അമലയെ പിന്നിൽ നിർത്തി നാ​ഗാർജുന മുൻ ഭാര്യക്കൊപ്പം സംസാരിച്ചിരിക്കുകയാണോ; യഥാർത്ഥത്തിൽ നടന്നത്

തെലുങ്ക് സിനിമാ ലോകത്ത് ഇന്നും സൂപ്പർതാര പദവിയിൽ തുടരുന്ന നടനാണ് നാ​ഗാർജുന. നടന്റെ സ്ഥാനത്തേക്ക് ഉയരാൻ കരിയറിൽ മക്കൾക്ക് പോലും കഴിഞ്ഞിട്ടില്ല. ആക്ഷൻ, റൊമാന്റിക് ഹീറോയായി ശ്രദ്ധ നേടിയ നാ​ഗാർജുന ഇന്ന് ബി​ഗ് ബോസ് തെലുങ്ക് അവതാരകനുമാണ്. ടോളിവുഡിലെ ഏറ്റവും ധനികനായ താരങ്ങളിൽ ഒരാളായ നാ​ഗാർജുനയുടെ വ്യക്തി ജീവിതം പലപ്പോഴും ചർച്ചയായിട്ടുണ്ട്. രണ്ട് വിവാഹമാണ് താരത്തിന്റെ ജീവിതത്തിൽ നടന്നത്.

പ്രമുഖ നിർമാതാവ് ഡി രാമനായ്ഡുവിന്റെ മകൾ ലക്ഷ്മി ദ​ഗുബതിയാണ് ആദ്യ ഭാര്യ. വിവാഹിതനാകുമ്പോൾ നാ​ഗാർജുന കരിയറിൽ തുടക്കം കുറിക്കുന്നതേയുള്ളൂ. ഭർത്താവ് സിനിമ കരിയറാക്കുന്നതിനോട് ലക്ഷ്മിക്ക് താൽപര്യമുണ്ടായിരുന്നില്ല. ഇത് സംബന്ധിച്ചുണ്ടായ അസ്വാരസ്യങ്ങൾ കാരണമാണ് ഇവർ പിരിഞ്ഞത്. നടൻ നാ​ഗ ചെെതന്യ ഇവർക്ക് പിറന്ന മകനാണ്. അച്ഛന്റെ പാത പിന്തുടർന്ന് നാ​ഗ ചൈതന്യയും സിനിമാ രം​ഗത്തേക്ക് വന്നു.

ലക്ഷ്മി ദ​ഗുബതിയുമായി പിരിഞ്ഞ ശേഷമാണ് നടി അമല അക്കിനേനിയെ നാ​ഗാർജുന വിവാഹം ചെയ്യുന്നത്. ഒരുമിച്ച് അഭിനയിക്കുന്നതിനിടെ പ്രണയത്തിലാവുകയായിരുന്നു ഇവർ. വിവാഹ ശേഷം അമല സിനിമാ രം​ഗം വിട്ടു. അഖിൽ അക്കിനേനി എന്നാണ് ഇവരുടെ മകന്റെ പേര്. അഖിൽ ഇന്ന് ടോളിവുഡിലെ യുവതാരമാണ്.

നാ​ഗാർജുനയെയും മുൻ ഭാര്യ ലക്ഷ്മി ദ​​ഗുബതിയെയും കുറിച്ചുള്ള ചില ചർച്ചകളാണ് സോഷ്യൽ മീഡിയയിൽ ഇപ്പോൾ നടക്കുന്നത്. കഴിഞ്ഞ ദിവസമാണ് നാ​ഗാർജുനയുടെ പിതാവ് അക്കിനേനി നാ​ഗേശ്വര റാവുവിന്റെ പേരിലുള്ള അവാർഡ് ദാന ചടങ്ങ് നടന്നത്. അമിതാഭ് ബച്ചനുൾപ്പെടെയുള്ള പ്രമുഖർ ച‌ടങ്ങിനെത്തി. ചടങ്ങിൽ വെച്ച് കുടുംബ സമേതം നാ​ഗാർജുന ഫോട്ടോയെടുത്തു. നാ​ഗാർജുനയും മക്കളും ഭാര്യയും ഭാവി മരുമകൾ ശോഭിതയും മറ്റ് ബന്ധുക്കളും ഉൾപ്പെടുന്ന ഫോട്ടോയാണിത്.

അമല അക്കിനേനിയെ പിന്നിലെ നിരയിലാണ് ഫോട്ടോയിൽ കാണുന്നത്. നാ​ഗാർജുനയുടെ തൊട്ടടുത്തിരിക്കുന്നത് മറ്റൊരു സ്ത്രീയാണ്. ഇവർ നാ​ഗാർജുനയോട് സംസാരിക്കുന്നുമുണ്ട്. ഇത് ലക്ഷ്മി ദ​ഗുബതിയാണെന്ന് പലരും കമന്റ് ചെയ്തു. എന്നാൽ യഥാർത്ഥത്തിൽ ഇത് ലക്ഷ്മി ദ​ഗുബതി അല്ല. നാ​ഗാർജുനയുടെ ജേഷ്ഠൻ അക്കിനേനി വെങ്കട്ടിന്റെ ഭാര്യയാണ്. ലക്ഷ്മി ദ​ഗുബതിയാണിതെന്ന് പലരും തെറ്റിദ്ധരിക്കുകയായിരുന്നു.

വിവാഹ മോചനത്തിന് ശേഷം നാ​ഗാർജുനയും ലക്ഷ്മി ദ​ഗുബതിയും സൗഹൃദത്തിലാണോ എന്ന് വ്യക്തമല്ല. അതേസമയം മകൻ നാ​ഗ ചൈതന്യയുടെ വിവാഹ നിശ്ചയത്തിൽ ഇരുവരും എത്തി. ഒരുമിച്ച് ബന്ധുക്കളോടൊപ്പം ഫോട്ടോയും എടുത്തു, നാ​ഗ ചെെതന്യയുടെ ആദ്യ വിവാഹത്തിനും ലക്ഷ്മിയും നാ​ഗാർജുനയും ഒരുമിച്ച് ക്യാമറയ്ക്ക് മുന്നിൽ നിന്നിട്ടുണ്ട്.