വിവാഹമോചനത്തിന് കാരണം അതല്ല; നാ​ഗ ചൈതന്യയുടെ വാക്കുകൾ ചർച്ചയാക്കി ആരാധകർ; സംഭവമിങ്ങനെ

സമാന്തയും നാ​ഗ ചൈതന്യയും വേർപിരിഞ്ഞിട്ട് നാളുകൾ ഏറെയായെങ്കിലും ആരാധകർക്ക് ഇന്നും ഈ സംഭവം നിരാശയുണ്ടാക്കുന്നു. ടോളിവുഡ് ആഘോഷിച്ച താര ജോ‍ഡി ജീവിതത്തിലും ഒരുമിച്ചപ്പോൾ ഏവരും സന്തോഷിച്ചതാണ്. 2010 ൽ പുറത്തിറങ്ങിയ യെ മായ ചെസവ എന്ന സിനിമയാണ് ഇരുവരും ആദ്യമായി ഒരുമിച്ച് അഭിനയിക്കുന്നത്. വിണ്ണെെത്താണ്ടി വരുവായ എന്ന തമിഴ് ചിത്രത്തിന്റെ തെലുങ്ക് പതിപ്പായിരുന്നു ഈ സിനിമ. പിന്നീട് ഒരുപിടി സിനിമകളിൽ ഇരുവരും ഒന്നിച്ച് അഭിനയിച്ചു. മജിലി ഉൾപ്പെടെയുള്ള ചിത്രങ്ങളിൽ നാ​ഗ ചൈതന്യയും സമാന്തയും മികച്ച പ്രകടനം കാഴ്ച വെച്ചു.

2017 ലായിരുന്നു സമാന്ത-നാ​ഗചൈതന്യ വിവാഹം. സിനിമാ ലോകത്തെ നിരവധി പ്രമുഖർ വിവാഹ ചടങ്ങിൽ പങ്കെടുത്തു. വിവാഹത്തിന് ശേഷവും സമാന്ത കരിയറിൽ സജീവമായിരുന്നു. എന്നാൽ നാല് വർഷം മാത്രമേ ഇരുവരുടെയും ബന്ധത്തിന് ആയുസുണ്ടായുള്ളൂ. 2021 ൽ സമാന്തയും നാ​ഗചൈതന്യയും വേർപിരിഞ്ഞു. വിവാഹമോചനത്തിന് കാരണമെന്തെന്ന് ഇപ്പോഴും വ്യക്തമല്ല. ഇതേക്കുറിച്ച് തുറന്ന് സംസാരിക്കാൻ താരങ്ങൾ തയ്യാറായില്ല. ഡിവോഴ്സിന് ശേഷം ഇരുവരും കരിയറിലെ തിരക്കുകളിലേക്ക് കടന്നു.

കുറച്ച് നാളുകൾക്ക് ശേഷം നാ​ഗ ചൈതന്യ നടി ശോഭിത ധുലിപാലയുമായി ഡേറ്റിം​ഗിലാണെന്ന ​ഗോസിപ്പും വന്നു. ഇപ്പോഴിതാ നാ​ഗ ചൈതന്യ നടത്തിയ പരാമർശമാണ് ശ്രദ്ധ നേടുന്നത്. തന്നെ അത്ഭുതപ്പെടുത്തിയ ഇന്ത്യൻ വെബ് സീരീസ് ഏതെന്ന ചോദ്യത്തിന് മറുപടി നൽകുകയായിരുന്നു നടൻ. ഫാമിലി മാൻ സീരീസാണ് തനിക്കിഷ്ടപ്പെട്ടതെന്നാണ് നാ​ഗ ചൈതന്യ നൽകിയ മറുപടി. ഫാമിലി മാൻ സീരീസിനെക്കുറിച്ച് നാ​ഗ ചൈതന്യ പരാമർശിക്കുമെന്ന് ആരാധകർ കരുതിയിരുന്നില്ല.

മുൻ ഭാര്യ സമാന്തയാണ് ഈ സീരീസിന്റെ രണ്ടാം സീസണിൽ പ്രധാന വേഷം ചെയ്തത്. നെ​ഗറ്റീവ് വേഷത്തിൽ മികച്ച പ്രകടനം കാഴ്ച വെച്ച സമാന്ത വൻ പ്രേക്ഷക പ്രശംസ നേടി. നേരത്തെ സമാന്ത തെരഞ്ഞെടുക്കുന്ന പ്രൊജക്ടുകൾ നാ​ഗ ചൈതന്യയെ ചൊടിപ്പിച്ചെന്നും ഇതാണ് അകൽച്ചയ്ക്ക് കാരണമായതെന്നും റിപ്പോർട്ടുകൾ വന്നിരുന്നു. കുടുംബത്തിന്റെ പേരിനും പ്രതിഛായക്കും മോശമുണ്ടാക്കുന്ന റോളുകൾ ചെയ്യില്ലെന്ന് നാ​ഗ ചൈതന്യ പറയുകയുമുണ്ടായി.

എന്നാൽ സമാന്ത എന്നും വ്യത്യസ്തമായ റോളുകൾ തേടുന്ന നടിയാണ്. സൂപ്പർ ‍ഡീലക്സ്, ഫാമിലി മാൻ തുടങ്ങിയ പ്രൊജക്ടുകളിൽ സമാന്ത ഒപ്പുവെക്കുന്നത് വിവാഹിതയായിരിക്കെയാണ്. ഈ പ്രൊജക്ടുകളിൽ ഇന്റിമേറ്റ് രം​ഗങ്ങളിലും നടി അഭിനയിച്ചു. ഇതാണോ വിവാ​ഹമോചനത്തിന് കാരണമായതെന്ന് നേരത്തെ ചോദ്യങ്ങൾ വന്നിരുന്നു. എന്നാലിപ്പോൾ ഫാമിലി മാൻ ഇഷ്ടപ്പെട്ട സീരാസാണെന്ന് പറഞ്ഞതോടെ ഈ അഭ്യൂഹങ്ങൾ അവസാനിച്ചിരിക്കുകയാണ്.

വിവാഹ മോചനത്തിന് ശേഷം പുഷ്പ എന്ന ചിത്രത്തിൽ ഡാൻസ് നമ്പർ ചെയ്യാനും സമാന്ത തയ്യാറായി. വിവാഹമോചനത്തിന് ശേഷം മറ്റ് ചില പ്രതിസന്ധികളും സമാന്തയ്ക്ക് നേരിടേണ്ടി വന്നു. കഴിഞ്ഞ കുറേ നാളുകളായി മയോസിറ്റിസ് എന്ന ഓട്ടോ ഇമ്മ്യൂൺ കണ്ടീഷന്റെ ചികിത്സയിലാണ് സമാന്ത. ചികിത്സയുടെ ഭാ​ഗമായി സിനിമകളുടെ തിരക്കും കുറച്ചിട്ടുണ്ട്.

ഖുശിയാണ് നടിയുടെ ഒടുവിൽ പുറത്തിറങ്ങിയ ചിത്രം. വിജയ് ദേവരകൊണ്ട നായകനായെത്തിയ സിനിമ മികച്ച വിജയം നേ‌ടി. സിതാഡെൽ എന്ന സീരീസ് സമാന്തയുടേതായി പുറത്തിറങ്ങാനുണ്ട്. കഴിഞ്ഞ ദിവസം സമാന്ത കുട്ടികളെ ദത്തെടുക്കാൻ ഒരുങ്ങുന്നെന്ന വാർത്ത വന്നിരുന്നു. എന്നാൽ നടി ഇതേക്കുറിച്ച് പ്രതികരിച്ചിട്ടില്ല.