കുടുംബത്തിൽ സ്വത്ത് തർക്കമോ?; വിഷയത്തിൽ പ്രതികരിച്ച് സഹോദരൻ; നാ​ഗാർജുന മക്കൾക്കായി സമ്പാദിച്ചത്

‌തെലുങ്ക് സിനിമാ ലോകത്തെ പ്രബലരാണ് നാ​ഗാർജുനയുടെ കുടുംബം. അക്കിനേനി കുടുംബം വർഷങ്ങളായി സിനിമാ രം​ഗത്ത് തുടരുന്നു. ടോളിവുഡ് ഇന്നത്തെ നിലയിലേക്ക് ഉയർന്നതിൽ സുപ്രധാന പങ്കുവഹിച്ചത് നാ​ഗാർജുനയു‌ടെ പിതാവ് അക്കിനേനി നാ​ഗേശ്വര റാവുവാണ്. അക്കാലത്ത് ചെന്നെെയിലായിരുന്നു തെലുങ്ക് സിനിമകളുടെ കേന്ദ്രം. നാ​ഗേശ്വര റാവുവിന്റെയുൾപ്പെടെ ശ്രമഫലമായാണ് തെലുങ്ക് സിനിമകളുടെ ഷൂട്ടിം​ഗ് ഹൈദരാബാദിലേക്ക് എത്തുന്നത്. നാ​ഗേശ്വര റാവുവിന്റെ പിൻതലമുറക്കാരും സിനിമാ ലോകത്തെ പ്രബലരായി.

മകൻ നാ​ഗാർജുന സൂപ്പർതാരമായി മാറി. നാ​ഗാർജുനയുടെ മക്കളായ നാ​ഗ ചൈതന്യയും അഖിൽ അക്കിനേനിയും സിനിമാ രം​ഗത്തേക്ക് കടന്ന് വന്നു. അക്കിനേനി കുടുംബത്തെക്കുറിച്ച് ഇക്കാലയളവിനിടെ ചില ​ഗോസിപ്പുകളും വന്നു. ഇതിലൊന്നായിരുന്നു സ്വത്ത് തർക്കം. സഹോദരങ്ങളുമായി നാ​ഗാർജുനയ്ക്ക് സ്വത്ത് തർക്കമുണ്ടെന്നാണ് പുറത്ത് വന്ന വിവരം. ഇപ്പോഴിതാ ഇക്കാര്യത്തിൽ വ്യക്തത വരുത്തിയിരിക്കുകയാണ് നാ​ഗാർജുനയുടെ സഹോദരൻ അക്കിനേനി വെങ്കട്ട്. കുടുംബത്തിനുള്ളിൽ പ്രശ്നങ്ങളൊന്നുമില്ലെന്ന് അക്കിനേനി വെങ്കട്ട് വ്യക്തമാക്കി.

പണത്തിന് പിന്നാലെ പോകുന്നവരല്ല ഞങ്ങൾ. ചിലപ്പോൾ ഇത്തരം അഭ്യൂഹങ്ങൾ താനും കേൾക്കാറുണ്ട്. ഇത്തരം അഭ്യൂഹങ്ങൾക്ക് കുടുംബം പ്രാധാന്യം നൽകാറില്ലെന്നും അക്കിനേനി വെങ്ക്ട്ട് വ്യക്തമാക്കി. അക്കിനേനി വെങ്കട്ട്, സത്യവതി അക്കിനേനി, സരോജ അക്കിനേനി, നാ​ഗ സുശീല എന്നിവരാണ് നാ​ഗാർജുനയുടെ സഹോദരങ്ങൾ. നടി അമല അക്കിനേനിയാണ് നാ​ഗാർജുനയുടെ ഭാര്യ. ഇവർക്ക് പിറന്ന മകനാണ് അഖിൽ അക്കിനേനി. മുൻ ഭാര്യ ലക്ഷ്മി ദ​ഗുബതിയിൽ പിറന്ന മകനാണ് നാ​ഗ ചൈതന്യ.

നാ​ഗാർജുനയുടെ കോടിക്കണക്കിന് വരുന്ന സ്വത്തുക്കളുടെ അവകാശികളാണിവർ. 3000 കോടിയിലേറെയാണ് നാ​ഗാർജുനയുടെ സ്വത്തുക്കൾ. തെലുങ്കിലെ ഏറ്റവും ധനിക നടൻമാരിൽ ഒരാളാണ് ഇദ്ദേഹം. നാ​ഗ ചൈതന്യ സമാന്തയുമായുള്ള വിവാഹ ബന്ധം പിരിഞ്ഞപ്പോൾ വൻ തുക ജീവനാംശമായി നൽകാൻ നാ​ഗാർജുന തയ്യാറായതാണ്. എന്നാൽ ഒരു രൂപ പോലും വേണ്ടെന്നാണ് സമാന്ത വ്യക്തമാക്കിയത്. വേർപിരിയൽ അക്കിനേനി കുടുംബത്തിൽ ഒന്നിലേറെ തവണ നടന്നിട്ടുണ്ട്.

ലക്ഷ്മി ദ​ഗുബതിയുമായി പിരിഞ്ഞ ശേഷമാണ് നാ​ഗാർജുനയുടെ ജീവിതത്തിലേക്ക് അമല കടന്ന് വരുന്നത്. ഇവർക്ക് പിറന്ന മകൻ അഖിൽ അക്കിനേനി നിശ്ചയിച്ചുറപ്പിച്ച വിവാഹത്തിൽ നിന്ന് പിന്മാറുകയാണുണ്ടായത്. നാ​ഗാർജുനയു‌ടെ സഹോദരങ്ങളുടെ മക്കളായ സുമന്ത്, സുപ്രിയ എന്നിവരും വിവാഹ മോചിതരാണെന്നാണ് സൂചന. നാ​ഗ ചൈതന്യയുടെ വ്യക്തി ജീവിതത്തിൽ സംഭവിച്ച കാര്യങ്ങളെക്കുറിച്ച് സംസാരിക്കാൻ നാ​ഗാർജുന തയ്യാറായിട്ടില്ല. കരിയറിലെ തിരക്കുകളിലാണ് നാ​ഗാർജുനയും നാ​ഗ ചൈതന്യയും.

നാ​ഗാർജുനയുമായുള്ള വിവാഹത്തിന് ശേഷം അഭിനയ രം​ഗം വിട്ട അമല വർഷങ്ങൾക്ക് ശേഷം അഭിനയ രം​ഗത്തേക്ക് തിരിച്ചെത്തിയെങ്കിലും പഴയത് പോലെ സജീവമല്ല. എൺപതുകളിൽ സെൻസേഷനായി മാറിയ നടിയാണ് അമല. മലയാളത്തിൽ ഉള്ളടക്കം, എന്റെ സൂര്യപുത്രിക്ക്, കെയർ ഓഫ് സൈറ ബാനു എന്നീ മലയാള സിനിമകളിൽ അഭിനയിച്ചിട്ടുണ്ട്. നാ​ഗാർജുനയെ പോലെ കരിയറിൽ സൂപ്പർ താര പദവിയിലേക്ക് ഉയരാൻ നാ​ഗ ചൈതന്യക്കോ അഖിൽ അക്കിനേനിക്കോ ഇതുവരെ കഴിഞ്ഞിട്ടില്ല.