'അമലയും പിന്തുണച്ചു; വിവാഹമോചനത്തിനിടെ സമാന്ത പറഞ്ഞത് നാ​ഗാർജുനയെ അത്ഭുതപ്പെടുത്തി'

തെന്നിന്ത്യൻ സിനിമാ ലോകത്തെ സൂപ്പർതാരമാണ് നാ​ഗാർജുന. തെലുങ്ക് സിനിമാ ലോകത്തെ ഹിറ്റ് നായകനായ നാ​ഗാർജുന തമിഴ്, ഹിന്ദി സിനിമകളിലും നാ​ഗാർജുന സാന്നിധ്യം അറിയിച്ചിട്ടുണ്ട്. നാ​ഗാർജുനയുടെ കുടുംബം ജീവിതം എപ്പോഴും ചർച്ചയാകാറുണ്ട്. മലയാളി പ്രേക്ഷകർക്കും ഏറെ പ്രിയങ്കരിയായ നടി അമല അക്കിനേനിയാണ് താരത്തിന്റെ ഭാര്യ. അഖിൽ അക്കിനേനി എന്ന മകനും ദമ്പതികൾക്കുണ്ട്. നാ​ഗാർജുനയുടെ ആദ്യ വിവാഹബന്ധത്തിലെ മകനാണ് നടൻ നാ​ഗ ചൈതന്യ.

അടുത്തിടെ അക്കിനേനി കുടുംബം വലിയ തോതിൽ വാർത്താ പ്രാധാന്യം നേടിയിരുന്നു. നാ​ഗ ചൈതന്യ-സമാന്ത വിവാഹ മോചനമായിരുന്നു ഇതിന് കാരണം. പ്രണയിച്ച് വിവാഹിതരായ സമാന്തയയും നാ​ഗചൈതന്യയും നാല് വർഷത്തിനുള്ളിൽ വേർപിരിഞ്ഞു. താരകുടുംബത്തിലെ വിവാഹമോചനം സിനിമാ ലോകത്ത് വലിയ ചർച്ചയായി. വിവാഹമോചനത്തിന് കാരണമെന്തെന്ന് സമാന്തയോ നാ​ഗ ചൈതന്യയോ എവിടെയും തുറന്ന് പറഞ്ഞിട്ടില്ല.

വിവാഹമോചനത്തിന്റെ സമയത്ത് അക്കിനേനി കുടുംബത്തിൽ നടന്ന സംഭവങ്ങളെക്കുറിച്ച് സംസാരിക്കുകയാണ് തമിഴ് ഫിലിം ജേർണലിസ്റ്റ് ചെയ്യാറു ബാലു. നാ​ഗാർജുനയുടെ കുടുംബത്തിൽ ആദ്യ വിവാഹം നിലനിൽക്കില്ലെന്ന് പൊതുവെ സംസാരമുണ്ടെന്ന് ഇദ്ദേഹം ചൂണ്ടിക്കാട്ടി. 3200 കോടി രൂപയുടെ സ്വത്തുക്കൾ നാ​ഗാർജുനയ്ക്കുണ്ട്. നാ​ഗ ചൈതന്യയും സമന്തയും പ്രണയത്തിലാകുന്ന സമയത്ത് സമാന്ത സാധാരണ കുടുംബത്തിൽ നിന്ന് വന്നയാളാണ്.

ഇത്രയും വലിയ കുടുംബത്തിലേക്ക് സമാന്ത പോകുന്നതിൽ നടിയുടെ അമ്മ പോലും ഭയന്നു. പക്ഷെ ബന്ധത്തിന് നാ​ഗാർജു പച്ചക്കൊടി കാട്ടി. അമലയും ഇതിന് കാരണമാണ്. അവരും നടിയായിരുന്നല്ലോ. എന്നാൽ പിന്നീട് ദമ്പതികൾക്കിടയിൽ അകൽച്ച വന്നു. വിവാഹമോചന സമയത്ത് എത്ര കോടി ജീവനാശം വേണമെന്ന് നാ​ഗാർജുന സമാന്തയോട് ചോദിച്ചു. പത്ത് പൈസ പോലും വേണ്ടെന്ന് സമാന്ത പറഞ്ഞു. അതാണ് സമാന്തയുടെ ധൈര്യം. ആ സ്ഥാനത്ത് മറ്റാരെങ്കിലും ആയിരുന്നെങ്കിലോ.

പ്രശ്സതിക്കപ്പുറം പണത്തിന് വേണ്ടി കൂടിയാണല്ലോ സിനിമാ രം​ഗത്തേക്ക് വരുന്നത്. ന്യായമായി വാങ്ങാവുന്ന തുകയുമാണ്. പക്ഷെ സമാന്ത അതിന് തയ്യാറായില്ല. നിങ്ങളുടെ പണം വേണ്ട, ഞാൻ അഭിനയിച്ച് സമ്പാദിച്ചോളാം, ജീവനാംശം വാങ്ങിയാൽ പണത്തിനാണ് വിവാഹം ചെയ്തതെന്ന് എല്ലാവരും പറയുമെന്നും സമാന്ത പറഞ്ഞു. അത് നാ​ഗാർജുനയെ അത്ഭുതപ്പെടുത്തി. ഈ പെൺകുട്ടി ധൈര്യശാലിയാണെന്ന് അദ്ദേഹത്തിന് തോന്നിയെന്നും ചെയ്യാറു ബാലു പറയുന്നു.

വിവാഹ മോചന സമയത്ത് സമാന്ത 200 കോടി രൂപ ജീവനാംശം വാങ്ങിയെന്ന് വ്യാജ പ്രചരണം നടന്നിരുന്നു. നടി തന്നെ ഇതിനെതിരെ രം​ഗത്തെത്തുകയും ചെയ്തു. വേർപിരിയലിന് ശേഷം നടി കരിയറിന്റെ തിരക്കുകളിലേക്ക് നീങ്ങി. എന്നാൽ മയോസിറ്റിസ് എന്ന ഓട്ടോ ഇമ്മ്യൂൺ കണ്ടീഷൻ ബാധിച്ചത് മൂലം സിനിമാ രം​ഗത്ത് നിന്നും ഇടവേളയെടുത്തിരിക്കുകയാണ് താരം.

നാ​ഗാർജുനയും അമല അക്കിനേനിയുമായി അടുത്ത ബന്ധം സമാന്തയ്ക്കുണ്ടായിരുന്നു. കുടുംബസമേതമുള്ള ചിത്രങ്ങളും അക്കാലത്ത് ശ്രദ്ധ നേടി. എന്നാൽ വിവാഹ മോചനം താര കുടുംബത്തെ വിഷമിപ്പിച്ചു. അതേസമയം വേർപിരിയൽ അക്കിനേനി കുടുംബത്തെ സംബന്ധിച്ച് പുതിയ കാര്യമല്ല. ലക്ഷ്മി ദ​ഗുബതിയുമായി പിരിഞ്ഞ ശേഷമാണ് നാ​ഗാർജുന അമലയെ വിവാഹം ചെയ്യുന്നത്. പ്രമുഖ പ്രൊഡ്യൂസർ ഡി രാമനായ്ഡുവിന്റെ മകളാണ് ലക്ഷ്മി ദ​ഗുബതി.

നാ​ഗ്-അമല ദമ്പതികളുടെ മകൻ അഖിൽ അക്കിനേനി നിശ്ചയിച്ച വിവാഹത്തിൽ നിന്നും പിൻമാറുകയാണുണ്ടായത്. ഫാഷൻ ‍ഡിസൈനർ ശ്രിയ ഭൂപ്പാലിനെയാണ് അഖിൽ വിവാഹം ചെയ്യാനിരുന്നത്. ആഘോഷപൂർവം വിവാഹ നിശ്ചയവും കഴിഞ്ഞു. എന്നാൽ വിവാഹത്തിന് മുമ്പ് അസ്വാരസ്യങ്ങൾ ഉടലെടുത്തതോടെ രണ്ട് പേരും ബന്ധം വേണ്ടെന്ന് വെച്ചു.