആരാധകരുണ്ട്. അതിനാൽ തന്നെ മലയാളി പ്രേക്ഷകരും ചിത്രത്തിനായി ആകാംക്ഷയോടെ കാത്തിരിക്കുകയാണ്.

ഇനി തെന്നിന്ത്യൻ സിനിമാ ലോകം ആകാംക്ഷയോടെ കാത്തിരിക്കുന്നത ചിത്രത്തിലെ നായികമാരെ കുറിച്ച് അറിയാനാണ്. മലയാളി പ്രേക്ഷകരുടെ പ്രിയപ്പെട്ട താരങ്ങളായ സായ് പല്ലവി, ഐശ്വര്യ രാജേഷ് തുടങ്ങിയവരുടെ പേരുകളാണ് ഉയർന്നു വരുന്നത്. ടോളിവുഡ് മാധ്യമങ്ങൾ റിപ്പോർട്ട് ചെയ്യുന്നത് പ്രകാരം കണ്ണമ്മയായി എത്തുന്നത് സായ് പല്ലവിയും റാണയുടെ നായികയായി എത്തുന്നത് ഐശ്വര്യ രാജേഷുമാണെന്നാണ്. എന്നാൽ ഇതിനെ കുറിച്ച് ഔദ്യോഗി പ്രഖ്യാപനമുണ്ടായിട്ടില്ല. നടി മംമ്തയുടെ പേരും ഉയർന്നു വന്നിരുന്നു.

തെലുങ്ക് പതിപ്പ് അയ്യപ്പനും കോശിയുടേയും പൂജ കഴിഞ്ഞിരിക്കുകയാണ്. പൂജ ചിത്രങ്ങൾ സമൂഹമാധ്യമങ്ങളിൽ വൈറലായിട്ടുണ്ട്. പവന്‍ കല്യാണ്‍, സംവിധായകന്‍ സാഗര്‍ കെ. ചന്ദ്ര, നിര്‍മ്മാതാവ് സൂര്യദേവര നാഗ വാംസി എന്നിവര്‍ പൂജാ ചടങ്ങില്‍ പങ്കെടുത്തു. തമന്‍ എസ്. ആണ് ചിത്രത്തിന് സംഗീതമൊരുക്കുന്നത്. മലയാളത്തിൽ പൃഥ്വിരാജും ബിജുമേനോനും ആലപിച്ച ടൈറ്റിൽ ഗാനം തെലുങ്കിൽ പവൻ കല്യാണിനെ കൊണ്ട് പാടിപ്പിക്കാണ് സംഗീത സംവിധായകൻ ആലോചിക്കുന്നത്. ഇക്കാര്യത്തിലും ഔദ്യോഗിക പ്രഖ്യാപനം ഇതുവരെയുണ്ടായിട്ടില്ല.